«قازاق مەديا اسسوتسياتسياسى» «ادىرنا» ۇلتتىق پورتالى اينالاسىنداعى قىسىم مەن قۋدالاۋ جاعدايلارىنا الاڭداۋشىلىق بىلدىرەدى.
وكىنىشكە قاراي، سوڭعى ۋاقىتتا باق جانە جۋرناليستتەرگە ءتۇرلى دارەجەدە قىسىم جاساۋ، زاڭدى قىزمەتىنە كەدەرگى كەلتىرۋ جانە ارقيلى نەگىزدە سوتقا تارتۋ، پوليتسياعا ارىزدانۋ ءورشىپ تۇر. قر كونستيتۋتسياسىندا ءباسپاسوز بوستاندىعىنا كەپىلدىك بەرىلگەنىمەن سول بوستاندىقتى قارسى شابۋىلدار تولاستار ەمەس.
«ارينە، ءار ازاماتتىڭ پىكىرىن ايتۋعا، ءوزىن قورعاۋعا جانە قاجەت بولعاندا سوتقا جۇگىنۋگە قۇقىلى ەكەنى راس. الايدا سوڭعى كەزدەرى بارىنە باق-تى نەمەسە ءجۋرناليستى كىنالى ەتىپ شىعارۋعا تالپىناتىن ىستەر كوبەيىپ كەتتى. قانداي دا ءبىر داۋدا باق تۋرالى زاڭدا كورسەتىلگەن تالاپتاردى رەداكتسيالار ساقتاعانىمەن قارسى تاراپتار وعان توقتاماي قالاي دا باق پەن ءجۋرناليستى سوتقا سۇيرەپ، ءوش الۋ سيپاتىنداعى ارەكەتتەرگە بارىپ جاتقانى مەديا قاۋىمداستىقتى عانا ەمەس، تۇتاس قوعام مەن بيلىكتى الاڭداتۋى ءتيىس وتكىر ماسەلە دەپ بىلەمىز. سوندىقتان دا باق پەن جۋرناليسكە جاسالاتىن قىسىم مەن قۋدالاۋدىڭ جولىن قاتاڭ كەسۋگە جانە مۇنداي ءار ىسكە قۇزىرلى جاۋاپتى ورگانداردى مۇقيات نازار اۋدارۋعا شاقىرامىز.
كەزەكتى قىسىم «ادىرنا» ۇلتتىق پورتالىنا جاسالىپ وتىر. اتالعان رەداكتسيا ىسىنە قاتىستى اشىق ءارى ءادىل ءىس-شارالاردىڭ جەدە قابىلدانىپ، ولاردىڭ جۇمىسىنا كەدەرگى كەلتىرىپ وتىرعان ارەكەتتەرگە توقتاۋ سالىنۋىن تالاپ ەتەمىز!»، – دەلىنگەن ۇندەۋدە.
ADYRNA ULLTYQ PORTALY Youtube ارناسىنا 2023 جىلى 2 قاڭتار كۇنى «عالىمجان جاقيانوۆقا سەنىپ ەدىم» دەگەن تاقىرىپتا ەكس-دەپۋتات تولەن توقتاسىنوۆتان الىنعان سۇحباتتى جاريالاعان.
كەيىن پاۆلودار وبلىسى مەن سەمەي قالاسىنىڭ ەكس-اكىمى عالىمجان جاقيانوۆ 2023 جىلى 17 تامىز كۇنى الاتاۋ اۋداندىق سوتىنا «ادىرنا» ۇلتتىق پورتالى مەن تولەن توقتاسىنوۆتىڭ ۇستىنەن ارىز ءتۇسىردى. بۇگىندە وسى سۇحبات ماسەلەسى بويىنشا بىرنەشە ايعا سوزىلعان سوت پروتسەسسى جالعاسۋدا.
«2023 جىلدىڭ 26 -شى اقپانى كۇنى ساعات 15:00-دە الماتى قالاسىنىڭ الاتاۋ اۋداندىق سوتىندا وسى ءىس بويىنشا قورتىندى ءجارىسسوز وتەدى.
«ادىرنا» ۇلتتىق پورتالىنىڭ يۋتۋب ارناسى جانە رەداكتسياسى عالىمجان جاقيانوۆتىڭ ار-وجدانى مەن بەدەلىنە نۇسقان كەلتىرۋ، بۇرمالانعان اقپارات جاريالاۋدى ماقسات تۇتپاعان. سۇحبات بارىسىندا تەك جۋرناليست سپيكەرگە سۇراق قويدى. ال سۇحبات بەرۋشى ءوز پىكىرىمەن بولىسكەن. ەشقانداي وزگەرىسسىز، جالعان اقپارات قوسپاي جاريالاندى. جانە ساياساتكەر عالىمجان جاقيانوۆ سۇحباتقا شاقىرىلىپ، ەفيردەن ورىن بەرۋگە دايىن ەكەنىن «ادىرنا» ۇلتتىق پورتالى بىرنەشە مارتە مالىمدەگەن. ءتىپتى تولەن توقتاسىنوۆپەن بولعان العاشقى سۇحبات بارىسىندا دا جاقيانوۆقا ستۋدياعا كەلىپ، ءمان-جايدى ءتۇسىندىرۋ ۇسىنىلعان. بىراق، جاقيانوۆ بۇل ۇسىنىستان ءۇزىلدى-كەسىلدى باس تارتتى. سونىمەن قاتار، عالىمجان جاقيانوۆتىڭ فەيسبۋكتاعى بارلىق مالىمدەمەلەرىن «ادىرنا» ۇلتتىق پورتالى ۇزبەي جاريالاپ كەلەدى. ياعني، بەيتاراپتىق پوزيتسيانى ۇستانۋدا.
رەداكتسيا اقپارات تاراتۋ ءتاسىلىنىڭ دۇرىستىعىنا جانە ەشكىمنىڭ مۇددەسىنە قايشى ارەكەت جاساماعانىنا سەنىمدى جانە اتالعان ءىستى باق-قا قىسىم جاساۋ فاكتىسى دەپ سانايدى. 2023 جىلدىڭ 26 -شى اقپانى كۇنى ساعات 15:00-دە الماتى قالاسىنىڭ الاتاۋ اۋداندىق سوتىندا (جانقوجا باتىر، 26/1) وتەتىن قورتىندى جارىس سوزگە (دەبات فورماتىندا) بارلىق باق وكىلدەرىن جانە قوعام بەلسەندىلەرىن شاقىرامىز! ادىلدىكتى، شىندىقتى، ءسوز بوستاندىعىن قولداۋعا كەلىڭىزدەر!»، – دەلىنگەن ۇندەۋ ماتىنىندە.
