تيكتوك جەلىسىندە جىندى ادامشا ءتۇرلى ءىس-ارەكەت جاساعان اجە كوپتىڭ سىنىنا قالدى، دەپ حابارلايدى "ادىرنا" ءتىلشىسى Caravan.kz-كە سىلتەپ.
الەۋمەتتىك جەلىدە "حيت بولامىن" دەپ ءتۇرلى بي بيلەپ، ارەكەتتەر جاساپ، كوپتىڭ اشۋىنا تيگەندەر كوپ.
جۋرناليست گۇلميرا ابىقاي جەلىدە تالقىعا تۇسكەن ۆيدەونى ءوزىنىڭ Instagram پاراقشاسىندا جاريالاپ، تيك توك جەلىسىنە تىيىم سالۋدى دا ۇسىندى.
"باستى بالە تيك توكتان. تيكتوكقا شىعىپ كارى دە، جاستا ءوز قادىرىن كەتىرۋدە. كوپ مەملەكەت وسى الەۋمەتتىك جەلىنىڭ پايداسىنان گورى زيانى كوپ ەكەنىن كورىپ، قولدانۋعا زاڭمەن تىيىم سالۋدا. بۇل ينتەرنەت قاۋىمداستىق 2016-شى جىلى پايدا بولدى. قازىر ايىنا 1 ملرد. استام قولدانۋشى تيكتوك جەلىسىنە كىرەدى ەكەن.
ويلاپ تاپقان قىتاي ازاماتى چجان يمين. ايتا كەتەرلىگى قىتايدىڭ وزىندە تيكتوك جوق. ورنىنا وسىنىڭ بالاماسى “دوۋين” جۇمىس ىستەيدى. مۇندا بوقتىق ءسوز، جاعىمسىز ارەكەتتەر شەكتەلگەن! تيكتوك جەلىسىن قولدانۋعا تىيىم سالىنعان مەملەكەتتەر:
ەۋرووداق كولەمىندە، فرانتسيا، نورۆەگيا، ۇلىبريتانيا، كانادا، بەلگيا جانە تۇركيا، پاكىستان، ءۇندىستان، سينگاپۋر، مالايزيا. اقش كونگرەسسىنىڭ ءوزى كەشە عانا بۇل جەلىنى قولدانۋعا تىيىم سالاتىن زاڭ جوباسىن ماقۇلدادى.ءتىپتى، كورشى قىرعىزستان تيكتوكقا تىيىم سالۋ جايىن تالقىلاۋدا.
ال، ءبىز قارا قاتىن قولتىقشاشتان باستاپ نەبىرەۋلەردى كورىپ كەلە جاتىرمىز. تىكەلەي ەفيردە ءىشىپ ماسايىپ، ساعاتتاپ جەل شىعارىپ، ءتىپتى، دارەتكە وتىراتىندار دا بار دەي ما، قۇداي-اۋ؟! نە ىستەيمىز؟", — دەپ جازدى جۋرناليست.
ەكى كوزىن الارتىپ، ءتىلىن شىعارىپ، مازاق بولعان اجەگە قاتىستى جەلى وقىرماندارى دا ءتۇرلى پىكىر جازدى.
"مىنا اپادا كوكتەمدىك كريزيس پا", "ستريمدا وتىراتىندار اجەلەردى اجە دەۋگە كەلمەيدى", "مىناۋ نە سۇمدىق!", "وسىنداي اجەلەردەن تاربيەلەنگەن بالالار قانداي بولار ەكەن؟" دەپ جازعان وقىرماندار كوپ.
