مەملەكەت باسشىسى قاسىم-جومارت توقاەۆ امەريكالىق The Hill ساياسي باسىلىمىنا ارنايى ماقالا جاريالاپ، بىرىككەن ۇلتتار ۇيىمىن (بۇۇ) جاڭعىرتۋ جانە كوپجاقتى ىنتىماقتاستىقتى كۇشەيتۋ قاجەتتىگىن ايتتى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ پىكىرىنشە، بيىل 80 جىلدىعىن اتاپ ءوتىپ جاتقان بۇۇ ادامزات تاريحىنداعى ەڭ ىقپالدى حالىقارالىق ۇيىم رەتىندە ماڭىزدى ءرول اتقارىپ كەلەدى. الايدا قازىرگى كۇردەلى گەوساياسي جاعدايدا ونىڭ جۇمىسى ءجيى سىنعا ۇشىراۋدا.
«بۇۇ-نىڭ قاۋىپسىزدىك كەڭەسىندەگى ۆەتو قۇقىعى ۇيىم جۇمىسىن ءجيى تۇيىققا تىرەيدى. سونىمەن قاتار، افريكا، ازيا جانە لاتىن امەريكاسى سەكىلدى وڭىرلەردىڭ دامۋشى جانە ورتاشا دەرجاۆالارى جاھاندىق شەشىم قابىلداۋ ۇدەرىسىنە جەتكىلىكتى تۇردە تارتىلماعان»، – دەدى توقاەۆ.
ونىڭ ايتۋىنشا، بۇۇ-نى اينالىپ ءوتۋ ەمەس، ونى زاماناۋي الەمگە بەيىمدەپ جاڭعىرتۋ كەرەك. بۇل ءۇشىن بۇۇ-نىڭ قۇرىلىمدارىن ايماقتىق باسىمدىقتارعا كوبىرەك اشىق ەتۋ، ورتاشا دەرجاۆالار مەن دامۋشى ەلدەردىڭ ءرولىن ارتتىرۋ قاجەت.
پرەزيدەنت ناقتى مىسال رەتىندە الماتىدا ورتالىق ازيا مەن اۋعانستانعا ارنالعان تۇراقتى دامۋ ماقساتتارى بويىنشا بۇۇ وڭىرلىك ورتالىعىنىڭ قۇرىلۋىن اتادى. بۇل ورتالىق – 2024 جىلدىڭ 4 ناۋرىزىندا بۇۇ باس اسسامبلەياسى قابىلداعان رەزوليۋتسيا نەگىزىندە اشىلىپ وتىر.
«بۇل باستاما ءوڭىر ەلدەرىنە كليماتتىڭ وزگەرۋى، ەكونوميكالىق ىقپالداستىق جانە سۋ قاۋىپسىزدىگى سەكىلدى ورتاق سىن-قاتەرلەردى بىرىگە شەشۋگە مۇمكىندىك بەرەدى. تۇراقتى دامۋ ماقساتتارىن جەرگىلىكتى دەڭگەيدە جۇزەگە اسىرۋعا جول اشادى»، – دەدى پرەزيدەنت.
توقاەۆ ءوز ماقالاسىندا قازاقستاننىڭ اۋعانستانمەن ارىپتەستىك، گۋمانيتارلىق كومەك، جاستاردى وقىتۋ جانە ساۋدا-ەنەرگەتيكالىق ىقپالداستىق ارقىلى وڭىرلىك تۇراقتىلىققا قوسقان ۇلەسىن دە اتاپ ءوتتى. ونىڭ پىكىرىنشە، ايماقتىڭ بولاشاعىن سول ءوڭىردىڭ تۇرعىندارى قالىپتاستىرۋى كەرەك.
«قازاقستان سيريا بويىنشا استانا پروتسەسىنىڭ مودەراتورى بولدى، ارمەنيا مەن ازەربايجان اراسىنداعى بەيبىت كەلىسسوزدەرگە ىقپال ەتتى، سونداي-اق ۋكرايناداعى سوعىسقا قاتىستى ديپلوماتيالىق شەشىمدەردى قولدايدى»، – دەدى ول.
پرەزيدەنت بۇۇ-نى رەفورمالاۋ بويىنشا باس حاتشى انتونيۋ گۋتەررەش ۇسىنعان UN80 باستاماسىن دا قولدايتىنىن مالىمدەدى. بۇل باستاما ۇيىمنىڭ تيىمدىلىگىن ارتتىرۋ مەن ونىڭ ميسسياسىن جاڭعىرتۋعا باعىتتالعان.
ماقالا سوڭىندا قاسىم-جومارت توقاەۆ بۇۇ-نىڭ بولاشاعى تەك ونى جاڭعىرتۋ ارقىلى جارقىن بولاتىنىن ايتا كەلە، قازاقستان يادرولىق قارۋسىز الەمدى قالىپتاستىرۋ جولىندا بەلسەندى بولا بەرەتىنىن جەتكىزدى.
«حالىقارالىق قاۋىمداستىق بۇۇ-دان باس تارتپاۋى ءتيىس. كەرىسىنشە، ونى رەفورمالاپ، كۇشەيتۋى كەرەك. بۇۇ – ادامزاتقا قاجەت جالعىز امبەباپ ۇيىم. وعان بالاما جوق»، – دەدى پرەزيدەنت.
