Almaty qalasynyŋ būrynǧy äkımı Erbolat Dosaev qala aktivımen ötken kezdesude söz söiledı, dep habarlaidy “Adyrna” ūlttyq portaly QazTAG-qa sıltep.
«Eŋ aldymen, maǧan tuǧan qalama el tarihyndaǧy eŋ qiyn kezeŋderdıŋ bırınde qyzmet etuge mümkındık bergenı üşın Memleket basşysyna şeksız alǧysymdy bıldırgım keledı. Būl men üşın ülken qūrmet qana emes, zor jauapkerşılık te boldy. Jūmysymdy bastaǧan sätten bastap, osy joǧary senımdı aqtap, Almatyny ornyqty damu jolyna şyǧaru üşın barlyq bılımım men täjıribemdı saluǧa tyrystym. Soŋǧy üş jyldan astam uaqyt men üşın ülken synaqtar men tūrǧyndardyŋ ömır sapasyn jaqsartu baǧytyndaǧy maŋyzdy jetıstıkterge toly kezeŋ boldy», – dedı Erbolat Dosaev senbı künı.
Onyŋ aituynşa, Prezident tapsyrmasymen jäne tıkelei qoldauymen Almatynyŋ bolaşaq damuyn aiqyndaityn 20-dan astam strategiialyq qūjat qabyldanǧan. Olardyŋ qatarynda 2030 jylǧa deiıngı damu baǧdarlamasy, 2040 jylǧa deiıngı jaŋa bas jospar, kölık infraqūrylymynyŋ master-jospary jäne basqa da maŋyzdy qūjattar bar.
«Soŋǧy üş jylda qalanyŋ injenerlık infraqūrylymy keŋ kölemde jaŋǧyrtyldy. 540 şaqyrym sumen jabdyqtau jäne su būru jelılerı, 480 şaqyrymnan astam elektr jelılerı salyndy jäne jaŋartyldy, 75 şaqyrym jaŋa jol salynyp, 650 şaqyrym jol jöndeldı. Memleket basşysynyŋ tuǧan qalasyn damytuǧa jeke qoldauynyŋ, almatylyqtardyŋ senımı men belsendı qatysuynyŋ arqasynda bız bırge Almatynyŋ ornyqty äleumettık-ekonomikalyq damuyna berık negız qaladyq. Üş jyl ışınde qalanyŋ ekonomikasy 20%-dan astam ösıp, 29 trln teŋgeden asty. Almaty biudjetınıŋ kırısı 2022 jyldyŋ basymen salystyrǧanda 2,2 ese ösıp, 2,5 trln teŋgege jettı», – dedı eks-äkım.
Ol äkımdık jūmysynyŋ basty maqsaty — äleumettık infraqūrylymdy damytu, mektepter men balabaqşalar salu arqyly almatylyqtardyŋ ömır sapasyn jaqsartu ekenın atap öttı.
«Būl mäsele Prezidenttıŋ ünemı baqylauynda. Soŋǧy üş jyldan astam uaqyt ışınde qalamyzda 57 bılım beru mekemesı salynyp, jaŋǧyrtyldy. 2022 jyly olardyŋ sany 416 bolsa, bügınde 434-ke jettı. 12 densaulyq saqtau nysany salyndy jäne jaŋǧyrtyldy, nätijesınde Almatydaǧy densaulyq saqtau salasynyŋ jabdyqtalu deŋgeiı 96,4%-ǧa jettı», – dedı ol.
Sondai-aq, ol Almaty ekonomikasyn ärtaraptandyru negızgı baǧyttardyŋ bırı bolǧanyn aitty.
«Üş jyldan astam uaqytta qala ekonomikasyna 5 trln teŋgeden astam investisiia tartyldy. Şaǧyn jäne orta biznestıŋ ekonomikadaǧy ülesı alǧaş ret 60%-dan asty. Al EAEO elderıne Almatydan şyǧarylatyn daiyn önım eksporty üş esege ösıp, 2024 jyldyŋ qorytyndysy boiynşa 2 mlrd AQŞ dollarynan asty», – dedı Dosaev.
«Būl jetıstıkter Memleket basşysynyŋ tūraqty qoldauynyŋ, sızderdıŋ – qūrmettı almatylyqtar – belsendı qatysuyŋyzdyŋ jäne käsıbi ärı qalany süietın komandamen bırlesken eŋbektıŋ arqasynda mümkın boldy. Osy sättı paidalana otyryp, bärıŋızge şyn jürekten alǧysymdy bıldıremın. Men Almatynyŋ jarqyn bolaşaǧyna – zamanaui, damyǧan megapoliske ainalatynyna jäne tūrǧyndary üşın jaily qala bolatynyna kämıl senemın», – dep sözın qorytyndylady Erbolat Dosaev.
Eske salaiyq, Erbolat Dosaev Almaty qalasynyŋ äkımı qyzmetıne 2022 jyldyŋ qaŋtarynda, Qaŋtar oqiǧalarynan keiın taǧaiyndalǧan.
Ūqsas jaŋalyqtar
