23 مامىر كۇنى مۇعالىمدى بالاعاتتاعانى ءۇشىن نزم-نەن شىعارىلعان ءجاسوسپىرىم اۋرۋحاناعا ءتۇستى. بۇل تۋرالى «زا نامي ۋجە ۆىەحالي» جازدى، دەپ حابارلايدى “ادىرنا”.
«11-سىنىپ وقۋشىسى باقىلاۋ جۇمىسى كەزىندە ۇيالى تەلەفونمەن ۇستالدى – وسىدان كەيىن ول مۇعالىمدى بالاعاتتادى. سول سەبەپتى مەكتەپتىڭ پەداگوگيكالىق كەڭەسى ونى نزم-نەن شىعارۋ تۋرالى شەشىم قابىلدادى»، – دەلىنگەن حابارلامادا.
بۇل جاعدايعا ءماجىلىس دەپۋتاتى يرينا سميرنوۆا دا پىكىر ءبىلدىردى.
«23 مامىردا بالانى مەكتەپتەن شىعارۋ مۇمكىن بە؟ ول قايدا بارادى؟ قاي مەكتەپ قابىلدايدى؟ الماتىداعى نازارباەۆ مەكتەبى، سىزدەر وقۋشىنىڭ قۇقىعىن بۇزىپ وتىرعان جوقسىزدار ما؟ بۇل شەشىمدەرىڭىز زاڭسىز ەمەس پە؟ سىزدەردىڭ قوعام كۇتكەن كاسىبي دەڭگەيلەرىڭىز كۇمان تۋعىزباي ما؟» – دەدى سميرنوۆا.
وعان جاۋاپ رەتىندە نزم باسقارما توراعاسى ءانۋار جانعوزين وقۋشىنى شىعارۋ شەشىمى قيسىندى جانە نەگىزدەلگەن دەپ مالىمدەدى.
«مەكتەپ مۇعالىمى ۇيالى تەلەفوندى تارتىپكە ساي تاركىلەگەن. الايدا وقۋشى اگرەسسيا تانىتىپ، مۇعالىمدى بالاعات سوزبەن قورلادى. بۇل جاعداي كۋاگەرلەردىڭ قاتىسۋىمەن تىركەلگەن جانە ءتيىستى دالەلدەر بار. مۇنداي ارەكەت مەكتەپ ءتارتىبى مەن مۇعالىمگە قۇرمەت كورسەتۋ قاعيدالارىنا عانا ەمەس، جالپى ادامگەرشىلىك قۇندىلىقتارعا دا قايشى. وقۋشىنىڭ بۇرىن دا ءتارتىپ بۇزعانى بولعان. مۇعالىمدى قۇرمەتتەۋ – ساپالى ءبىلىم بەرۋدىڭ نەگىزى، سوندىقتان ءبىز مۇنداي اۋىر وقيعاعا بەي-جاي قاراۋعا قۇقىعىمىز جوق. وسى سەبەپتى مەكتەپتىڭ پەداگوگيكالىق كەڭەسىنىڭ وقۋشىنى شىعارۋ تۋرالى شەشىمى – قيسىندى جانە ادىلەتتى. بۇل جاعدايدى تەرەڭ زەرتتەپ، قاجەتتى قورىتىندىلار جاسايمىز. سونىمەن قاتار، بۇكىل جاۋاپكەرشىلىكتى مەكتەپكە جۇكتەۋ دۇرىس ەمەس – مۇندا وتباسى مەن قوعام دا جاۋاپتى ەكەنىن ۇمىتپاۋ كەرەك. قازىرگى ۋاقىتتا وقۋشىنى باسقا مەكتەپكە اۋىستىرۋ ماسەلەسى كەلىسىلگەن»، – دەدى جانعوزين.
