ۇكىمەت باسشىسى ولجاس بەكتەنوۆ قۇلسارىعا باردى، دەپ حابارلايدى "ادىرنا" ءتىلشىسى.
مەملەكەت باسشىسىنىڭ تاپسىرماسى بويىنشا پرەمەر-مينيستر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ جەتەكشىسى ولجاس بەكتەنوۆ قۇلسارىنىڭ جاعدايىمەن تانىستى.
پرەمەر اۋماقتى تىكۇشاقپەن ارالاپ، وزەن جاعالاۋلارىن نىعايتۋ جۇمىستارىنىڭ بارىسىن قارادى.
"ولجاس بەكتەنوۆ قۇلسارى قالاسىنىڭ تۇرعىندارىمەن سويلەسىپ، ولاردىڭ قابىلدانىپ جاتقان شارالاردى كۇشەيتۋ بويىنشا سۇراقتارىنا جاۋاپ بەردى. سونداي-اق جايىق جانە جەم وزەندەرىندەگى جاعدايمەن تانىستى", - دەلىنگەن حابارلامادا.
جىلىوي جانە قىزىلقوعا اۋداندارىندا توتەنشە جاعداي رەجيمى ساقتالىپ وتىر.
قازىر قىزىلقوعا اۋدانىنداعى ميالى، اققورا، جانگەلدين، جاسقايرات جانە كوزدىقارا اۋىلدارىندا قاۋىپ-قاتەر سەيىلگەن. الايدا اقتوبە وبلىسى ويىل اۋدانى جاعىنان جەم وزەنى دەڭگەيىنىڭ كوتەرىلۋىنە بايلانىستى جىلىوي اۋدانى قۇلسارى قالاسىن سۋ باسقان.
