6 ناۋرىز كۇنى مەملەكەت باسشىسى قاسىم-جومارت توقاەۆ ىشكى ىستەر ءمينيسترى ەرجان سادەنوۆتى قابىلدادى، دەپ حابارلايدى "ادىرنا" ۇلتتىق پورتالى "اقوردا" سايتىنا سىلتەپ.
پرەزيدەنتكە ەلىمىزدە «زاڭ جانە ءتارتىپ» قاعيداتىن ورنىقتىرۋ، كەز كەلگەن قۇقىق بۇزۋشىلىققا مۇلدەم توزبەۋشىلىك جاعدايىن قالىپتاستىرۋ ماقساتىندا جۇرگىزىلىپ جاتقان جۇمىستار جونىندە ەسەپ بەرىلدى.
ەرجان سادەنوۆ ۆەدومستۆو ءوز قىزمەتى بارىسىندا مەملەكەت باسشىسىنىڭ ىشكى ىستەر مينيسترلىگىنىڭ كەڭەيتىلگەن القا وتىرىسىندا بەرگەن تاپسىرمالارىنا سايكەس قۇقىق بۇزۋشىلىقتىڭ الدىن الۋ جانە ازاماتتاردىڭ قۇقىقتىق ساۋاتىن ارتتىرۋ ماسەلەلەرىنە باسا ءمان بەرىپ وتىرعانىن باياندادى. سونىڭ ناتيجەسىندە جىل باسىنان بەرى قىلمىس دەڭگەيى تومەندەگەن. اتاپ ايتقاندا، ۇرلىق، توناۋ، قاراقشىلىق، سونداي-اق وتباسىلىق-تۇرمىستىق جانە كوشەدە جاسالعان قىلمىستار، كامەلەتكە تولماعان جانە بۇرىن سوتتالعان ازاماتتار ىستەگەن قىلمىستار ايتارلىقتاي ازايعان.
مەملەكەت باسشىسىنا قۇقىق بۇزۋشىلىقتىڭ الدىن الۋعا باعىتتالعان بىرىڭعاي زاڭ ازىرلەۋ، تۇرمىستىق زورلىق-زومبىلىققا قارسى كۇرەس جونىندە ارنايى بولىمشە قۇرۋ ءۇشىن قابىلدانىپ جاتقان شارالار تۋرالى مالىمەت بەرىلدى.
بۇدان بولەك، پرەزيدەنتكە ۇيىمداسقان قىلمىسقا، ەسىرتكى قىلمىسىنا، ەكسترەميزمگە قارسى ءىس-قيمىل جۇمىستارىنىڭ ناتيجەسى تانىستىرىلدى. مينيستر كيبەرقىلمىسقا قارسى كۇرەس جۇرگىزەتىن دەربەس قىزمەت قۇرىلاتىنىن جەتكىزدى.
سونىمەن قاتار ەرجان سادەنوۆ ورتا بۋىنعا جاتاتىن باسشىلىق قۇرامدى كەزەكتەن تىس اتتەستاتتاتسيادان وتكىزۋگە دايىندىق بارىسى جايىندا ايتتى.
كەزدەسۋ سوڭىندا قاسىم-جومارت توقاەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە بىرقاتار ناقتى تاپسىرما بەردى.
