سۋ تاسقىنى كەزىندە 10 جاستاعى بالا كۆادروتسيكلمەن قۇم تاسىعان. ناتيجەسىندە بالانىڭ اتا-اناسى اكىمشىلىك جاۋاپكەرشىلىككە تارتىلىپ، 200 مىڭ تەڭگەگە جۋىق ايىپپۇل ارقالادى، دەپ حابارلايدى "ادىرنا" ۇلتتىق پورتالى.
وقيعا تەپليچنوە اۋىلىندا تىركەلگەن. الەۋمەتتىك جەلىلەردە تاراعان پاتريوتتىق سيپاتتاعى بەينەجازبادا جاس بالا قۇم سالىنعان قاپتاردى كۆادروتسيكلمەن تاسىپ، ەرەسەكتەرگە كومەكتەسىپ جۇرگەنى كورسەتىلگەن. ۆيدەو كوپشىلىكتىڭ قىزىعۋشىلىعىن تۋدىرىپ، ەكى ءتۇرلى پىكىر تۋعىزدى. ءبىرى بالانىڭ بەلسەندىلىگىنە ريزا بولسا، ەندى ءبىرى اتا-انانىڭ جاۋاپكەرشىلىگىن سىنعا الدى.
اتالعان ۆيدەودا بەينەلەنگەن ساتتە وڭىردە سۋ تاسقىنىنىڭ ءۇشىنشى تولقىنى شارىقتاۋ شەگىنە جەتىپ، بوگەت ماڭى قاۋىپتى ايماق سانالعان بولاتىن.
بۇل جايتقا قۇقىق قورعاۋ ورگاندارى دا نازار اۋداردى. سقو پوليتسيا دەپارتامەنتىنىڭ مالىمەتىنشە، 34 جاستاعى اۋىل تۇرعىنى قر اقبتك 612-بابىنىڭ 5-بولىگى بويىنشا اكىمشىلىك جاۋاپكەرشىلىككە تارتىلعان.
"26 ءساۋىر كۇنى تەپليچنوە اۋىلىندا بوگەتتى بەكىتۋ جۇمىستارى كەزىندە ەر ادام 10 جاسار ۇلىنا كۆادروتسيكل تىزگىنىن بەرگەن. بۇل ءۇشىن وعان 50 اەك كولەمىندە، ياعني شامامەن 200 مىڭ تەڭگە ايىپپۇل سالىندى", – دەلىنگەن پوليتسيا حابارلاماسىندا.ءتارتىپ ساقشىلارى اتا-انالاردى توتەنشە جاعداي كەزىندە بالالاردىڭ قاۋىپسىزدىگىنە ەرەكشە ءمان بەرۋگە شاقىردى.
"اسىرەسە توتەنشە جاعداي كەزىندە قاۋىپسىزدىك تالاپتارىن ساقتاۋ ماڭىزدى. بالالاردىڭ ءومىرى مەن بارلىق قاتىسۋشىلاردىڭ قاۋىپسىزدىگى – باستى نازاردا", – دەپ مالىمدەدى پوليتسيا وكىلدەرى.
ۇقساس جاڭالىقتار
