ۋكراينا پرەزيدەنتى ۆلاديمير زەلەنسكي قىتايدىڭ كيەۆكە جانە باسقا دا ەۋروپالىق ەلدەرگە درون ساتۋدى توقتاتقانىن، بىراق رەسەيگە جەتكىزۋدى جالعاستىرىپ جاتقانىن مالىمدەدى. بۇل تۋرالى Bloomberg اگەنتتىگى 29 مامىر كۇنى جاريالاعان ماتەريالدا جازعان، دەپ حابارلايدى “ادىرنا”.
زەلەنسكي بۇل مالىمدەمەسىن ەكى كۇن بۇرىن جۋرناليستەر الدىندا سويلەگەن كەزدە ايتقان.
"قىتايلىق Mavic (اەروفوتوتۇسىرىلىمگە ارنالعان تانىمال ازاماتتىق درون، جارىلعىش زاتتاردى تاسىمالداۋعا بەيىمدەۋگە بولادى) — رەسەيلىكتەر ءۇشىن اشىق، ۋكرايندەر ءۇشىن جابىق", — دەدى زەلەنسكي.
سونداي-اق، ول رەسەي اۋماعىندا قىتايلىق وكىلدەرى بار وندىرىستىك جەلىلەردىڭ جۇمىس ىستەپ تۇرعانىن اتاپ ءوتتى.
Bloomberg اگەنتتىگى سىلتەمە جاساعان اتى-ءجونىن اتاماعان ءبىر ەۋروپالىق شەنەۋنىكتىڭ ايتۋىنشا، زەلەنسكيدىڭ ءسوزى ەۋرووداقتىڭ ءوز باعالارىمەن دە سايكەس كەلەدى. ونىڭ ايتۋىنشا، قىتاي درون قوزعالتقىشتارىندا قولدانىلاتىن ماگنيتتەر سياقتى كەيبىر ماڭىزدى كومپونەنتتەردى باتىس ەلدەرىنە ساتۋدى ازايتقانىمەن، رەسەيگە جەتكىزۋدى ارتتىرعان.
ءوز كەزەگىندە بەيجىڭ بيلىگى كەز كەلگەن سوعىسۋشى تاراپقا قارۋ جەتكىزۋدى جوققا شىعارىپ، اسكەري ماقساتتا پايدالانىلۋى مۇمكىن قوسارلى ماقساتتاعى تاۋارلاردىڭ ەكسپورتىن باقىلاۋدا ۇستاپ وتىرعانىن مالىمدەدڭ. قىتاي سىرتقى ىستەر مينيسترلىگىنىڭ مالىمدەمەسىن Bloomberg كەلتىرەدى: "ۋكراينا ماسەلەسى بويىنشا قىتايدىڭ ۇستانىمى تۇراقتى جانە ايقىن: ءبىز سوعىستى توقتاتۋعا جانە بەيبىت كەلىسسوزدەردى قولداۋعا بەيىلمىز”.
2024 جىلدىڭ جازىندا قىتاي بيلىگى اسكەري ماقساتتا پايدالانىلۋى مۇمكىن بارلىق ازاماتتىق درونداردى ەكسپورتتاۋعا تىيىم سالعان بولاتىن. ال سول جىلدىڭ جەلتوقسانىندا Bloomberg قىتايدىڭ اقش پەن ەۋروپاعا درونداردىڭ نەگىزگى كومپونەنتتەرىن ساتۋعا شەكتەۋ قويعانىن حابارلادى. اگەنتتىكتىڭ مالىمەتىنشە، وسىعان قاراماستان، رەسەي مەن قىتاي كومپانيالارى يراندىق Shahed دروندارىنا ۇقساس سوققى جاساۋشى ۇشقىشسىز اپپاراتتى بىرلەسە جاساپ شىعارۋعا كىرىسكەن.
2025 جىلدىڭ ساۋىرىندە Reuters اگەنتتىگى اقش بارلاۋ دەرەكتەرىنەن حابارى بار ەكى امەريكالىق شەنەۋنىك پەن باتىستىڭ بۇرىنعى بارلاۋ قىزمەتكەرىنە سىلتەمە جاساپ، ۋكرايناعا قارسى سوعىستا رەسەي جاعىندا 100-دەن 200-گە دەيىن قىتايلىق جالدامالى جاۋىنگەرلەر سوعىسىپ جاتقانىن حابارلادى. الايدا بۇل جاۋىنگەرلەردىڭ قىتاي ۇكىمەتىمەن تىكەلەي بايلانىسى جوق، اسكەري دايىندىقتارى دا شامالى، سوندىقتان رەسەي ارمياسىنىڭ اسكەري وپەراتسيالارىنا ايتارلىقتاي اسەر ەتىپ جاتقان جوق، دەپ ناقتىلادى اگەنتتىك.
Reuters دەرەگىنشە، رەسەيدىڭ الدىڭعى شەبىنەن تىس اۋماقتاردا قىتاي اسكەري وفيتسەرلەرى پەكيننىڭ كەلىسىمىمەن ءجۇر جانە شايقاستاردان تاكتيكالىق ساباق الۋدا. اگەنتتىككە سۇحبات بەرگەن تۇلعا: "ولار ول جەردە ناقتى كەلىسىممەن ءجۇر", — دەپ اتاپ وتكەن.
