ەلوردادا 29-30 مامىر كۇندەرى استانا حالىقارالىق فورۋمى (AIF) وتەدى، دەپ حابارلايدى “ادىرنا” ۇلتتىق پورتالى.
فورۋم جاھاندىق سىن-قاتەرلەر مەن گەوساياسي شيەلەنىستەر جاعدايىندا مەملەكەتارالىق ىنتىماقتاستىق پەن ديپلوماتياعا جاردەمدەسۋدەگى ءوز ميسسياسىن جالعاستىرىپ جاتىر.
فورۋمدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اشادى.
ۇيىمداستىرۋشىلار 39 پانەلدىك سەسسيا وتەدى جوسپارلاپ وتىر. ونىڭ ىشىندە 10 ەكسكليۋزيۆتى سەسسيا جوعارى دارەجەلى قوناقتارمەن جانە الەمدىك كوشباسشىلاردىڭ جەكە قاتىسۋىمەن وتەدى.
فورۋم باعدارلاماسى «سىرتقى ساياسات جانە حالىقارالىق قاۋىپسىزدىك»، «ەنەرگەتيكا جانە كليماتتىڭ وزگەرۋى»، «ەكونوميكا جانە قارجى» دەپ اتالاتىن ءۇش نەگىزگى تاقىرىپتان تۇرادى.
سىرتقى ساياسات جانە حالىقارالىق قاۋىپسىزدىك سالاسىنداعى الەمدىك ساراپشىلار بولاشاق تۋرالى پاكت، سونداي-اق كوپپوليارلى الەمدەگى «ورتا دەرجاۆالار» ساياساتىن، سونداي-اق تاياۋ شىعىستاعى جاڭا تەپە-تەڭدىككە اپاراتىن جولداردى تالقىلايدى.ايتا كەتەيىك، ەلشى، ميۋنحەن قاۋىپسىزدىك كونفەرەنتسياسىنىڭ توراعاسى (2022-2025 جج.) كريستوف حويسگەن، ەلكانو كورولدىك ينستيتۋتىنىڭ ديرەكتورى چارلز پاۋەلل، جەنەۆا قاۋىپسىزدىك ساياساتى ورتالىعىنىڭ (Gcsp) اتقارۋشى ديرەكتورى توماس گرەمينگەر اتالعان تاقىرىپ بويىنشا فورۋمعا قاتىساتىنىن راستادى.
ەنەرگەتيكا جانە كليماتتىڭ وزگەرۋى تۋرالى پانەلدىك سەسسيالاردا قاتىسۋشىلار سۋ جانە ەنەرگەتيكالىق قاۋىپسىزدىكتى، ورتالىق ازيانىڭ ورنىقتى بولاشاعىن، كليمات سالاسىنداعى جاھاندىق ءىس-قيمىلداردى، يننوۆاتسيالىق سىن-تەگەۋرىندەردى تالقىلايدى.
سونداي-اق، فورۋمعا CNN ءتىلشىسى ماكس فوستەر دە قاتىسادى. ول بۇل كۇندى اسىعا كۇتىپ جۇرگەنىن ايتتى.
«مەن ماكس فوستەرمىن، لوندونداعى CNN ارناسىنىڭ ءتىلشىسى ءارى «ءبىز نە بىلەمىز» شوۋىنىڭ جۇرگىزۋشىسىمىن. ءبىز شوۋىمىزدى العاش رەت شەتەلدە وتكىزگەلى وتىرمىز، سول سەبەپتى استاناعا ساپارىمدى اسىعا كۇتۋدەمىن.
باعدارلاما بارىسىندا حورۆاتيانىڭ پرەمەر-ءمينيسترى اندرەي پلەنكوۆيچتەن باستاپ، بۇۇ-نىڭ كوشى-قون ۇيىمىنىڭ وكىلى ەمي پاپا حانىمعا دەيىن كوپتەگەن بەدەلدى تۇلعالارمەن سۇحباتتاسامىن.
ءبىز ۇلكەن ءارى كۇردەلى الەمدە ءومىر ءسۇرىپ جاتىرمىز. قوناقتارىمىز ءوز سالالارىنداعى ماڭىزدى ماسەلەلەردى كوتەرەدى، ال ءبىز ستۋديادا وسى تاقىرىپتاردى تەرەڭ تالقىلايمىز. سونىمەن قاتار، پىكىر بىلدىرەتىن ساراپشىلارىمىز كۇردەلى جايتتاردى قاراپايىم تىلمەن ءتۇسىندىرىپ، بارلىعىمىزعا تۇسىنىكتى بولۋىنا كومەكتەسەدى دەپ سەنەمىن”، دەدى ول.
