سۋ قويماسىندا كيىكتەر جاپپاي قىرىلىپ قالعانى تۋرالى مالىمەت تارادى، دەپ حابارلايدى "ادىرنا" ءتىلشىسى "ۋرالسكايا نەدەليا" باسىلىمىنا سىلتەمە جاساپ.
13 ساۋىردە باتىس قازاقستان وبلىسىنداعى بوكەي ورداسى اۋدانىنىڭ مۇراتساي اۋىلىنىڭ تۇرعىندارى كيىكتەردىڭ قىرىلعانى تۋرالى حابارلاعان. الدىن الا دەرەكتەر بويىنشا ەكى مىڭعا جۋىق كيىك قىرىلعان.
كيىك قىرىلعان جەرگە "وحوتزووپروم" رمك قىزمەتكەرلەرى كەلگەن. ولار جانۋارلاردىڭ ولەكسەلەرىن شىعارىپ، جويۋمەن اينالىساتىن بولادى.
كيىك قىرعىنىنا بايلانىستى ساراپشىلار ءتۇرلى بولجام جاساۋدا. قىستان كەيىن قاتتى السىرەگەن اقبوكەندەردىڭ ءبىر بولىگى جاعاعا شىعا الماي، سۋعا باتىپ كەتتى دەپ بولجانۋدا. تاعى ءبىر مالىمەت بويىنشا كيىكتەر ءتۇسىرىلىم جاسالعان درونداردان شوشىپ، سۋ قويما ارقىلى وتپەك بولعان كەزدە باتىپ كەتكەن بولۋى مۇمكىن.
جۋرناليست لۇقپان احمەدياروۆ كيىك قىرعىنىنا قاتىستى جازبا جاريالادى.
«باتىس قازاقستان وبلىسىنىڭ بوكەي ورداسى اۋدانىنداعى سۋ تاسقىنىنان كەيىن بۇكىل دالا ولگەن كيىكتەردىڭ ولەكسەسىنە تولىپ قالدى. ەستەرىڭىزگە سالا كەتەيىن، وتكەن جىلى قازاقستان بيلىگى بۇل بوكەندەردى اتۋعا رۇقسات بەرگەن بولاتىن. ولگەن جانۋارلاردىڭ كوبى - بۋاز انالىقتار»، - دەپ جازدى Instagram پاراقشاسىندا.
