اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ۇزاق جىلدار بويى ەڭبەك ەتكەن بەلگىلى ادەبيەتتانۋشى عالىم، شەبەر ادىسكەر، فيلولوگيا عىلىمدارىنىڭ كانديداتى، پروفەسسور سەرىك ماقپىرۇلىنىڭ تۋعانىنا بيىل 80 جىل تولىپ وتىر. عالىمنىڭ شاكىرتتەرى ۇستازدارىن ەسكە الادى.
ۇستاز ۇلاعاتى
2000 جىلدىڭ قىركۇيەگى... تاڭعى ساعات سەگىز... اباي اتىنداعى قارت قازۇپۋ، قاسيەتتى قارا شاڭىراق قۇشاعىن جايا، جاستاردى قارسى الىپ تۇر... ۇلى ابايدىڭ ويلى كوزقاراسى ءاربىر جاسقا وسيەتىن ايتىپ، ۇلكەن ءۇمىت ارتىپ تۇرعانداي... تەرەزەلەردەن اۋديتورياعا ءالى دە كۇز مەزگىلىنە ىرىق بەرە قويماعان كۇننىڭ جارىق تا جىلى ساۋلەسى ەنىپ، اينالانى نۇرعا بولەپ تۇر. ساياباقتان سىزىلتا سايراعان نەشە ءتۇرلى قۇستاردىڭ داۋىسى ەستىلەدى. الىستاعى كونديتەرلىك فابريكادان كەلگەن شوكولاد ءيىسى اۋادا سەزىلىپ تۇر. اۋديتوريادا 50-60 شاقتى ءبىرىنشى كۋرس ءبىلىم الۋشىلارى... بىرەۋلەرى كەلىپ، ەندى بىرەۋلەرى قاتەلەسكەنىن ءبىلىپ، دالىزدە باسقا اۋديتوريالاردىڭ ەسىكتەرىنەن سىعالاپ، ابىر-سابىر بولىپ جاتىر. تەرەزە جاققا جايعاسىپ جاتقان جاستار جاڭا داپتەرلەرىمەن باستارىن كۇننىڭ ساۋلەسىنەن كولەگەيلەپ وتىر... بىرگە وقيمىز-اۋ دەگەن 10-15 شاقتى ءبىلىم الۋشى تالاسا-تارماسا، ءبىرىنشى قاتارعا جايعاستىق...
جۇرەگىمىز لۇپىلدەپ، ءبارىمىز دە ءومىرىمىزدىڭ جاڭا كەزەڭىنىڭ باستالۋىن تاعاتسىزدانا كۇتىپ وتىرمىز. وسى كەزدە اشىق تۇرعان ەسىكتەن قولىندا تاياعى بار ءجۇزى جىلى اعاي كۇلىمدەپ كىرىپ كەلدى. ءبارىمىز ورنىمىزدان ۇشىپ تۇرا كەلدىك. «وتىرىڭدار»، – دەگەندەي باسىن يزەپ، اعاي ءدارىسىن باستاپ كەتتى... ءوزىن سەرىك ماقپىرۇلى دەپ تانىستىرعاننان كەيىن اعاي ءسوز قۇدىرەتى جونىندە ءسوز مارجاندارىن توگىلتە، كوركەم سوزبەن كومكەرىلگەن كەستەلى بەينەلەردى كوز الدىمىزعا تۇيدەكتەتە توگە باستادى. ءتىل بايلىعى، شۇرايلىلىعى، كوركەمدىگى، اسەرلىلىگى – ءبارى-ءبارى سەرىك اعايدىڭ وقىپ وتىرعان دارىسىنەن تابىلعانداي. ءبىز بولساق تامسانىپ، اعايدىڭ ءار ءسوزىن جادىمىزعا قۇيىپ العىمىز كەلىپ وتىرعانداي...
