- «قازاقستان» ۇلتتىق ارناسىنان وسى ماۋسىمدا اشىلعان «ساز تولعاۋ» باعدارلاماسىن ءجۇرگىزە باستادىڭىز. جاڭا جوبانىڭ جاڭالىعى نەدە؟
- «ساز تولعاۋ» باعدارلاماسىنا كوپتەن بەرى تەلەارنادا تەر توگىپ، وسىعان دەيىن «دالا دۋمان»، «امانات»، «سەگىز قىرلى» باعدارلامالارىن اشقان ۇلتتىق مادەنيەتىمىزدىڭ جاناشىرى، مۋزىكاتانۋشى، عالىم ساعاتبەك قاليەۆ شاقىرعان ەدى. وزدەرىڭىز كورىپ جۇرگەندەي، ۇلتتىق كلاسسيكالىق ونەرگە ارنالعان «سەگىز قىرلى» حابارىنىڭ تەلەۆيزيالىق ءتۇسىرىلىمىنە كوبىنە جاستار، ستۋدەنتتەر قاتىسادى. كەيىنگى كەزدەرى عانا ونەر بيىگىندە جۇرگەن تانىمال ورىنداۋشىلارىمىز شاقىرىلاتىن بولدى. ال «ساز تولعاۋدا» كورەرمەن ءبىراز ۋاقىتتان بەرى ەفيردەن جوعالتىپ العان، ءبۇگىندە استانا قالاسىنداعى قازاق ۇلتتىق ونەر ۋنيۆەرسيتەتىندە ءدارىس بەرەتىن ءدۇلدۇل ءانشى قايرات بايبوسىنوۆ، تۇركىستاندا ەڭبەك ەتىپ جاتقان قازاقستاننىڭ حالىق ءارتيسى قاجىبەك بەكبوسىنوۆ، ماڭعىستاۋداعى جىر-تەرمەنىڭ مايتالمانى اماندىق كومەكوۆ، بال بارماق كۇيشى سەرجان ءشاكىراتوۆ سياقتى ءداستۇرلى ونەردىڭ جۇگىن ارقالاپ جۇرگەن مايتالماندارىمىزبەن قاۋىشادى. حالىق الدىڭعى تولقىننان، ولاردىڭ ءىزىن وكشەلەي باسىپ كەلە جاتقان ورتا بۋىن وكىلدەرىنەن قول ءۇزىپ قالعانى راس. كەزىندە عاريفوللا قۇرمانعاليەۆ، جۇسىپبەك ەلەبەكوۆ، ماناربەك ەرجانوۆتاردى ەل-جۇرت راديودان تىڭداپ، قۇلاعدار بولسا، قازىرگىلەردى كىم ىزدەپ بارىپ، جازىپ جاتىر؟ ءبىزدىڭ ماقساتىمىز — سول كىسىلەردى حالىققا كورسەتۋ، شىعارماشىلىعىن ناسيحاتتاۋ، ۇلتتىق ونەرىمىزدى دارىپتەۋ.
- كوپشىلىك تۇسىنە الماي ءجۇر، ستۋدياداعى كورەرمەن نەگە ورىندى-ورىنسىز ءجيى قول شاپالاقتايدى؟
- ءبىزدىڭ قوناقتارىمىزدىڭ ونەرلەرى كورەرمەن كوڭىلىنە ۇناپ، اراسىندا وزدەرى دە باعدارلاماعا اتسالىسىپ، قولپاشتاپ وتىرسا، ءتۇسىرىلىم قىزىقتى ءارى كوڭىلدى وتەدى. ەگەر، كەرىسىنشە ءبىرى تەلەفونىن شۇقىلاپ، ءبىرى اسپانعا قاراپ، ساعىزىن شايناپ نەمەسە ءبىر-بىرىنە اڭگىمە ايتىپ وتىرسا، «ساز تولعاۋعا» كەلگەن ادامنىڭ دا، كورگەن ادامنىڭ دا ءىشى پىسىپ كەتپەي مە؟
- ارينە، جاستاردىڭ بەلسەندىلىك تانىتقانى دۇرىس قوي. ءدۇيسەنبەك ومىراليەۆ كەنەن اتامىزدىڭ «كوك شولاعىن» كەلىستىرىپ ايتقاندا، وعان قول ۇرىپ، قوشەمەتتەپ، ىقىلاس تانىتپاي قاراپ وتىرا المايسىڭ. بىراق ايگۇل ءۇلكەنباەۆا ورىنداعان دينانىڭ «بۇلبۇلى» مەن ءبىلال ىسقاقوۆ تاريحىن تاراتا ايتىپ، تارتىپ بەرگەن تولەگەن مومبەكوۆتىڭ «سالتانات» كۇيى كوڭىل كوتەرەتىن كۇي ەمەس قوي…
