بيىلعى وقۋ جىلىنىڭ سوڭعى قوڭىراۋى 23 نەمەسە 24 مامىر كۇنى سوعىلادى. بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى جاريالادى، دەپ حابارلايدى ”ادىرنا” ۇلتتىق پورتالى.
«بيىلعى وقۋ جىلىنىڭ رەسمي اياقتالۋى جەكسەنبى كۇنىمەن سايكەس كەلگەندىكتەن، 11-سىنىپ تۇلەكتەرى ءۇشىن سالتاناتتى شارا مەكتەپ اكىمشىلىگىنىڭ شەشىمىمەن 23-ءشى نەمەسە 24-ءشى مامىردا وتكىزىلەدى»، – دەلىنگەن ءباسپاسوز حابارلاماسىندا.
بارلىق مەكتەپتەر ءۇشىن سوڭعى وقۋ كۇنى رەتىندە 23 مامىر بەكىتىلگەن. بۇل كۇنى ەل مەكتەپتەرىندە «ءبىلىمىم — وتانىما» تاقىرىبىندا بىرىڭعاي سىنىپ ساعاتى وتكىزىلەدى. اشىق ساباق بارىسىندا وقۋشىلار مەن ۇستازدار وقۋ جىلىن قورىتىندىلاپ،
ەڭ ماڭىزدى ءارى قىزىقتى ساتتەردى بىرگە ەسكە الادى.
«بىرىڭعاي سىنىپ ساعاتى وقۋشىلاردىڭ بويىندا بىلىمگە ۇمتىلىس، پاتريوتيزم جانە ەڭبەكقورلىق سياقتى قاسيەتتەردى قالىپتاستىرۋعا باعىتتالعان»، – دەپ حابارلايدى مينيسترلىك.
مينيسترلىك مالىمەتىنشە، 34 اپتاعا سوزىلاتىن وقۋ جىلىن بۇكىل ەل بويىنشا بيىل 3,9 ملن استام وقۋشى اياقتايدى. ال مەكتەپتى اياقتايتىن تۇلەك سانى 217 مىڭ.
وسى ورايدا مينيسترلىك مەكتەپ فورماتىنان تىس، ءسان-سالتاناتتى ءىس-شارالار ۇيىمداستىرۋعا، اقشا جيناۋعا، اۆتوكولىكپەن شەرۋگە شىعۋعا جانە باسقا دا مەرەكەلەۋ شارالارىن ۇيىمداستىرۋعا جول بەرىلمەيتىنىن ەسكەرتەدى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز