قازنەتتە ەر ادامنىڭ تۇرعىن ءۇي كەشەندەرىنىڭ بىرىندە كۇزەتشىنىنى بىرنەشە مارتە كولىكپەن جانىشتاپ، كەيىننەن ۇرىپ-سوققان بەينەجازباسى تارادى، دەپ حابارلايدى «ادىرنا» ءتىلشىسى.
كۋاگەرلەردىڭ ايتۋىنشا، وقىس وقيعا الماتىداعى «مەركۋر تاۋن» تۇرعىن ءۇي كەشەنىندە ناۋرىزدىڭ 28-ىنەن 29-ىنا اۋعان ءتۇنى بولعان. تارالعان ۆيدەو-مالىمەتتەردىڭ بىرىندە، ەگەر ۋاقىتى دۇرىس كورسەتىلسە، وقيعا تۇنگى 2:30 شاماسىندا بولعانعا ۇقسايدى.
كۇدىكتىنىڭ ۇزاق جىلدار بويى اتا-اناسىمەن بىرگە وسى تۇرعىن ءۇي كەشەنىندە تۇراتىنى ايتىلادى. وقيعانى تۇرعىن ءۇي كەشەنى تۇرعىندارى ۆيدەوعا دا تۇسىرگەن. تاراعان ۆيدەولاردا كۇدىكتىنىڭ كۇزەتشىنى بىرنەشە مارتە كروسسوۆەر كولىكپەن جانشىپ، ول قانسىراپ جاتقاندا اياق-قولمەن تاعى دا ۇرىپ، سوڭىنان كولىكتى تۇراققا قويعانى تۇسىرىلگەن. وقيعانىڭ باسىندا كۇزەتشى شلاگباۋمدى جاپقانى بايقالادى.
كادرلاردا ەر ادامنىڭ جەردە جاتقان ەس-ءتۇسسىز كۇزەتشىنى ۇرىپ-سوعىپ جاتقانى انىق كورىنەدى. وقيعا كەزىندە تۇرعىنداردىڭ ايقايلاپ اراشا شاقىرعانى بايقالادى، الايدا ەشكىم جەكە بارىپ ارا تۇسپەگەن. ۆيدەودا جابىرلەنۋشىنىڭ قانسىراپ قينالىپ جاتقان داۋسى دا ەستىلەدى.
قالالىق پوليتسيا دەپارتامەنتى ادام ءولتىرۋ دەرەگى بويىنشا قىلمىستىق ءىس قوزعالعانىن مالىمدەدى.
«الدىن الا مالىمەت بويىنشا، كۇزەتشى مەن تۇرعىن ءۇي كەشەنىنىڭ تۇرعىنى اراسىندا جانجال تۋىنداپ، ناتيجەسىندە 45 جاستاعى ەر ادام كۇزەتشىنىڭ ومىرىنە سايكەس كەلمەيتىن دەنە جاراقاتىن جاساعان. كۇدىكتى ۇستالىپ، ۋاقىتشا ۇستاۋ يزولياتورىنا قاماۋعا الىندى»،— دەلىنگەن حابارلامادا.
سونداي-اق قالالىق پوليتسيا دەپارتامەنتى كۇدىكتى ادام 14 قاباتتان سەكىرمەك بولعانىن اتاپ وتكەن. الايدا ءتارتىپ ساقشىلارى ءسۋيتسيدتىڭ الدىن العانىن ايتادى. تارالعان اقپاراتتا تۇرعىندارعا سىلتەمە جاسالىپ، كۇدىكتىنىڭ ناشاقورلىققا سالىنۋى مۇمكىن ەكەنى جايلى دا مالىمەت بار. الايدا پوليتسيا كۇدىكتىنىڭ سۋيتسيدكە بارعانى تۋرالى، نەمەسە ونىڭ ناشاقور ەكەندىگى تۋرالى دالەل، دايەك ۇسىنباعان.