- كورەرمەنگە «سىزدەر قول شاپالاقتاماڭىزدار، قويىڭىزدار، دوعارىڭىزدار» دەپ ايتۋعا بولماس. ءداستۇرلى ونەردى ۇيىپ تىڭداپ جۇرگەن ازاماتتارعا بۇل وعاش كورىنۋى دە مۇمكىن. بىراق دەگەنمەن دە باعدارلاماعا عىلىمي ءتۇپ-تامىرىن تەرەڭنەن الاتىن مادەنيەتىمىزدى كۇرت وزگەرتىپ جىبەرەتىن دۇنيە دەپ قاراماعان ءجون. بۇل — تەلەۆيزيالىق باعدارلاما، ەفيرگە شىققاننان كەيىن، ون مىڭداعان ادام كورەدى. تارتىمدى، بىردەن كىسىنى ءۇيىرىپ اكەتەتىندەي مۋزىكالىق شوۋ بولۋى ءتيىس. مەن دە ءداستۇردىڭ ءىشىندە تالاي جىلدان بەرى بىتە قايناسىپ كەلە جاتقانداردىڭ ءبىرىمىن. ەگەر سول ورىنداۋشىلاردىڭ ءبىر ءوزىن ورتاعا وتىرعىزىپ قويىپ، ءبىر ساعاتتىق كونتسەرتىن جازدىرتساق، 15-20 مينۋتتان كەيىن، «باسقا ارنالاردا نە بولىپ جاتىر؟» دەپ قىزىعىراق بىردەڭە ىزدەۋىڭىز كادىك. شىنايى ونەرگە بەرىلگەن ادام بولسا، ارينە، ول راحاتتانىپ تاماشالايدى. ءبىز باتىسقا ەلىكتەپ بارا جاتقان باسقا دا تىڭداۋشىنىڭ نازارىن ۇستاپ تۇرۋىمىز كەرەك قوي. كورەرمەن تارتۋ قاجەت. قازىرگى جاس بۋىن تەك شەتەلدىك مۋزىكالىق ارنالاردى كورەدى. قۇرمانعازىنىڭ، داۋلەتكەرەيدىڭ، ءتاتتىمبەتتىڭ كۇيىن، اقان سەرى، ءبىرجان سال، ۇكىلى ىبىرايدىڭ اندەرىن تىڭداپ، قۇلاعىنا ءسىڭىرىپ جاتىر دەگەن ءسوزدى ماعان سەنىممەن ايتىڭىزشى…
بىزدە ءبىر ۇلتتىق دۇنيە جارقىراپ شىقسا، سونى ءبارى جان-جاقتان «اناۋسى وپاق، مىناۋسى سوپاق» دەپ سىناي باستايدى. تيتتەي باعدارلاما مادەنيەتتىڭ بۇكىل جۇگىن كوتەرەتىندەي… ال ەگەر ول بولماسا «بىزدە تۇك جوق» دەپ تاعى ايعايعا باسادى. سوندىقتان قايتالاپ ايتا كەتەيىن، بۇل — تەك تەلەۆيزيالىق جوبا. سول ارقىلى ۇلتتىق ونەردىڭ تۋىن كوتەرۋ.
- «جوقتان بار جاقسى» دەيسىز عوي…
- ارينە، «سەگىز قىرلى» ەڭ العاش تۇساۋىن كەسكەن كەزدە دە بۇكىل ونەر ادامدارى «بۇل نە؟» دەپ ءتۇسىنبەگەن. بىراق ۋاقىت وتە كەلە، حالىق وعان قانىعىپ، جاي-جاپسارىن باعامداپ «مىناۋ ءبىر كەرەمەت دۇنيە ەكەن عوي» دەپ، قۇلاق تۇرە باستادى. جالعىز «ساز تولعاۋ» ەمەس، كەز كەلگەن باعدارلامانىڭ جاڭادان باستالعان كەزدە، وي-شۇقىرى بولادى. سوسىن وزىندىك جولىن قالىپتاستىرعاننان كەيىن، وزىمەن-ءوزى جايلاپ ءبىر ىزگە تۇسەتىن كۇن تۋادى.
