ۇلىستىڭ ۇلى كۇنى – ءاز ناۋرىز مەيرامى قارساڭىندا قازاقستاننىڭ سلوۆاكياداعى ەلشىلىگىندە تەگىن قازاق ءتىلى كۋرستارى مەن قازاق ادەبيەتى كىتاپحاناسى اشىلدى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«ساباقتاردى اپتاسىنا ەكى رەت بىلىكتى ماماندار – قازاق ءتىلى مۇعالىمى جازيرا بايجۇمانوۆا مەن فيلولوگ سۇلتان قاماليدەن جۇرگىزەدى. قازاق ءتىلىن ۇيرەنگىسى كەلەتىندەردىڭ بارلىعىنا ىڭعايلى بولۋ ءۇشىن كۋرستار ەكى توپقا بولىنەدى – سلوۆاك جانە ورىس تىلدەرىندە وقىتاتىن توپتار. ساباققا جەكە قاتىسا المايتىندار ءۇشىن ساباقتاردىڭ ونلاين ترانسلياتسياسى ۇيىمداستىرىلادى. قازاقستاندا شىققان قازاق ءتىلى وقۋلىقتارىن ەلشىلىك قامتاماسىز ەتەدى»،—دەلىنگەن حابارلامادا.
ال قازاقستاننىڭ تاريحى مەن مادەنيەتىمەن تانىسقىسى كەلەتىندەر ءۇشىن قازاقستاننىڭ سلوۆاكياداعى ەلشىلىگى جانىنان قازاق ادەبيەتىنىڭ كىتاپحاناسى اشىلدى. كىتاپحانا قورىندا حاكىم اباي، ماعجان جۇماباي، مۇحتار اۋەزوۆ، ءىلياس ەسەنبەرلين، ءابدىجامىل نۇرپەيىسوۆ جانە باسقا دا قالامگەر كلاسسيكتەردىڭ قازاق، سلوۆاك، چەح، ورىس جانە اعىلشىن تىلدەرىندەگى كىتاپتارىنىڭ مول جيناعى بار. كىتاپحانا دەمالىس كۇندەرىن قوسپاعاندا، كۇن سايىن ساعات 9:00-دەن 15:00-گە دەيىن اشىق.
