قازتالوۆ اۋدانىندا 23 ءساۋىر كۇنى اۋدان اكىمى اسلانبەك سارقۇلوۆتىڭ توراعالىعىمەن اۋدان تۇرعىندارىن تۇرعىن ۇيمەن قامتاماسىز ەتۋ ماقساتىندا جيىن ءوتتى.
بيىل ءۇي كەزەگىندە تۇرعان ازاماتتاردى جانە «قالادان-اۋىلعا» باعدارلاماسىنا نيەت بىلدىرگەن وتباسىلاردى تۇرعىن ۇيمەن قامتاماسىز ەتۋ ماقساتىندا اۋدانىمىزدا 115 باسپانا سالىنۋدا. ونىڭ ىشىندە 27 ەلدى مەكەندە جاڭا باسپانا سالىنادى.
اۋدان تۇرعىندارىن جانە جاس مامانداردى تۇرعىن ۇيمەن قامتاماسىز ەتۋ ءۇشىن بىلتىرعى جىلى 22 تۇرعىن ءۇي ساتىپ الىنىپ، سونىڭ ىشىندە 4 تۇرعىن ءۇي جاڭادان سالىندى. سونىمەن قاتار جىل باسىندا اۋدان ورتالىعىنا كەلگەن 6 دارىگەر جاڭا تۇرعىن ۇيمەن قامتاماسىز ەتىلدى. بۇگىنگى تاڭدا اۋدان بويىنشا 511 ازامات ءۇي كەزەگىندە تۇر. اتالعان جوباعا اۋدانداعى جەكە تۇلعالار، كاسىپكەرلەر، شارۋا قوجالىق جەتەكشىلەرى نيەت ءبىلدىرىپ وتىر. بۇگىندە كازتالوۆ اۋىلىندا رۋسلان راحمەتوۆ قوس پاتەرلى تۇرعىن ءۇي سالۋدا.
وڭىرىمىزدە وبلىس اكىمى ناريمان تورەعاليۇلىنىڭ باستاماسىمەن «قالادان-اۋىلعا» جوباسى جۇزەگە اسۋدا. جوبا اياسىندا اۋدانىمىزدىڭ 8 ەلدى مەكەنىنە 16 وتباسىن كوشىرىپ اكەلۋ جوسپارلانىپ وتىر. جىل باسىندا جوبا اياسىندا اۋدان اكىمدىگىنىڭ قولداۋىمەن ورال قالاسىنىڭ تۇرعىندارى سيسەنوۆتار وتباسى بولاشاق اۋىلدىق وكرۋگىنىڭ جاڭاتاڭ ەلدى مەكەنىنە كوشىرىلىپ، باسپانامەن، تۇراقتى جۇمىسپەن قامتىلدى.
اۋدان اكىمى وكرۋگ اكىمدەرى مەن ءبولىم باسشىلارىنا اتالعان جوبالار اياسىندا سالىناتىن باسپانالاردىڭ مەردىگەرلەرىن ناقتىلاپ، قۇرىلىس جۇمىستارىنىڭ قارقىنىن ارتتىرۋدى تاپسىردى. سونىمەن قاتار تۇرعىن ۇيلەردىڭ بەكىتىلگەن تالاپقا ساي بولۋىن، ساپاسىنا ءمان بەرۋىن ەسكەرتتى.
