ءۇش جىلدا قالانىڭ ينفراقۇرىلىمى كەڭ كولەمدە جاڭعىرتىلدى — ەربولات دوساەۆ

الماتى قالاسىنىڭ بۇرىنعى اكىمى ەربولات دوساەۆ قالا اكتيۆىمەن وتكەن كەزدەسۋدە ءسوز سويلەدى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ. «ەڭ الدىمەن، ماعان تۋعان قالاما ەل تاريحىنداعى ەڭ قيىن كەزەڭدەردىڭ بىرىندە قىزمەت ەتۋگە مۇمكىندىك بەرگەنى ءۇشىن مەملەكەت باسشىسىنا شەكسىز العىسىمدى بىلدىرگىم كەلەدى. بۇل مەن ءۇشىن ۇلكەن قۇرمەت قانا ەمەس، زور جاۋاپكەرشىلىك تە بولدى. جۇمىسىمدى باستاعان ساتتەن باستاپ، وسى جوعارى سەنىمدى اقتاپ، الماتىنى ورنىقتى دامۋ جولىنا شىعارۋ ءۇشىن بارلىق ءبىلىمىم مەن تاجىريبەمدى سالۋعا تىرىستىم. سوڭعى ءۇش جىلدان استام ۋاقىت مەن ءۇشىن ۇلكەن سىناقتار مەن تۇرعىنداردىڭ ءومىر ساپاسىن جاقسارتۋ باعىتىنداعى ماڭىزدى جەتىستىكتەرگە تولى كەزەڭ بولدى»، – دەدى ەربولات دوساەۆ سەنبى كۇنى. ونىڭ ايتۋىنشا، پرەزيدەنت تاپسىرماسىمەن جانە تىكەلەي قولداۋىمەن الماتىنىڭ بولاشاق دامۋىن ايقىندايتىن 20-دان استام ستراتەگيالىق قۇجات قابىلدانعان. ولاردىڭ قاتارىندا 2030 جىلعا دەيىنگى دامۋ باعدارلاماسى، 2040 جىلعا دەيىنگى جاڭا باس جوسپار، كولىك ينفراقۇرىلىمىنىڭ ماستەر-جوسپارى جانە باسقا دا ماڭىزدى قۇجاتتار بار. «سوڭعى ءۇش جىلدا قالانىڭ ينجەنەرلىك ينفراقۇرىلىمى كەڭ كولەمدە جاڭعىرتىلدى. 540 شاقىرىم سۋمەن جابدىقتاۋ جانە سۋ بۇرۋ جەلىلەرى، 480 شاقىرىمنان استام ەلەكتر جەلىلەرى سالىندى جانە جاڭارتىلدى، 75 شاقىرىم جاڭا جول سالىنىپ، 650 شاقىرىم جول جوندەلدى. مەملەكەت باسشىسىنىڭ تۋعان قالاسىن دامىتۋعا جەكە قولداۋىنىڭ، الماتىلىقتاردىڭ سەنىمى مەن بەلسەندى قاتىسۋىنىڭ ارقاسىندا ءبىز بىرگە الماتىنىڭ ورنىقتى الەۋمەتتىك-ەكونوميكالىق دامۋىنا بەرىك نەگىز قالادىق. ءۇش جىل ىشىندە قالانىڭ ەكونوميكاسى 20%-دان استام ءوسىپ، 29 ترلن تەڭگەدەن استى. الماتى بيۋدجەتىنىڭ كىرىسى 2022 جىلدىڭ باسىمەن سالىستىرعاندا 2,2 ەسە ءوسىپ، 2,5 ترلن تەڭگەگە جەتتى»، – دەدى ەكس-اكىم. ول اكىمدىك جۇمىسىنىڭ باستى ماقساتى — الەۋمەتتىك ينفراقۇرىلىمدى دامىتۋ، مەكتەپتەر مەن بالاباقشالار سالۋ ارقىلى الماتىلىقتاردىڭ ءومىر ساپاسىن جاقسارتۋ ەكەنىن اتاپ ءوتتى. «بۇل ماسەلە پرەزيدەنتتىڭ ۇنەمى باقىلاۋىندا. سوڭعى ءۇش جىلدان استام ۋاقىت ىشىندە قالامىزدا 57 ءبىلىم بەرۋ مەكەمەسى سالىنىپ، جاڭعىرتىلدى. 2022 جىلى ولاردىڭ سانى 416 بولسا، بۇگىندە 434-كە جەتتى. 12 دەنساۋلىق ساقتاۋ نىسانى سالىندى جانە جاڭعىرتىلدى، ناتيجەسىندە الماتىداعى دەنساۋلىق ساقتاۋ سالاسىنىڭ جابدىقتالۋ دەڭگەيى 96,4%-عا جەتتى»، – دەدى ول. سونداي-اق، ول الماتى ەكونوميكاسىن ءارتاراپتاندىرۋ نەگىزگى باعىتتاردىڭ ءبىرى بولعانىن ايتتى. «ءۇش جىلدان استام ۋاقىتتا قالا ەكونوميكاسىنا 5 ترلن تەڭگەدەن استام ينۆەستيتسيا تارتىلدى. شاعىن جانە ورتا بيزنەستىڭ ەكونوميكاداعى ۇلەسى العاش رەت 60%-دان استى. ال ەاەو ەلدەرىنە الماتىدان شىعارىلاتىن دايىن ءونىم ەكسپورتى ءۇش ەسەگە ءوسىپ، 2024 جىلدىڭ قورىتىندىسى بويىنشا 2 ملرد اقش دوللارىنان استى»، – دەدى دوساەۆ. «بۇل جەتىستىكتەر مەملەكەت باسشىسىنىڭ تۇراقتى قولداۋىنىڭ، سىزدەردىڭ – قۇرمەتتى الماتىلىقتار – بەلسەندى قاتىسۋىڭىزدىڭ جانە كاسىبي ءارى قالانى سۇيەتىن كوماندامەن بىرلەسكەن ەڭبەكتىڭ ارقاسىندا مۇمكىن بولدى. وسى ءساتتى پايدالانا وتىرىپ، بارىڭىزگە شىن جۇرەكتەن العىسىمدى بىلدىرەمىن. مەن الماتىنىڭ جارقىن بولاشاعىنا – زاماناۋي، دامىعان مەگاپوليسكە اينالاتىنىنا جانە تۇرعىندارى ءۇشىن جايلى قالا بولاتىنىنا كامىل سەنەمىن»، – دەپ ءسوزىن قورىتىندىلادى ەربولات دوساەۆ. ەسكە سالايىق، ەربولات دوساەۆ الماتى قالاسىنىڭ اكىمى قىزمەتىنە 2022 جىلدىڭ قاڭتارىندا، قاڭتار وقيعالارىنان كەيىن تاعايىندالعان.