قىزىعى سول، سەرىك ماقپىرۇلى ەشقاشان قاعازدان ءدارىس وقىمايتىن. قولىندا ءبىرلى-جارىم جوسپارىن ءتۇرتىپ العان ءبىر جاپىراق قاعازىنا اندا-ساندا كوز سالعانى بولماسا، نازارىنىڭ ءبارى ءبىلىم الۋشىلاردا بولاتىن ەدى... ءتىلى سونداي شۇرايلى، اسەرلى ءارى كوركەم ەدى... بىزگە: «كەرەك جەرلەرىن عانا ءتۇرتىپ الىپ وتىرارسىزدار»، – دەيتىن... شىركىن، بىزگە اعايدىڭ ءار ءسوزى ءىنجۋ-مارجان ىسپەتتەس، ايتقان ءبىر ءسوزىن قاعازعا تۇسىرمەسەك، ەرتەڭ كوركەم ءسوز تابيعاتىن تاني الماي قالاتىنداي بولىپ كورىنەتىن... سەرىك ماقپىرۇلى ءبىز ءۇشىن بۇگىنگى تىلمەن ايتقاندا رولدىك مودەل بولدى، سولاي بولىپ قالا دا بەرەدى.
ءدارىستى قالاي وقۋ كەرەك، اۋديتوريا نازارىن قالاي وزىڭە اۋدارىپ، باۋراپ الۋ كەرەك، ءدارىستى قالايشا قىزىقتى وتكىزۋ كەرەك، مىنە، وسىنىڭ ءبارىن سەرىك اعايدان ۇيرەنۋگە بولاتىن...
مۇنىمەن قوسا، سەرىك ماقپىرۇلى – ادامگەرشىلىك پەن اسقان پاراساتتىڭ يەسى ەدى... اعاي شاكىرتتەرىنە ارقاشان جاناشىرلىقپەن، قامقورلىقپەن قارايتىن، ولاردىڭ بولاشاعىنا الاڭداپ تا وتىراتىن. تالانتتى شاكىرتتەردى العاشقى كۋرستان ءوز قاراماعىنا جيناپ، قامقورلىعىن ايامايتىن، بىلىمگە، عىلىمعا، شىعارماشىلىققا باۋليتىن...
ءبىز – سەرىك ماقپىرۇلى مەكتەبىنىڭ تۇلەكتەرىمىز، اعايدىڭ قازاق عىلىمىندا سالعان سارا جولىن جالعاستىرىپ كەلە جاتقان شاكىرتتەرى، ءىزباسارلارىمىز... ول كىسىنىڭ ءىزىن جالعاستىرۋشى بولۋ – شاكىرتتەرى ءۇشىن ۇلكەن مارتەبە، جەتىستىك دەسەم، استە قاتەلەسپەيمىن... ءبىزدىڭ زەرتتەۋشى، عالىم، ۇستاز، ادەبيەتشى، ءتىلشى رەتىندە قالىپتاسۋ جولىمىزدا اعايدىڭ ورنى ەرەكشە بولدى. ۇلگى الدىق، ۇيرەندىك، اسىل قاسيەتتەرىن بويىمىزعا سىڭىردىك، ەلىكتەدىك، بارىنشا اعايدىڭ سەنىمىن اقتاماق بولدىق...
سەرىك ماقپىرۇلى – مەنىڭ ۇستازىم، عىلىم مەن ىزدەنىس جولىنداعى مەنتورىم، جەتەكشىم (2004 ج. ديپلومدىق جۇمىسىمنىڭ، 2004-2007 جج. كانديداتتىق ديسسەرتاتسيامنىڭ جەتەكشىسى), رۋحاني اكەم. ءبىرىنشى كۋرستا اعايدىڭ ماعان «اسەل، جاقسى وقىعانىڭ ءۇشىن. ىزدەنىستەرىڭنىڭ باسى بولسىن! سەرىك اعاڭ» دەگەن ەستەن كەتپەس تاماشا تىلەگى جازىلعان «ىزدەنىس» جۋرنالى ءالى كۇنگە دەيىن جەكە كىتاپحانامنىڭ تورىنەن ورىن الىپ تۇر، تۇرا دا بەرەدى... اعايدىڭ قولتاڭباسى كۇنى بۇگىنگە دەيىن مەنى قاناتتاندىرادى، شابىتتاندىرادى، جاڭا ىزدەنىستەرگە باستايدى... سول بەرگەن باتاسى بولار اعايدىڭ، ىزدەنىس پەن عىلىم جولىندا قازاق عىلىمىنا از دا بولسا ۇلەس قوسۋ ماقساتىندا شەتەل اسىپ ىزدەنىپ جۇرگەنىمىز...
