Qaznette er adamnyń turǵyn úı keshenderiniń birinde kúzetshinini birneshe márte kólikpen janyshtap, keıinnen uryp-soqqan beınejazbasy tarady, dep habarlaıdy «Adyrna» tilshisi.
Kýágerlerdiń aıtýynsha, oqys oqıǵa Almatydaǵy «Merkýr Taýn» turǵyn úı kesheninde naýryzdyń 28-inen 29-yna aýǵan túni bolǵan. Taralǵan vıdeo-málimetterdiń birinde, eger ýaqyty durys kórsetilse, oqıǵa túngi 2:30 shamasynda bolǵanǵa uqsaıdy.
Kúdiktiniń uzaq jyldar boıy ata-anasymen birge osy turǵyn úı kesheninde turatyny aıtylady. Oqıǵany turǵyn úı kesheni turǵyndary vıdeoǵa da túsirgen. Taraǵan vıdeolarda kúdiktiniń kúzetshini birneshe márte krossover kólikpen janshyp, ol qansyrap jatqanda aıaq-qolmen taǵy da uryp, sońynan kólikti turaqqa qoıǵany túsirilgen. Oqıǵanyń basynda kúzetshi shlagbaýmdy japqany baıqalady.
Kadrlarda er adamnyń jerde jatqan es-tússiz kúzetshini uryp-soǵyp jatqany anyq kórinedi. Oqıǵa kezinde turǵyndardyń aıqaılap arasha shaqyrǵany baıqalady, alaıda eshkim jeke baryp ara túspegen. Vıdeoda jábirlenýshiniń qansyrap qınalyp jatqan daýsy da estiledi.
Qalalyq polıııa departamenti adam óltirý deregi boıynsha qylmystyq is qozǵalǵanyn málimdedi.
«Aldyn ala málimet boıynsha, kúzetshi men turǵyn úı kesheniniń turǵyny arasynda janjal týyndap, nátıjesinde 45 jastaǵy er adam kúzetshiniń ómirine sáıkes kelmeıtin dene jaraqatyn jasaǵan. Kúdikti ustalyp, ýaqytsha ustaý ızolıatoryna qamaýǵa alyndy»,— delingen habarlamada.
Sondaı-aq qalalyq polıııa departamenti kúdikti adam 14 qabattan sekirmek bolǵanyn atap ótken. Alaıda tártip saqshylary sýııdtiń aldyn alǵanyn aıtady. Taralǵan aqparatta turǵyndarǵa silteme jasalyp, kúdiktiniń nashaqorlyqqa salynýy múmkin ekeni jaıly da málimet bar. Alaıda polıııa kúdiktiniń sýııdke barǵany týraly, nemese onyń nashaqor ekendigi týraly dálel, dáıek usynbaǵan.
