قازاقستاندا 22–30 مامىر ارالىعىندا وتەتىن حالىقارالىق بالالاردى قورعاۋ كۇنىنە ارنالعان كەڭ اۋقىمدى ءىس-شارالار – ەلىمىزدەگى بالالارعا ارنالعان مەملەكەتتىك ساياساتتىڭ جارقىن كورىنىسى. «قازاقستان بالالارى» اتتى بىرىڭعاي ۇرانمەن وتەتىن بۇل مەرەكەلىك كەزەڭ – تەك ويىن-ساۋىق ەمەس، بالالاردىڭ قۇقىعىن قورعاۋ، ولاردىڭ پىكىرىن تىڭداۋ، دامۋىنا جاعداي جاساۋ جولىنداعى ماڭىزدى قوعامدىق ۇندەۋ.
بۇل باستامانىڭ شەڭبەرىندە وتكىزىلەتىن ءىس-شارالاردىڭ اۋقىمى كەڭ ءارى مازمۇندى. وتباسى مەن بالا اراسىنداعى بايلانىسقا ءمان بەرىلگەن مەرەكەلىك كۇندەر، ايماق اكىمدەرىنىڭ بالالارمەن كەزدەسۋى، مادەنيەت جانە سپورت مەكەمەلەرىنە تەگىن بارۋ، قايىرىمدىلىق اكتسيالارى، جاڭا ءبىلىم نىساندارىنىڭ اشىلۋى، بالالاردىڭ قۇقىق قورعاۋ سالاسىمەن تانىسۋى جانە ءبىلىم سالاسىنداعى جەتىستىكتەر – مۇنىڭ ءبارى بالالاردىڭ جان-جاقتى دامۋىنا باعىتتالعان.
مەملەكەتتىك ساياساتتاعى بالالار مۇددەسى
قر وقۋ-اعارتۋ مينيسترلىگى مەن جەرگىلىكتى اتقارۋشى ورگاندار ۇيىمداستىرىپ وتىرعان ءىس-شارالار قازاقستانداعى بالالارعا قامقورلىقتىڭ جاي عانا مىندەت ەمەس، ۇلتتىق يدەولوگيانىڭ اجىراماس بولىگى ەكەنىن كورسەتەدى. مەكتەپ جاسىنداعى بالالاردىڭ ءبىلىم الۋى عانا ەمەس، ولاردىڭ تۇلعا رەتىندە قالىپتاسۋىنا، ازاماتتىق بەلسەندىلىگىنە، شىعارماشىلىق جانە سپورتتىق قابىلەتتەرىنە قولداۋ كورسەتۋ – قازىرگى ءبىلىم بەرۋ جۇيەسىنىڭ باستى مىندەتتەرىنىڭ ءبىرى.
مينيسترلىك بۇل باستامالاردى جۇزەگە اسىرۋدا وتباسى ينستيتۋتىن قولداۋ مەن نىعايتۋدى دا باستى نازاردا ۇستاپ وتىر. 22 مامىر كۇنى وتكەن «اكەم – تىرەگىم، انام – جۇرەگىم» اتتى ءىس-شارا سونىڭ دالەلى. بۇل كۇنگى ءىس-شارالار وتباسى قۇندىلىقتارىن ۇلىقتاپ، اكە مەن انانىڭ بالا تاربيەسىندەگى ءرولىن ناسيحاتتاۋعا ارنالدى. «اكەلەر وداعى» رقب توراعاسى ماقسۇت ايتماعانبەتتىڭ ايتۋىنشا، سوڭعى جىلدارى قوعامدا اكە رولىنە دەگەن كوزقاراس وڭ وزگەرىپ كەلەدى. بۇرىن مەكتەپتەگى اتا-انالار جينالىسىنا تەك انالار كەلەتىن بولسا، قازىر اكەلەر دە بەلسەندىلىك تانىتا باستادى.
