بۇگىن قازىعۇرت حيكمەتتەرىن قازاققا پاش ەتكەن جازۋشى، مەملەكەت جانە قوعام قايراتكەرى قالاۋبەك تۇرسىنقۇلوۆتىڭ تۋعانىنا - 90 جىل.
ول 1934 جىلى 25 ناۋرىزدا وڭتۇستىك قازاقستان وبلىسىنىڭ قازىعۇرت اۋدانىنداعى شاربۇلاق اۋىلىندا دۇنيەگە كەلگەن.
1953–1957 جج. ن.ۆ.گوگول اتىنداعى قىزىلوردا پەداگوگيكالىق ينستيتۋتىندا وقىپ، ورىس ءتىلى مەن ادەبيەتى ماماندىعىن الدى.
1957–1959 جج. ءوزى وقىعان لەنين اتىنداعى ورتا مەكتەپتە مۇعالىم، وقۋ ءىسىنىڭ مەڭگەرۋشىسى قىزمەتتەرىن اتقاردى.
1959–1961 جج. قازاقستان لكجو قاراتاس اۋداندىق كوميتەتىنىڭ ءبىرىنشى حاتشىسى، 1961–1963 جج. وڭتۇستىك قازاقستان ولكەلىك كومسومول كوميتەتىنىڭ ءبىرىنشى حاتشىسى، 1966–1969 جج. قازاقستان لكجو ورتالىق كوميتەتىنىڭ حاتشىسى قىزمەتىن اتقارادى.
1969–1972 جج. قازاق كسر باسپا، پوليگرافيا جانە كىتاپ ساۋداسى ىستەرى جونىندەگى مەملەكەتتىك كوميتەتى توراعاسىنىڭ ورىنباسارى، 1972 جىلدان قازاقستان جازۋشىلار وداعى باسقارماسىنىڭ ۇيىمداستىرۋ جونىندەگى حاتشىسى، 1992–1997 جج. مەملەكەتتىك تەلەراديو كومپانياسى توراعاسىنىڭ ورىنباسارى، قازاقستان جازۋشىلار وداعى باسقارماسى توراعاسىنىڭ ورىنباسارى سەكىلدى جاۋاپتى جۇمىستار اتقاردى.
العاشقى شىعارمالارىن ەلۋىنشى جىلداردىڭ ەكىنشى جارتىسىندا جازدى. «قالكەن شاربولاتۇلى» دەگەن اتپەن «كاپىرزادا» پەساسى، اڭگىمە، پوۆەستەرى باسپاسوزدە جارىق كوردى. العاشقى اڭگىمەلەر مەن پوۆەستەر جيناعى «الىسقا تارتقان جول» 1969 جىلى شىقتى. «ارمان ازابى» پەساسىن، «ەسىڭدە مە سول ءبىر كەز»، «حال قالاي، جولداس حاتشى»، «كەشىككەن حات»، «اندى-قاراعىز» پوۆەستەرىن، «پوليار شەڭبەرىنىڭ ماڭىندا»، «ولار ورالعان جوق»، «ساردانا مەن قىزعالداق»، «قازىعۇرت: اڭىز بەن اقيقات» سەكىلدى رومان-ەسسەلەر جازدى.
ك.ياشەننىڭ پەسالارىن، ر.ءفايزيدىڭ «اينالايىن اتىڭنان» رومانىن، ع.گۋليامنىڭ «تاشكەنتتىكتەر» رومانىن، ي.س.تۋرگەنەۆتىڭ «بەيباق»، س.دانيلوۆتىڭ «مانگارى» پوۆەستەرىن، ل.ن.تولستويدىڭ اڭگىمەلەرىن، جانە باسقا دا جازۋشىلاردىڭ شىعارمالارىن اۋداردى. جەكەلەگەن پوۆەستەرى ورىس، ۋكراين، بەلورۋس، چەح، وزبەك، تاجىك، ياكۋت، تاتار، باشقۇرت، ارميان، ت.ب. تىلدەرگە اۋدارىلعان. وزبەك تىلىندە 3 كىتابى، ساحا تىلىندە 3 كىتابى، ماسكەۋ باسپالارىنان 3 كىتابى جارىق كورگەن.
ەكى رەت «قۇرمەت بەلگىسى» وردەنىمەن، «ەڭبەكتەگى ەرلىگى ءۇشىن» مەدالىمەن، ەكى رەت قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان. ساحا رەسپۋبليكاسىنىڭ ەڭبەك سىڭىرگەن قايراتكەرى. ساحا رەسپۋبليكاسى مەملەكەتتىك سىيلىعى مەن ەرليك ەريستين اتىنداعى ادەبي سىيلىعىنىڭ، قازاقستان جازۋشىلار وداعىنىڭ س.سەيفۋللين اتىنداعى سىيلىعىنىڭ يەگەرى.
قازىعۇرتتى قاستەر تۇتقان جازۋشى 2009 جىلى دۇنيەدەن ءوتتى.
