اتىراۋ قالاسىنىڭ ءۇش جاسار تۇرعىنى دىنمۇحاممەد جۇماجان مەملەكەت باسشىسىنىڭ العىسىنا يە بولدى، دەپ حابارلايدى “ادىرنا” ۇلتتىق پورتالى.
وبلىس اكىمى سەرىك شاپكەنوۆ ءبۇلدىرشىن مەن ونىڭ اتا-اناسىمەن كەزدەسىپ، قر پرەزيدەنتى اكىمشىلىگىنىڭ جەتەكشىسى ايبەك دادەبايدىڭ پرەزيدەنت اتىنان جولداعان حاتىن تابىستادى.
دىنمۇحاممەدتىڭ قالاداعى ورازا ايت مەرەكەسىنەن كەيىنگى تازالىق جۇمىستارىنا بەلسەنە قاتىسقانى تۋرالى ۆيدەو الەۋمەتتىك جەلىدە كەڭ تاراعان بولاتىن. بۇل ارەكەتى ارقىلى ول كوپشىلىكتىڭ ىقىلاسىنا بولەندى.
اكەسى ەرجان حايروشەۆتىڭ ايتۋىنشا، ۇلىنىڭ بۇل ارەكەتى وتباسىندا تازالىق پەن تارتىپكە ءمان بەرۋدىڭ ناتيجەسى. “مەن ءوز ۇلىمنىڭ ەلدىڭ پاتريوتى بولىپ ەر جەتكەنىن قالايمىن”، – دەيدى ول.
وبلىس اكىمى سەرىك شاپكەنوۆ دىنمۇحاممەدتىڭ تاربيەسى مەن قورشاعان ورتاعا دەگەن سۇيىسپەنشىلىگىنە ريزاشىلىعىن ءبىلدىرىپ، ونىڭ ارەكەتى “تازا قازاقستان” باستاماسىنىڭ ءمانىن ايقىندايتىنىن اتاپ ءوتتى.
كەزدەسۋ بارىسىندا دىنمۇحاممەدكە ەستەلىك سىيلىقتار تابىستالىپ، اتا-اناسىنا العىس ايتىلدى.
ۇقساس جاڭالىقتار