قاراعاندى ۇلگىسى: پاتريوتتىق تاربيە مەن زياتكەرلىك دامۋ
قاراعاندى قالاسىندا وتكەن بىرقاتار ءىس-شارالار بالالار تاربيەسىنە ەرەكشە ۇلگى بولارلىقتاي. «قازاقستان بالالارى» ۇلتتىق باستاماسى اياسىندا وتكىزىلگەن كەزدەسۋلەردىڭ ءبىرى – قاراعاندى وبلىسى پوليتسيا دەپارتامەنتىنىڭ جەدەل قيمىلدايتىن ارنايى جاساعى مەن كينولوگيالىق ورتالىعىنىڭ ۇيىمداستىرۋىمەن ءوتتى. بۇل كۇنى كوپبالالى وتباسىلار مەن بالالار ءۇيىنىڭ تاربيەلەنۋشىلەرىنەن قۇرالعان 60-قا جۋىق وقۋشى قۇقىق قورعاۋ سالاسىنىڭ قىر-سىرىن ءبىلىپ، اسكەري جاتتىعۋلاردان ءوتتى. مۇنداي شارالار بالالاردىڭ بويىنا پاتريوتتىق رۋح، ءتارتىپ پەن سەرىكتەستىك داعدىلارىن سىڭىرۋگە مۇمكىندىك بەرەدى.
سونىمەن قاتار وبلىستا «اكە، انا جانە مەن» اتتى وتباسىلىق جارىس ۇيىمداستىرىلدى. سپورتتىق شاراعا اتا-انالار مەن بالالار بىرگە قاتىسىپ، وتباسىلىق ىنتىماقتاستىقتى كورسەتىپ قانا قويماي، سالاۋاتتى ءومىر سالتىنىڭ ۇلگىسىن پاش ەتتى. وسىنداي ءىس-شارالار وتباسىلىق قۇندىلىقتاردى نىعايتۋعا، بالالار مەن اتا-انالار اراسىنداعى بايلانىسقا سەرپىن بەرۋگە باعىتتالعان.
ايماقتىق ءبىلىم سالاسىنداعى جەتىستىكتەر دە نازار اۋدارۋعا تۇرارلىق. استانادا وتكەن رەسپۋبليكالىق پاندىك وليمپيادادا قاراعاندى وبلىسى 13 جۇلدەلى ورىن يەلەنىپ، جوعارى ناتيجەلەر كورسەتتى. بۇل – ساپالى ءبىلىم بەرۋدىڭ ايماقتىق دەڭگەيدە دە جۇيەلى تۇردە دامىپ جاتقانىن كورسەتەدى. اسىرەسە، جاراتىلىستانۋ-ماتەماتيكا باعىتىندا ەكىنشى ورىن، قوعامدىق-گۋمانيتارلىق باعىتتا ءۇشىنشى ورىندى يەلەنۋى – مۇعالىمدەر مەن وقۋشىلاردىڭ تىنىمسىز ەڭبەگىنىڭ جەمىسى.
بالالاردىڭ بەلسەندىلىگىن ارتتىرۋ، ولاردىڭ پىكىرىنە قۇلاق اسۋ – بۇل بۇگىنگى قوعامنىڭ باستى مىندەتى. قازاقستاندا بالالارعا ارنالعان ءىس-شارالار كوبەيىپ، ساپاسى جاقسارىپ كەلەدى. ءبىلىم بەرۋ تەك مەكتەپ قابىرعاسىمەن شەكتەلمەي، مادەني، سپورتتىق، زياتكەرلىك تۇرعىدا جان-جاقتى قامتىلۋدا.
بيىل ەلىمىزدە العاش رەت بالالار-جاسوسپىرىمدەر سپورت مەكتەپتەرى اياسىندا 28 مىڭعا جۋىق بالا تەگىن جاتتىعىپ جۇرگەنى اتاپ ءوتىلدى. بۇل – تەك سپورتقا عانا ەمەس، ۇرپاق دەنساۋلىعىنا، ونىڭ الەۋەتىن دامىتۋعا جاسالعان ينۆەستيتسيا.
حالىقارالىق بالالاردى قورعاۋ كۇنى – بۇل مەرەكە عانا ەمەس. بۇل – بالا مۇددەسىن قورعاۋعا، ونىڭ تۇلعالىق دامۋىنا قوعام مەن مەملەكەتتىڭ ورتاق جاۋاپكەرشىلىگى بار ەكەنىن دالەلدەيتىن كۇن. ءاربىر ۇيىمداستىرىلعان ءىس-شارا – بالالارعا دەگەن شىنايى قامقورلىقتىڭ كورىنىسى.
