24 مامىردان باستاپ ءۇيى جوق بارلىق ازاماتتار تۇرعىن ءۇي كەزەگىنە تۇرا الادى، دەپ حابارلايدى “ادىرنا” ۇلتتىق پورتالى.
قازاقستاندا تۇرعىن ءۇيدى ءبولۋ جۇيەسىنىڭ جاڭا فورماتى ىسكە قوسىلادى. 2025 جىلعى 24 مامىردان باستاپ باسپاناعا مۇقتاج بارلىق ازاماتتار تۇرعىن ءۇي كەزەگىنە تۇرا الادى. بۇدان بىلاي كەزەك جەرگىلىكتى اكىمدىكتەر ارقىلى ەمەس، وتباسى بانكى ارقىلى، ورتالىقتاندىرىلعان جۇيە نەگىزىندە جۇرگىزىلەدى. بۇل وزگەرىس تۇرعىن ءۇي ماسەلەسىن ءادىل ءارى اشىق شەشۋگە باعىتتالعان.
نەگىزگى تالاپتار بويىنشا سوڭعى 5 جىلدا جەكە تۇرعىن ءۇي بولماۋى كەرەك.
جاسى 18-دەن اسقان قازاقستان ازاماتى ەتسق كىلتى (ەلەكتروندىق تسيفرلىق قولتاڭبا) ارقىلى كەزەككە تۇرا الادى.
ءوتىنىش بەرۋ ءتارتىبى:
1.orken.otbasybank.kz سايتىنا كىرۋ;
2.ەتسق ارقىلى اۆتوريزاتسيادان ءوتۋ;
3.الەۋمەتتىك وسال توپقا جاتاتىن بولساڭىز، ءتيىستى ساناتتى كورسەتۋ;
4.دەرەكتەردى وڭدەۋگە كەلىسىم بەرۋ;
5.ەگەر ءۇي اپاتتى جاعدايدا بولسا، تەحنيكالىق قورىتىندىنى جۇكتەۋ.
جۇيە اۆتوماتتى تۇردە ءوتىنىش بەرۋشىنىڭ تۇرعىن ءۇيىنىڭ بار-جوعىن تەكسەرىپ، كەزەككە قويادى. كەزەك جىلجۋىن ونلاين رەجيمدە باقىلاۋعا بولادى.
