قارجى مونيتورينگى اگەنتتىگى قازاقستاننىڭ ءۇش وڭىرىندە سەلدەن قورعايتىن بوگەتتەر مەن سۋ قويمالارىن سالۋ جانە ءتيىستى جوندەۋ، وزەن ارنالارىن كەڭەيتۋ جۇمىستارىن جۇرگىزۋگە ءتيىس مەردىگەرلەرگە قاتىستى سوتقا دەيىنگى تەرگەۋ امالدارىن باستادى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
الماتىدا تجم "قازسەلدەنقورعاۋ" مم-مەن كەلىسىمشارتقا وتىرعان مەردىگەر ۇيىمنىڭ ديرەكتورى بيۋدجەت قاراجاتىن جىمقىرۋ دەرەگى بويىنشا كۇدىككە ءىلىندى.
"جشس "اقساي وزەنىنىڭ باسسەينىندە سەلدى ۇستايتىن بوگەت سالۋ" جوباسىن جۇزەگە اسىرعان. جشس-نىڭ جاۋاپتى تۇلعالارى الدىن الا ءسوز بايلاسۋ ارقىلى اسا ءىرى كولەمدە بيۋدجەت قاراجاتىن جىمقىردى دەگەن كۇدىككە ءىلىندى. زالال سوماسى الدىن الا ەسەپ بويىنشا 775 ملن تەڭگەدەن اسادى", - دەدى قر قارجىلىق مونيتورينگ اگەنتتىگىنىڭ رەسمي وكىلى الىبەك ءابدىلوۆ وكق الاڭىندا وتكەن بريفينگتە.
ال اقتوبە وبلىسىندا اۋىر زارداپتارعا اكەپ سوققان مىندەتتەرگە نەمقۇرايلى قاراۋ فاكتىسى بويىنشا "ماگادجان" بوگەتىن (سۋ قويماسىن) سەنىمگەرلىك باسقارۋعا العان جشس باسشىسىنا قاتىستى سوتقا دەيىنگى تەرگەۋ باستالدى.
"انىقتالعانداي، 2014 جىلى بۇل بوگەت بالىق شارۋاشىلىعىن جۇرگىزۋ ماقساتىندا جەكە كومپانياعا سەنىمگەرلىك باسقارۋعا بەرىلگەن. الايدا جشس بوگەتتى كۇتىپ ۇستاۋ جانە قىزمەت كورسەتۋ بويىنشا ءوز مىندەتتەرىن ورىنداماعان", - دەدى سپيكەر.
سونداي-اق، ۇلىتاۋ وبلىسىندا دا جشس لاۋازىمدى تۇلعالارىنا قاتىستى سوتقا دەيىنگى تەرگەپ-تەكسەرۋ باستالدى. اتالعان جشس كوكتەمگى سۋ تاسقىنى كەزىندە جاقىن ماڭداعى اۋماقتاردى شايىلىپ كەتۋدەن قورعاۋ ءۇشىن ۇزىندىعى 2 شاقىرىم جەزدى وزەنىنە ساناتسيا جۇرگىزۋ ءۇشىن جالپى سوماسى 485,5 ملن تەڭگەگە مەملەكەتتىك مەكەمەمەن شارت جاساسقان.
الايدا جوبانى ىسكە اسىرۋدىڭ باقىلاۋ ولشەمىمەن مەردىگەر جالپى سوماسى 282,5 ملن تەڭگەگە جوبا بويىنشا قۇرىلىس-مونتاجداۋ جۇمىستارىن ناقتى ورىنداماعانى انىقتالدى. سول كەزدە جشس اتىنا ورىندالعان جۇمىستار اكتىلەرىنە سايكەس 400 ملن تەڭگە اۋدارىلعان. سالدارىنان 26 ءۇي سۋ استىندا قالىپ، 174 ادام ەۆاكۋاتسيالاندى. سوتقا دەيىنگى تەرگەۋ امالدارى جالعاسۋدا.