ورتامىزدا بولعاندا سەرىك اعامىز بيىل سەكسەننىڭ سەڭگىرىنە شىعار ەدى... اتتەڭ، تاعدىردىڭ جازۋىنا نە شارا... ادامگەرشىلىك پەن پاراساتتىڭ بيىگىنەن كورىنگەن سوم تۇلعا، ارداقتى ۇستاز، كورنەكتى عالىم، رۋحاني اكە ەدىڭىز... سەكسەن جاسىڭىزدى شاكىرتتەرىڭىزدىڭ وزدەرى-اق ءدۇبىرلى توي ەتىپ اتاپ وتەر ەدى عوي... جاتقان جەرىڭىز جايلى، توپىراعىڭىز تورقا بولسىن... ءسىز كورە الماي كەتكەن قىزىق-قۋانىشتارىڭىزدى زايدا اپامىز بەن بالا-شاعالارىڭىزعا كورۋگە جازسىن...
ەستەلىكتى ۇلى اباي اتامىزدىڭ سوزىمەن اياقتاعىم كەلەدى... «ءولدى دەۋگە سىيا ما، ايتىڭدارشى، ولمەيتۇعىن ارتىنا ءسوز قالدىرعان»... شىنىمەن دە، سەرىك ماقپىرۇلىنىڭ جارقىن بەينەسى مەن قازاق عىلىمىندا قالدىرعان وشپەس ءىزى شاكىرتتەرى مەن ارىپتەستەرىنىڭ ەستەلىكتەرىندە، جالپى ءسوز قۇدىرەتىن باعالايتىن قالىڭ وقىرماننىڭ ەسىندە ماڭگى ساقتالماق...
اسەل جاكىم،
PhD in Education (University of Aberdeen, UK), فيلولوگيا عىلىمدارىنىڭ كانديداتى، ق.جۇبانوۆ اتىنداعى ءاوۋ پەداگوگيكا جانە ءبىلىم بەرۋدەگى مەنەدجمەنت فاكۋلتەتى اعا وقىتۋشىسى، قازۇپۋ-دىڭ 2004 جىلعى تۇلەگى.
------------------------------------
ءدارىس وقۋدىڭ شەبەرى
2000 جىلى قازاقستاننىڭ تۇكپىر تۇكپىرىنەن اعىلعان جاستارمەن بىرگە قاسيەتتى قارا شاڭىراق، اباي ۋنيۆەرسيتەتىنىڭ ستۋدەنتى اتانۋ ماعان دا بۇيىرعان ەدى. قازاق ءتىلى مەن ادەبيەتى ماماندىعىنا الپىستان اسا ستۋدەنت قابىلداندىق. قازاق فيلولوگياسىندا وقىعان ستۋدەنتتەر ءۇشىن 404-ءشى ءدارىسحانانىڭ ورنى ەرەكشە بولار ءسوزسىز. سەبەبى، ءبىز سياقتى اۋىل بالالارى ءۇشىن تاڭسىق ءدارىس (لەكتسيا), ءدارىسحانا ۇعىمىنىڭ اتا-انالارىمىز، اعا-اپكەلەرىمىز جىر ەتىپ ايتاتىن، ءجۇز ادامنان اسا ستۋدەنت وتىرىپ، اتاقتى پروفەسسورلاردىڭ ءدارىسىن تىڭدايتىن ورىننىڭ قانداي بولاتىنىن ۇقتىرعان العاشقى ءدارىسحانامىز 404 ەدى.
كۇزدىڭ قوڭىرقاي ءبىر كۇنىندە سول ءدارىسحانادا العاشقى بولىپ سەرىك اعاي ماقپىروۆ «ادەبيەتتانۋعا كىرىسپە» ساباعىنان ءدارىس وتكىزدى. اعايدىڭ قويۋ قارا قاسى ەرەكشە ەسىمدە قالىپتى. داۋىسى قانداي ەرەكشە ەدى. سىيىمدىلىعى ۇلكەن ءدارىسحانادا داۋىسى انىق، نىق ەستىلەتىن. تەرەزەگە ۇزاق قاراپ، قالىڭ قاسىن بارىنشا كوتەرىپ، ميىعىنان كۇلىپ قوياتىنى بار ەدى. ... سەسسيانىڭ ۋاقىتى تايادى. اعاي ارنايى ادەبي تالداۋعا داپتەر ارناتىپ، سول داپتەردەگى اقىن-جازۋشىلاردىڭ شىعارمالارىن تالداعان مىسالارىمىزعا قاراي قورىتىندىلاپ جاتتى. بىرىمىزدىكى دۇرىس، بىرىمىزدىكى قاتە، ءبىرىمىزدىڭ ماقپىروۆتىڭ سىنىنان سۇرىنبەي وتكەنىمىز ءۇشىن كوڭىل كۇيىمىز تاماشا بولسا، كوبىمىزدىڭ ۇنجىرعامىز ءتۇسىپ وتىرعان ساتتە اعاي:
- ءاي، نە بولدى سەندەرگە؟ باستارىڭ سالبىراپ كەتىپتى عوي. وندا تىڭداڭدار،- دەپ ايتاتىن ءازىل اڭگىمەسى بار ەدى.
