ايەلىن ءولتىردى دەگەن كۇدىككە ىلىنگەن بۇرىنعى ۇلتتىق ەكونوميكا ءمينيسترى قۋاندىق بيشىمباەۆ بۇعان دەيىن كولىكتى ماس كۇيىندە باسقارعانىن سوتتا مويىنداعانىمەن جۇرگىزۋشى كۋالىگىنەن ايىرىلمايدى. بۇل تۋرالى ىشكى ىستەر مينيسترلىگى مالىمدەدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
رەداكتسيانىڭ رەسمي ساۋالىنا بەرگەن جاۋابىندا ايتىلعانداي، بيشىمباەۆقا قاتىستى الكوگولدىك، ناشاقورلىق نەمەسە وزگە ساراپتاما جۇرگىزىلمەگەن. سونداي-اق ىشكى ىستەر مينيسترلىگى اقبتك-ءنىڭ (اقبتك) 608-بابىندا كوزدەلگەن قۇقىق بۇزۋشىلىقتىڭ كۆاليفيكاتسيالىق بەلگىسىنىڭ قۇرامداس بولىگىنە كولىك قۇرالىن ماس كۇيىندە باسقارۋ كىرەتىنىن ەسكە سالدى.
«مەديتسينالىق كۋالاندىرۋدىڭ رەسمي قورىتىندىسى بولماعاندىقتان جانە اقبتك-ءنىڭ 608-بابىندا كوزدەلگەن قۇقىق بۇزۋشىلىق تۋرالى، سونداي-اق جاۋاپكەرشىلىككە تارتۋدىڭ ەسكىرۋ مەرزىمى وتكەندىگىن ەسكەرە وتىرىپ (اقبتك-ءنىڭ 62-بابى) ازاماتتى اتالعان باپ بويىنشا اكىمشىلىك جاۋاپكەرشىلىككە تارتۋعا بولمايدى»، - دەپ حابارلادى ءىىم.
ەسكە سالايىق، 4 ساۋىردە سوتتا جابىرلەنۋشىنىڭ ادۆوكاتى جاننا ۋرازباحوۆانىڭ سۇراقتارىنا جاۋاپ بەرگەن بيشىمباەۆ قاراشانىڭ 8-ىنەن 9-ىنا قاراعان ءتۇنى ونىڭ «ورتاشا دەڭگەيدەن ءسال جوعارى» الكوگولدىك ماس كۇيىندە بولعانىن، بۇل وعان كولىك تىزگىنىن باسقارۋعا كەدەرگى جاساماعانىن ايتقان ەدى.
«دەمەك، ءسىز ماس كۇيدە كولىك جۇرگىزدىڭىز عوي، مەن ءسىزدى دۇرىس ءتۇسىنىپ تۇرمىن با؟» – دەپ سۇرادى ۋرازباحوۆا.
«ءيا، ءسوزسىز تۇسىنىكتى»، - دەپ جاۋاپ بەردى بيشىمباەۆ.
