جاڭاارقا اۋداندىق اۋرۋحاناسىندا سوقىرىشەك دياگنوزىمەن جەدەل تۇردە جەتكىزىلگەن ءتورت بالانىڭ اناسى، پوليتسيا كاپيتانى گۇلنۇر جۋانىشباەۆا وتادان كەيىن كوز جۇمدى، دەپ حابارلايدى “ادىرنا” ۇلتتىق پورتالى Azattyq Rýhy-نا سىلتەمە جاساپ.
مارقۇمنىڭ تۋىستارى ونىڭ ولىمىنە مەديتسينا قىزمەتكەرلەرىنىڭ نەمقۇرايلىعى سەبەپ بولعانىن العا تارتىپ، ءدارى-دالەلدەرىن جيناپ، كىنالىلەردىڭ جازالانۋىن تالاپ ەتۋدە. جۋانىشباەۆا 20 ساۋىردە «جەدەل گانگرەنوزدى اپپەنديتسيت» دياگنوزىمەن اۋرۋحاناعا ءتۇسىپ، وتا كەزىندە انافيلاكسيالىق شوك الىپ، كلينيكالىق ءولىم جاعدايىنا تۇسكەن. دارىگەرلەر جۇرەك سوعىسىن قالپىنا كەلتىرگەنىمەن، 27 ساۋىردە ناۋقاس كومادان شىقپاي قايتىس بولدى.
تۋىستارىنىڭ ايتۋىنشا، وعان پايدالانىلعان دارىلەر دۇرىس جاعدايدا ساقتالماعان. پرەپاراتتار بىرنەشە كۇن بويى كىرەبەرىستە جاتقان. فوتو جانە ۆيدەو دالەلدەردە انتيبيوتيكتەر مەن باسقا دا ماڭىزدى دارىلەردىڭ جەردە جاتقان ءساتى بەينەلەنگەن. ولار بۇل دارىلەردىڭ سالدارى مي ىسىگى مەن شوك جاعدايىن ۋشىقتىرعانىن ايتادى.
بۇدان بولەك، تۋىستارى پالاتادا اۋا تەمپەراتۋراسى 31°C-قا جەتكەنىن، تەرەزە اشىپ، وزدەرى بولمەنى سالقىنداتۋعا ءماجبۇر بولعاندارىن ايتتى. وقيعاعا بايلانىستى وبلىستىق دەنساۋلىق ساقتاۋ باسقارماسى اۋرۋحانا ديرەكتورىنىڭ سوگىس العانىن، وپەراتسياعا قاتىسقان مەديتسينا قىزمەتكەرلەرى قىزمەتىنەن ۋاقىتشا شەتتەتىلگەنىن حابارلادى. قازىرگى تاڭدا ساراپتاما قورىتىندىسى كۇتىلۋدە.
مارقۇمنىڭ وتباسىنا كوڭىل ايتۋعا كەلگەن دارىگەرلەر باتا وقۋعا 200 مىڭ تەڭگە بەرگەن. تۋىستارى بۇل جاعداي تەك ءبىر وتباسىنىڭ قايعىسى ەمەس، ايماقتاعى دەنساۋلىق ساقتاۋ جۇيەسىنىڭ كەمشىلىگىن اشىپ بەردى دەيدى. قازىر وقيعا بويىنشا قىلمىستىق ءىس قوزعالىپ، تەرگەۋ جۇمىستارى جۇرگىزىلىپ جاتىر.
ۇقساس جاڭالىقتار
