Altyn-Orda.kz سايتىنىڭ باس رەداكتورى سەرىك مالەەۆ مەملەكەت باسشىسى قاسىم-جومارت توقاەۆتىڭ اتىنا اشىق ۇندەۋ جولداپ، «ادىلەتتى قازاقستان» تۇجىرىمداماسىنىڭ كەيبىر وڭىرلەردە جۇزەگە اسپاي، سابوتاجعا ۇشىراپ جاتقانىن مالىمدەدى، دەپ حابارلايدى “ادىرنا”.
مالەەۆ ءوز ۇندەۋىندە الماتى قالاسىندا جەكە ۇيىنە جاپسارجاي سالۋ كەزىندە ورىن العان كەدەرگىلەر مەن قۇقىق بۇزۋشىلىقتار تۋرالى ايتىپ، مەملەكەتتىك ورگاندار مەن جەكەلەگەن ازاماتتاردىڭ ءىس-ارەكەتتەرىن وتكىر سىنعا الدى.
«ءسىز «ادىلەتتى قازاقستاندى» قۇرۋ تۋرالى باستاما كوتەرگەن كەزدە قوعامدا ءۇمىت وتى جاندى. بىراق جەرگىلىكتى جەرلەردە بۇل يدەيا كوپ جاعدايدا نەمقۇرايدىلىققا نەمەسە اشىق قارسىلىققا تاپ بولۋدا»، — دەلىنگەن ۇندەۋدە.
مالەەۆ الماتى قالاسىنىڭ بۇرىنعى باس ساۋلەتشىسى اسلامبەك احمەدجانوۆتىڭ 11 جىلعا سوتتالعانىن مىسالعا كەلتىرىپ، بۇل وقيعانى «جۇيەلى جەمقورلىقتىڭ» كورىنىسى دەپ سيپاتتادى. ونىڭ ايتۋىنشا، احمەدجانوۆ مەملەكەتتىك جەرلەرگە جەكە مەنشىكتەي قاراعان، جوبالار مەن رۇقساتتاردى «ادالدىق پەن پارا» نەگىزىندە تاراتقان.
«سۇراق تەك ونىڭ جەكە باسىندا ەمەس. ونىڭ ماڭايىنداعى شەنەۋنىكتەر قايدا قارادى؟ ولار نەگە ءۇنسىز قالدى؟ ەگەر ولار ءالى دە قىزمەتتە بولسا، بۇگىن سول ەسكى پرينتسيپتەرمەن جۇمىس ىستەۋىن جالعاستىرىپ جاتقان جوق پا؟» — دەپ جازادى باس رەداكتور.
سەرىك مالەەۆتىڭ ايتۋىنشا، 2024 جىلى ول جاپسارجاي سالۋعا رەسمي رۇقسات العان. الايدا كورشىسى تاتيانا كوزىرەۆا تاراپىنان كوپتەگەن شاعىم مەن قىسىمعا تاپ بولعان. ونىڭ شاعىمدارىنىڭ نەگىزىندە

«ساۋلەت بولىمىندەگى ماماندار كورشىمنىڭ سوزىنە سۇيەنىپ، رۇقسات بەرمەي قويدى. بۇعان قوسا، كوزىرەۆا پوليتسيامەن بىرگە ۇيىمە زاڭسىز كىرىپ، ۆيدەوتۇسىرىلىم جاسادى. بۇل كونستيتۋتسيانىڭ 18 جانە 25 باپتارىنا قايشى ارەكەت»، — دەيدى ول.
مالەەۆ بۇل جاعدايدىڭ ءوز دەنساۋلىعىنا دا اۋىر اسەر ەتكەنىن ايتادى. قۇقىقتىق قىسىم مەن سترەسس سالدارىنان ول اۋرۋحاناعا تۇسكەنىن، ءتىپتى دارىگەرلەر تىك ىشەكتىڭ قاتەرلى ىسىگىن انىقتاعانىن جەتكىزدى. ونىڭ جۇبايى دا وسى وقيعالاردان كەيىن گيپەرتونيالىق داعدارىسقا ۇشىراپ، اۋرۋحاناعا جەتكىزىلگەن.
«1937 جىل قايتا ورالعانداي»
مالەەۆ ءوز ۇندەۋىندە جەكە وقيعاسىن وتباسىلىق تاريحپەن سالىستىرا وتىرىپ، 1930–1937 جىلدارداعى ساياسي قۋعىن-سۇرگىنمەن پاراللەل جۇرگىزەدى. ول مۇنداي وقيعالار بۇگىنگى تاۋەلسىز قازاقستاندا ورىن الۋى — وتە الاڭداتارلىق جايت دەپ باعالايدى.
سەرىك مالەەۆتىڭ ۇندەۋىندەگى نەگىزگى تالاپ — ادىلەتتىلىكتىڭ تەك دەكلاراتسيادا ەمەس، ناقتى ارەكەتتە كورىنىس تابۋى. ول جەرگىلىكتى اتقارۋشى ورگاندار مەن قۇقىق قورعاۋ قۇرىلىمدارىنداعى باسسىزدىق پەن بايلانىسقا نەگىزدەلگەن شەشىمدەردى توقتاتىپ، ازاماتتاردىڭ قۇقىقتارىنىڭ شىنايى قورعالۋىن سۇرايدى.
«ەگەر قاراپايىم ازامات ءوز ۇيىندە، ءوز جەرىندە قورعالماسا، وندا «ادىلەتتى قازاقستان» تەك ۇران بولىپ قالماي ما؟» — دەپ تۇيىندەيدى ول ءوز ۇندەۋىن.