كەلەسى كۇنى ءجاسوسپىرىم ۆيدەوۇندەۋ جاساپ، كەشىرىم سۇراپ، وقۋىن اياقتاۋعا مۇمكىندىك بەرۋىن ءوتىندى. ونىڭ ايتۋىنشا، اتا-اناسى ورىس ءتىلىن بىلمەگەندىكتەن، شىعارۋ تۋرالى قۇجاتقا قول قويعان.
ءماجىلىس بۇل وقۋشىنى شىعارۋدى زاڭسىز دەپ تانىدى.
«اكەسى مەن شەشەسى قاراپايىم ادامدار، ول ورىس تىلىندە ءبىلىم الۋدى تاڭداعان سوڭ، اتا-اناسى وعان كومەكتەسە المادى، ويتكەنى ولار تەك قازاقشا سويلەيدى. ول نزم-گە ءوز بەتىمەن دايىندالىپ، 2 مىڭ بالانىڭ اراسىنان ۇزدىك 50-گە كىردى. سۇنقاردىڭ ۇلگەرىمى جىل سايىن ۇزدىك بولعان. ونىڭ تەلەفونى تاركىلەنسە دە، ماتەماتيكا ەمتيحانىندا پايدالانعانىن ەشكىم دالەلدەي المايدى – ول بۇل ءپاندى ۇزدىك بىلەدى. ايتپاقشى، سول كۇنى تاعى التى وقۋشىنىڭ تەلەفونى الىنعان. مەكتەپ تە، مينيستر دە، ءتىپتى سوت تا بالانى ورتا بىلىمنەن ايىرۋعا قۇقىلى ەمەس. 18 جاسقا تولماعان كەز كەلگەن بالا ورتا ءبىلىم الۋى ءتيىس. ەگەر نزم مەملەكەت ەسەبىنەن وقىتۋدى موينىنا السا، وندا بۇل مىندەتتەمەسىن ورىنداۋى ءتيىس. بۇل ەندى جەكە بيزنەس ەمەس – بۇل مەملەكەتتىك تاپسىرىس، ال ستاندارتتار مەن ەرەجەلەردى مەملەكەت بەكىتەدى. مەكتەپتىڭ قۇرىلتايشىسى – ۇكىمەت»، – دەدى دەپۋتات مۇرات ابەنوۆ.
سونىمەن قاتار، ابەنوۆتىڭ ايتۋىنشا، نزم باعدارلاماسى وزگەشە بولعاندىقتان، وقۋشىنى قاراپايىم مەكتەپكە اۋىستىرۋ مۇمكىن ەمەس.
قوعام بەلسەندىسى ايدا بۋكاەۆانىڭ ايتۋىنشا، بالانى اۋرۋحاناعا جاتقىزعان.
«ءوزىن كورسەتكىسى كەلگەن مۇعالىمگە بالانىڭ قۇلدىراۋى كەرەك پە؟ ول تاماق ىشپەي، بەس كۇن جىلاپ، اقىرى جۇيكەسى سىر بەرىپ اۋرۋحاناعا ءتۇستى» – دەدى بۋكاەۆا.
بۇل ماسەلەگە وقۋ-اعارتۋ ءمينيسترى عاني بەيسەمباەۆ ارالاستى. قازىر مەكتەپكە بالا قۇقىقتارىن قورعاۋ كوميتەتى مەن اۋماقتىق دەپارتامەنت وكىلدەرى جىبەرىلدى.
«وقۋ-اعارتۋ مينيسترلىگى مۇعالىمنىڭ مارتەبەسىن تۇسىرەتىن كەز كەلگەن ارەكەتكە قارسى. سونىمەن بىرگە، ءبىز وقۋشى ءوز قاتەسىن تۇسىنگەنىن كورىپ وتىرمىز. بۇل جاعدايدا نزم ىشكى ەرەجەلەرمەن قاتار، گۋمانيزم مەن كاسىبي پەداگوگيكا قاعيداتتارىن دا باسشىلىققا الادى دەپ سەنەمىز»، – دەدى بەيسەمباەۆ.
