ەلىمىزدە 26 مىڭنان استام پەداگوگ پەن ءبىلىم بەرۋ سالاسىنىڭ قىزمەتكەرلەرى سۋ تاسقىنىمەن كۇرەسكە جۇمىلدىرىلۋدا، دەپ حابارلايدى "ادىرنا” ءتىلشىسى.
بۇل تۋرالى وقۋ-اعارتۋ مينيسترلىگىنىڭ رەسمي وكىلى مالىمدەدى.
«وقۋ-اعارتۋ مينيسترلىگى وڭىرلەردە وقۋ پروتسەسىن ۇيىمداستىرۋ جۇمىستارىن جالعاستىرۋدا. مينيسترلىك وكىلدەرى اتىراۋ، قوستاناي، اقمولا، ماڭعىستاۋ جانە اباي وبلىستارىنىڭ جاعدايىمەن بارىپ تانىستى. سۋ تاسقىنى باستالعان ۋاقىتتان 4 739 بالا ساۋىقتىرۋ ورتالىقتارىنا، كوللەدجدەر مەن جوعارى وقۋ ورىندارىنىڭ جاتاقحانالارىنا جانە يننوۆاتسيالىق مەكتەپ-ليتسەي ينتەرناتتارىنا ورنالاستىرىلدى. سونداي-اق بالالار مەن اتا-انالار ءۇشىن قوسىمشا 8 مىڭعا جۋىق ورىن ازىرلەندى. وقۋشىلار قاجەتتى وقۋ قۇرالدارىمەن، كيىممەن جانە تاماقتانۋمەن قامتىلۋدا»، - دەدى مينيسترلىك وكىلى مەرەكە امانگەلدىقىزى ورتالىق كوممۋنيكاتسيالار قىزمەتىندەگى بريفينگتە.
بۇگىندە سۋ تاسقىنىنان زارداپ شەككەن وڭىرلەردە ساپالى ءبىلىم بەرۋدى ۇيىمداستىرۋ ءۇشىن جوعارى جىلدامدىقتاعى ينتەرنەت تارتىلعانى ايتىلدى. توپان سۋ باسقان قوستاناي، اقتوبە، ۇلىتاۋ جانە شىعىس قازاقستان وبلىستارى بويىنشا 13 مەكتەپ Starlink جەلىسىنە قوسىلدى.
«26 مىڭنان استام پەداگوگتەر مەن ءبىلىم بەرۋ سالاسىنىڭ قىزمەتكەرلەرى سۋ تاسقىنىنا قارسى شارالارعا، ونىڭ ىشىندە جاعالاۋدى بەكىتۋ جۇمىستارىنا قاتىسۋدا. 400-گە جۋىق مەكتەپ پسيحولوگى ەۆاكۋاتسيالىق پۋنكتتەردەگى بالالار مەن ازاماتتارعا پسيحولوگيالىق كومەك كورسەتۋدە. ودان بولەك مينيسترلىكتىڭ باعىنىستى ۇيىمدارى مەن اۋماقتىق دەپارتامەنتەرىنىڭ 300-دەن استام قىزمەتكەرى بالالاردىڭ وقۋ پروتسەسى مەن ساپالى دەمالىسىن ۇيىمداستىرۋدا»، - دەدى مينيسترلىكتىڭ رەسمي وكىلى.