- ءبىر جاس جىگىت،- دەپ باستادى اعاي اڭگىمەسىن. – ۇناتقان قىزىن ارەڭ دەگەندە ساياباقتا سەرۋەندەۋگە الىپ شىققان ەكەن. ستۋدەنتتە قاي ءبىر جەتىسكەن ارتىق قاراجات بولسىن. تىرنەكتەپ جيناعان اقشاسىن قۇددى ءبىر باي-باعلاننىڭ بالاسىنداي قىزعا شاشقان ەكەن سول كۇنى. ساياباقتىڭ ىشىندەگى سول كەزدەگى اتاقتى «جۇلدىز» مەيرامحاناسىنان تاماقتانعان ەكەۋى سىرتقا شىقسا، جاۋىن سەبەلەي باستاپتى. قىز: «تاكسيمەن قايتايىق»،- دەيدى. جىگىت بار تاپقانىن مەيرامحاناعا تولەپ كەتكەن. قىزدىڭ الدىندا اقشام تاۋسىلدى دەپ ايتۋعا جىگىتتىك نامىس جىبەرمەي تۇر. نە دە بولسا دەپ جولدىڭ جيەگىنە قاراي شىعادى. قىزدى شاشىراعان سۋدان قورعاعانسىپ ارقا جاعىنا شىعارادى دا ءوزى تاكسيگە قول كوتەرەدى. بىراق، نەگە ەكەنى بەلگىسىز ماشينالار جاقىنداپ كەلەدى ەكەن دە توقتاماي، ءجۇرىپ كەتەدى ەكەن. سولاي ءبىراز تۇرعان سوڭ «قوي، مىنا تاكسيلەردىڭ توقتايتىن ءتۇرى جوق، ءجۇر جاياۋ جەتكىزىپ سالايىن- دەپ قىزدى ۇيىنە جاياۋ شىعارىپ سالعان ەكەن»،- دەپ اعاي اڭگىمەسىن اياقتادى. سودان ءبىز، -«اعاي، نەگە ماشينالار توقتاماعان؟ الماتى كوشەلەرىندە قول كوتەرسەڭ توقتايدى عوي!؟»،- دەيمىز. اعاي «جىگىت ءبىر قولىمەن ماشينانى توقتاتىپ، ەكىنشى قولىمەن كەتە بەر دەگەن يشارامەن قولىن سەرمەپ تۇرعان ەكەن»،- دەدى. ءبىز دۋ كۇلدىك. جىگىتتەر جاعى «بىلە جۇرەتىن ەكەن»،- دەپ جاتتى...
ر.م. وسكەنباەۆا،
ق.ي. ساتباەۆ اتىنداعى قازۇتزۋ-دىڭ
قاۋىمداستىرىلعان پروفەسسورى
PhD, دوكتور
--------------------------------
ءار ساباعىندا زەرتتەۋ جۇرگىزۋگە تالپىندىرىپ وتىراتىن
«ۇستازىم مەنىڭ ۇستازىم، وزىڭمەن وتكەن قىس، جازىم...» - دەپ باستالاتىن ولەڭ جولدارى ەسكە تۇسە باستاعاندا، سوناۋ ءوزىمنىڭ ەڭ العاش ۋنيۆەرسيتەت تابالدىرىعىن اتتاعان كەزدەگى ۇستازدارىمدى ەرەكشە جىلۋلىقپەن ويىما الامىن. وڭاشا ساتتەردە ءوزىمنىڭ ۇستازدىق ەتكەن شاكىرتتەرىمە قاراپ وتىرسام، مەنى وقىتقان اق جارقىن مىنەزدى، اق جۇرەكتى، جىلى ءجۇزدى ۇستازدارىمنىڭ بەينەسى كورىنىپ، ەرىكسىز نۇرلى ەستەلىكتەرگە جەتەلەي جۇرەدى. 2004 جىلى اباي اتىنداعى قازاق ۇلتتىق ۋنيۆەرسيتەتىنە ءبىرىنشى كۋرسقا وقۋعا كەلدىم. العاشقى كۇنى جۇرەگىم قوبالجىپ،ۋنيۆەرسيتەت تابالدىرىعىن قورقاقتاي اشقانىم ەسىمدە.
