كتك تەلەارناسى ەفيردەگى قازاقشا جاڭالىقتاردىڭ ۋاقىتىن قىسقارتتى، دەپ حابارلايدى "ادىرنا" ۇلتتىق پورتالى Qaz365.kz-كە سىلتەپ.
بۇعان دەيىن كۇندەلىكتى كەشكى ساعات 19:30 بەن 20:00 ارالىعىندا كورسەتىلەتىن جاڭالىقتار ەندى نەبارى 15 مينۋت قانا، 20:40 پەن 20:55 ارالىعىندا عانا ەفيرگە شىعاتىن بولدى. ال ورىس تىلىندەگى جاڭالىقتاردىڭ ۋاقىتى، كەرىسىنشە، ۇزارعان. ەندى ولار ساعات 21:00-دەن باستاپ 21:40-قا دەيىن، ياعني 40 مينۋت بويى كورسەتىلەدى.
سوڭعى كەزدەرى بۇقارالىق اقپارات قۇرالدارىندا قازاق تىلىندەگى كونتەنتتىڭ قىسقارۋى ءجيى بايقالىپ ءجۇر. ناقتىراق، Qazcontent اق قۇرامىنداعى BAQ.KZ جانە BaigeNews.kz سايتتارى بىرىگەتىنى حابارلانعان. ءتۇرلى تاقىرىپتا اقپارات تاراتاتىن Massaget.kz پورتالى دا رەداكتسيا قۇرامىن قىسقارتتى. ال «ەلارنا» تەلەارناسى مامىر ايىنان باستاپ مۇلدەم حابار تاراتۋدى توقتاتتى. قاراعاندىداعى جەرگىلىكتى ارنالاردىڭ ءبىرى دە قازاقشا جاڭالىقتار ءبولىمىن جاپقان.