كاسىبي شەبەرلىك مەرەكەسى – WorldSkills Karaganda 2025
بالالار مەرەكەسىمەن قاتار قاراعاندىدا 20–22 مامىر ارالىعىندا وتكەن "WorldSkills Karaganda 2025" وڭىرلىك چەمپيوناتى – جاستاردىڭ كاسىبي باعىتتاعى الەۋەتىن تانىتقان تاعى ءبىر ماڭىزدى وقيعا بولدى. قاراعاندى وبلىسىنىڭ 38 كوللەدجىنەن جينالعان 286 قاتىسۋشى 46 بىلىكتىلىك بويىنشا شەبەرلىكتەرىن كورسەتىپ، بولاشاق مامان رەتىندەگى قابىلەتتەرىن دالەلدەۋگە تىرىستى.
ءۇش كۇن بويى قاتىسۋشىلار 46 ءتۇرلى بىلىكتىلىك بويىنشا ءوز كاسىبي داعدىلارى مەن بىلىمدەرىن سىنعا سالادى. جارىستىڭ 20 بىلىكتىلىك باعىتى قاراعاندى قالاسىنداعى "جاستار" سپورت كەشەنىندە، ال قالعان 26 بىلىكتىلىك 13 كوللەدجدىڭ بازاسىندا وتكىزىلىپ جاتىر.
چەمپيوناتتىڭ باستى ماقساتى — جاستار اراسىندا جۇمىسشى ماماندىقتارىنىڭ بەدەلىن ارتتىرۋ، كاسىبي شەبەرلىكتى دارىپتەۋ جانە ءوڭىردىڭ عانا ەمەس، ەلدىڭ بولاشاق بىلىكتى ماماندارىن دايارلاۋعا سەرپىن بەرۋ. ۇيىمداستىرۋشىلاردىڭ ايتۋىنشا، مۇنداي سايىستار ءبىلىم بەرۋ جۇيەسى مەن ءوندىرىس سالاسىنىڭ اراسىنداعى بايلانىستى نىعايتىپ، كادرلاردى ەڭبەك نارىعى تالاپتارىنا ساي دايارلاۋعا جول اشادى.
"WorldSkills Karaganda 2025" چەمپيوناتى — قاتىسۋشى جاستار ءۇشىن تەك كاسىبي جارىس قانا ەمەس، ءوز قابىلەتىن دالەلدەۋگە، تاجىريبە الماسۋعا، ەڭبەك نارىعىندا سۇرانىسقا يە بولۋعا باعىتتالعان ۇلكەن مۇمكىندىك. سونىمەن قاتار، بۇل چەمپيونات كاسىبي باعدار بەرۋگە، ستۋدەنتتەردىڭ بولاشاق ماماندىعىنا دەگەن قىزىعۋشىلىعىن ارتتىرۋعا ىقپال ەتەدى.
قاراعاندى وبلىسى ەلىمىزدە كاسىبي-تەحنيكالىق ءبىلىم بەرۋ مەن جۇمىسشى كادرلاردى دايارلاۋدا كوشباسشىلاردىڭ ءبىرى سانالادى. چەمپيونات اياسىندا كوللەدج ستۋدەنتتەرى زاماناۋي قۇرال-جابدىقتارمەن جۇمىس ىستەۋ داعدىلارىن كورسەتىپ، حالىقارالىق دەڭگەيدەگى ستاندارتتارعا ساي شەبەرلىكتەرىن شىڭداي الادى.
جەڭىمپازدار مەن جۇلدەگەرلەرگە ديپلومدار مەن ماراپاتتار تاپسىرىلادى. سونىمەن قاتار، ولار رەسپۋبليكالىق جانە حالىقارالىق دەڭگەيدەگى WorldSkills جارىستارىنا قاتىسۋ مۇمكىندىگىنە يە بولادى.
ۇقساس جاڭالىقتار