ءبىرىنشى ساباعىمىز – «ادەبيەتتانۋعا كىرىسپە».
ۇلكەن ءدارىسحانادا ستۋدەنتتەر كوپتەپ جينالىپ جاتىر. مەن دە كەلىپ الدىڭعى پارتالاردىڭ بىرىنەن ورىن الدىم. ءبىر ۋاقىتتا ساباق باستالدى. دارىسحاناعا اقىرىنداپ باسىپ، سەرىك اعايىمىز كىردى. ءبارىمىز تىپ-تىنىش وتىرمىز، ءارى قاراي نە بولادى ەكەن دەپ. ءبىر ۋاقىتتا اعايىمىز ءوزىن جايلاپ تانىستىرىپ، ءبىزدىڭ تاڭداعان ماماندىعىمىز، ءپانىمىز جايلى ايتا باستاعاندا، ءبىرىنشى كۇننەن باستاپ ءوزىمنىڭ ماماندىق تاڭداۋدان جاڭىلىسپاعانىمدى ءتۇسىندىم. سەرىك اعاي بىردەن ءوزىنىڭ دارىسىندە ادەبيەتتىڭ تەرەڭىنە ءۇڭىلتىپ، ءبىلىم ايدىنىنا ەركىن جۇزۋگە مۇمكىندىك بەردى دەسەم دە بولادى. اعايدىڭ ساباقتى ەرەكشە تۇسىندىرگەنى سونشالىق، ۋاقىتتىڭ وتكەنىن دە بىلمەي قالعان ەدىك. ارى قاراي تاجىريبە ساباقتارىندا، ادەبيەتتىڭ تەرەڭىنە ءۇڭىلىپ، زەرتتەپ، ءار قولدانىلعان سوزدەردى، ادەبيەتتىڭ تروپتارىن جەكە-جەكە تالداۋدىڭ ءوزى وتە كەرەمەت ەدى. ءاربىر ساباعىندا زەرتتەۋ جۇرگىزۋگە ستۋدەنتتى تالپىندىرىپ وتىراتىن ەدى. بىزدەر اعايدىڭ ساباعىنا ەرەكشە دايىندىقپەن كەلۋگە تىرىساتىنبىز. بۇل ارينە اعايدىڭ بىزگە بەرگەن ەرەكشە ءبىلىمى مەن تاربيەسىنىڭ جەمىسى ەدى. سەرىك اعاي وقۋ ۇردىسىندە ستۋدەنتتەرمەن قارىم-قاتىناس ۇيلەسىمدىلىك قۇرعان ۇستاز ەدى. وسى كىسىنىڭ ارقاسىندا العاشقى كۇننەن باستاپ ساباققا قىزىعۋشىلىعىم ويانعان بولاتىن. سەرىك اعاي – ءوز ءىسىنىڭ شەبەرى. سەبەبى بىزگە قيىن كەزەڭدەردە قول ءۇشىن سوزۋدان شارشاعان ەمەس. ول كىسى- التىننان دا باعالى ويلارىن، اقىل-كەڭەسىن بەرۋگە ءاردايىم جان. وقۋ اياقتالعان كەزدە ول كىسى ماعان ءوزىنىڭ باتاسىن بەرىپ، «ىزدەنىس» جۋرنالىن سىيعا تارتقاندا، مەن ءوزىمدى وسى ماماندىقتى بارىنشا جوعارى دەڭگەيدە الىپ جۇرۋگە، اعايدىڭ ماعان دەگەن سەنىمىن اقتاۋعا ىشتەي وزىمە-ءوزىم سەرت بەردىم.
