22 مامىر كۇنى، تۇندە اتىراۋ وبلىسى جالعانساي اۋىلىندا بوگەت جارىلدى. 200-دەن استام تۇرعىن كورشى اۋىلعا شۇعىل ەۆاكۋاتسيالاندى، - دەپ حابارلايدى “ادىرنا” ۇلتتىق پورتالى اتىراۋ وبلىسى تجد جەدەل ارەكەت ەتۋ ورتالىعىنا سىلتەمە جاساپ.
22 مامىر كۇنى ساعات 23:41-دە اتىراۋ وبلىسى، ماحامبەت اۋدانى، جالعانسايعا كىرە بەرىستە بوگەت بۇزىلدى. اۋىلداعى سۋ دەڭگەيى كۇرت كوتەرىلە باستادى. وقيعا ورنىنا دەرەۋ اۋدانداعى كەزەكشى توتەنشە جاعدايلار قىزمەتىنىڭ كۇشتەرى جۇمىلدىرىلدى. توتەنشە جاعدايدى جويۋعا 35 بىرلىك تەحنيكا مەن 50 ادام جەتتى.
ءتۇن ورتاسىنان كەيىن سۋ باسۋ قاۋپى بار ايماقتاردان تۇرعىنداردى كوشىرۋ باستالدى. تۇرعىندار كورشىلەس ماحامبەت اۋىلىنداعى د.تولەنوۆ جانە ە.اعەلەۋوۆ اتىنداعى ورتا مەكتەپتەرگە كوشىرىلدى. ەۆاكۋاتسيا پۋنكتىنە بارلىعى 200-دەن استام تۇرعىن ورنالاستىرىلدى.
قازىر قۇتقارۋشىلار، قورعانىس مينيسترلىگىنىڭ اسكەري قىزمەتكەرلەرى جانە جەرگىلىكتى بيلىك وكىلدەرى بۇزىلعان بوگەتتى قالپىنا كەلتىرۋدە. جاعدايدى تۇراقتاندىرۋ ءۇشىن وبلىس ورتالىعىنان قوسىمشا كۇشتەر مەن رەسۋرستار سۇرالدى. وبلىس اكىمى توتەنشە جاعداي ورنىندا. 23 مامىردا تاڭعى ساعات 4:20-دا بوگەت قالپىنا كەلتىرىلدى. جۇمىسقا 842 ادام مەن 84 تەحنيكا جۇمىلدىرىلدى.
تۇرعىن ۇيلەر مەن نىسانداردى سۋ باسقان جوق. زارداپ شەككەندەر جوق. ەلەكتر جەلىسى ۇزىلمەگەن. قازىرگى ۋاقىتتا قالىپقا كەلتىرىلگەن بوگەتتى قوسىمشا نىعايتۋ جۇمىستارى جۇرگىزىلۋدە.
جالعانساي اۋىلىندا ساعات 08:00-دە جاعداي تۇراقتى، قاۋىپتىڭ جويىلۋىنا بايلانىستى د.تولەنوۆ اتىنداعى ورتا مەكتەپتە بولعان جالعانساي اۋىلىنىڭ 143 تۇرعىنى ۇيلەرىنە ورالدى.