اعايدىڭ سول كەزدەگى ماعان ارتقان سەنىمىنىڭ ناتيجەسىندە، بۇگىندە مەن ءوزىم دە وقىتۋشىلىق جولدى جالعاستىرىپ، ول كىسىنىڭ ۇيرەتكەن اقىلى مەن ءبىلىمىن تاجىريبەمدە قولدانىپ كەلەمىن. مەن دە سەرىك اعاي سياقتى شاكىرت تاربيەلەۋدە ءاربىر ستۋدەنتتىڭ جۇرەگىنەن ورىن تابا الۋعا، ادەبيەت الەمىنە سۇيىسپەنشىلىگىن وياتۋعا ات سالىسىپ ءجۇرمىن.
ءسوزىمدى قورىتىندىلاي كەلە، اعايدىڭ وسىنداي دارا قاسيەتتەرى ارقاسىندا ول كىسىنىڭ تاربيەلەنگەن ستۋدەنتتەرى قازاقستاننىڭ تۇپكىر تۇپكىرىندە ەڭبەك ەتۋدە. ولاردىڭ دا اعايدىڭ كورسەتكەن سارا جولدارىن، ءوز ومىرلەرىندە، تاجريبەلەرىندە قولدانىپ جاتقانىنا مەن كامىل سەنەمىن. سەبەبى شاكىرتتىڭ ءوزى سۇيگەن، جىلدار بويى ءتالىم العان ۇستازىنىڭ اياۋلى بەينەسى كوكىرەك كورىگىندە، جۇرەك تۇبىندە ساقتالۋى زاڭدىلىق. ۇستاز- بالانى ادام قىلىپ تاربيەلەپ، كۇلىمدەگەن، كۇنىم دەگەن، سەنىڭ جۇرەگىڭە بولاشاققا ماقسات قويا بىلۋگە سەنىم ۇيالاتقان زور تۇلعا. مىنە، ءبىزدىڭ سەرىك اعايىمىزدا وسىنداي زور تۇلعا ەدى.
اسەم دۇمشەباەۆا،
ديدجيتال كوللەدجىنىڭ
(بۇرىنعى اتاۋى قاۋ جانىنداعى الماتى بايلانىس كوللەدجى)
قازاق ءتىلى مەن ادەبيەتى ءپانىنىڭ
جوعارى ساناتتى وقىتۋشىسى،
پەداگوگيكا عىلىمىنىڭ ماگيسترى.
اباي اتىنداعى قازۇپۋ 2004 جىلعى تۇلەگى
-----------------------------------------------------------------------------------------
«عالىمنىڭ حاتى ولمەيدى، جاقسىنىڭ اتى ولمەيدى»
«عالىمنىڭ حاتى ولمەيدى، جاقسىنىڭ اتى ولمەيدى»... سەرىك اعاي جايلى ەستەلىك جازبانى ءدال وسى سوزبەن باستاعىم كەلەدى. بۇگىندە ءوزىم باسقا سالادا جۇمىس ىستەسەم دە، اعاي جايلى بىرەر ءسوز جازعاندى ءجون كوردىم. اعاي ادامگەرشىلىگى مەن مەيىرىمدىلىگىمەن ءار شاكىرتىن باۋراپ الاتىن ۇلاعاتتى ۇستاز بولۋمەن بىرگە، ادەبيەتتى جان-جاقتى زەرتتەگەن عالىم. اعاي ءدارىسىن بايىپپەن اسىقپاي وقي وتىرىپ، قاي ستۋدەنت نە ىستەپ وتىراتىنىن بايقاپ قوياتىن. سونداي-اق ستۋدەنتتەرىنە جەكىپ ۇرىسپايتىن، كەرىسىنشە ەركەلەتە وتىرىپ ۇيالتىپ الاتىن. ءبىز قۇربىم اسەل ەكەۋىمىز ءاردايىم اعايدىڭ الدىندا ءبىرىنشى پارتادا وتىراتىنبىز. بىردە ساباققا دۇرىس دايىندالماي كەلگەن ەدىم... كونسپەكتىلەرىمدى تەز قاراپ شىعايىن دەپ جانتالاسىپ وتىرسام، اعاي: «ليريكا تۋرالى ليرا ايتىپ باستاسىن»، -دەپ مەنى تۇرعىزعانى بار ما؟ سودان ايتەۋىر ارىدەن باستاپ، بىلگەنىمدى ايتىپ جاتىرمىن، اعاي اراسىندا ماعان قوسىلىپ، ءوزى ءتۇسىندىرىپ تە قويادى (دۇرىس دايىندالماعانىمدى ءتۇسىنىپ تۇرعانى انىق), ءسويتىپ اعاي ەكەۋىمىز بىرگە ساباق ايتىپ شىققان بولاتىنبىز. سودان بىرازعا دەيىن اعايدان ۇيالىپ ءجۇردىم... بىراق اعاي، «دايىندىعىڭ ناشار»، «نەگە دايىندالمادىڭ؟»،- دەپ ەش ەسكەرتۋ جاسامادى. وسىدان كەيىن اعايمىزدىڭ «تەستى، ستۋدەنتتىڭ ءتىلىن كەستى» دەگەن ءسوزىن بار شاكىرتى بىلەتىن شىعار. سەرىك اعاي شىن مانىسىندە، انا ءتىلىمىزدىڭ ۇلكەن جاناشىرى ەدى. ارقاشان ادەمى، كوركەم سويلەۋگە شاقىراتىن. جالپى اعاي ءبىلىم نارىمەن سۋسىنداتىپ قانا قويماي، شاكىرتتەرىنە ۇلتتىق ءتالىم-تاربيە بەرىپ، ۇستامدىلىق پەن مەيىرىمدىلىككە، تۇلعا رەتىندە قالىپتاسۋىنا باعىت-باعدار بەرەتىن ەرەكشە جان ەدى. اعايىمىزدىڭ جىلۋلىققا تولى مەيىرىمدى ءجۇزى ماڭگى ەسىمىزدە.
ليرا راحىمبەرليەۆا،
"Jusan bank" اق اۋدارما باسقارماسى، باس مەنەدجەر
--------------------------------
سەرىك اعا دارا ماعان!
ۇستازىم سەرىك ماقپىرۇلىنا ارناۋ
بالا ەدىك اتتانعان ستۋدەنتتىك ومىرگە،
الىپ ۇشقان قۇلشىنىس بار بىلىمگە.
قارا شاڭىراق اباي دانا تورىنە...
كىرىپ كەلدىك ەش ۋايىم جوق كوڭىلدە.
كوڭىلىم بار ءالى دە ماسايراعان،
ءبىلىم وردام ءالى كۇنگە اسىل ماعان.
ۇستاز كوردىم...دوس تا تاپتىم ارداقتى،
بالا شاقتىڭ البىرتتىعى باسىلماعان.
عالىمدىق جولىمەنەن دارالانعان،
اسقار تاۋداي سەرىك اعاي دارا ماعان.
ۇستاز-عۇمىر...ءومىرى ونەگە بوپ،
ءار شاكىرتتىڭ جۇرەگىمەن باعالانعان.
بويىندا بار تەكتىلىك پەن بىلىكتىلىك،
ءبىلىم بەردى بارىمىزگە ءتۇرىپ بىلەك.
ءور تۇلعالى اعايدىڭ ونەگەسىن،
اقتارادى جىر قىلىپ ءاربىر تۇلەك.
ءجۇرۋشى ەدى...بىزدەرمەن جارقىن كۇلىپ،
ءسوزىمىزدى قالجىڭمەن تۇرلەندىرىپ.
سۇرىنگەندى-سوزىمەن، اداسقاندى-اقىلمەن،
تۇرعىزاتىن ورنىنان جىگەر بەرىپ.
ءار قازاقتىڭ بالاسىن قامشىلاعان.
جاقىن ءجۇردى جانىمىزدا، جاسىن ادام،
ءبىلىم بەرگەن ۇرپاعىڭنىڭ جۇرەگىندە،
ماڭگى بەينەڭ قالادى اسىل ادام!
ج.مامراەۆا،
جەتىسۋ وبلىسى،سارقان اۋدانى، سارقان قالاسى "ى.التىنسارين اتىنداعى ورتا مەكتەبى" كمم-ءنىڭ قازاق ءتىلى مەن ادەبيەت ءپانىنىڭ مۇعالىمى