- «ارناۋ» ءبولىمى جاقسى ويلاستىرىلعان ەكەن…
- جالپى، باعدارلاما «باستاۋ»، «ارناۋ»، «سامعاۋ»، «تولعاۋ» دەپ اتالاتىن ءتورت بولىمنەن تۇرادى. ءبىر ءانشى، ءبىر كۇيشى شاقىرىلادى. «باستاۋدا» ءار ورىنداۋشى ءوزىنىڭ تولقۇجاتىنا اينالعان شىعارمادان باستاسا، «ارناۋدا» ارىپتەسىنىڭ بولمىسىنا، مىنەزىنە، جاسىنا ساي كەلەتىن ءوز رەپەرتۋارىنداعى ءبىر تۋىندىنى ارنايدى. «سامعاۋدا» كورەرمەندەردىڭ سۇراعىنا جاۋاپ بەرىپ، «تولعاۋدا» تولعاندىرىپ ءجۇرگەن، كوپتەن كوكەيلەرىندە ءجۇرگەن كوكەيكەستى ويلارىن ورتاعا سالادى. ونەر يەسىنىڭ ءبىز بىلمەيتىن قىرلارى اشىلادى. ءانشى مەن كۇيشى ءبىر-بىرىنە دەگەن، شىعارماشىلىعىنا دەگەن كوزقاراستارىن، قۇرمەتتەرىن كورسەتەدى.
ۇلتتىق مۋزىكامىزدىڭ ءتوڭىرەگىندە ءسوز قوزعالىپ، ءانىمىز ايتىلىپ، كۇيىمىزدىڭ تارتىلىپ جاتقانى جامان با؟! ءبىز وسىنداي باعدارلامالار ارقىلى كەيىنگى تولقىننىڭ ساناسىنا ساۋلە ءتۇسىرەمىز. ءداستۇرىمىز بەن مادەنيەتىمىزگە ەرتەڭگى تىڭدارماننىڭ نازارىن اۋدارامىز. ۇلتجاندى ۇرپاق تاربيەلەيمىز.
- اڭگىمەمىز ءوز-وزىنەن ۇرپاق تاربيەسىنە ويىسىپ كەلە جاتقان ءتارىزدى. ءسىزدىڭ ۇلتتىق «مۇراگەر» باعدارلاماڭىزدىڭ جۇزەگە اسۋ بارىسى قالاي؟
- مەن — پەداگوگيكالىق جانە كونتسەرتتىك قىزمەتتى بىرگە الىپ جۇرگەنىممەن، نەگىزىنەن كوپ جىلعى ەڭبەگىمدى ءبىلىم سالاسىنا ارناعان اداممىن. 1985 جىلدان باستاپ، زەرتتەۋ جۇمىستارىمەن اينالىسىپ، جالپى ءبىلىم بەرەتىن مەكتەپتەردە وقۋشىلاردىڭ بويىنا ۇلتتىق مادەنيەتتى ءسىڭىرۋدىڭ وزىق ءادىستەمەلەرىن ويلاپ تاۋىپ، ءالى كۇنگە جالعاستىرىپ كەلە جاتىرمىن. «مۇراگەر» باعدارلاماسىن ءتۇسىندىرۋ ءۇشىن باستاپقىدا ون جىلدان استام ۋاقىت مەكتەپتەرگە بارىپ، اقىسىز جۇمىس ىستەدىم. تەلەارناعا بالالاردى تاسىپ، «دومبىرا ۇيرەنەيىك» باعدارلاماسىن اشتىم. وسى ءىزدەنىستەردىڭ ناتيجەسىندە «مۇراگەر» باعدارلاماسى بويىنشا وقۋلىقتار، ادىستەمەلەر جاسالىپ، مۇعالىمدەرگە ارنالعان كومەكشى وقۋ قۇرالدارى جارىققا شىقتى.
ءبىر سوزبەن ايتقاندا، ءبىز قازاق مەكتەپتەرىنە ارنالعان ۇلتتىق مۋزىكا كىتابىن دايىندادىق. بۇل كىتاپ ارقىلى وقۋشىلار دومبىرا ۇيرەنىپ، جىراۋلاردىڭ تەرمە-تولعاۋلارىمەن تانىسىپ، تۇرمىس-سالت جىرلارىن، ايتىس ونەرىن، حالىق كومپوزيتورلارىن ءبۇگە-ءشىگەسىنە دەيىن ءبىلىپ شىعاتىن بولادى. سونداي-اق الەم حالىقتارىنىڭ مۋزىكاسىن، ءتۇبى ءبىر تۋىستاس، تۇركى تەكتەس حالىقتاردىڭ ەپوستىق جىرلارىنىڭ سىرىن اشادى. الەم حالىقتارىنىڭ بي ونەرى ارقىلى ولاردىڭ ءداستۇرى مەن مىنەز-قۇلقىن تانيدى. كوپتەگەن مۋزىكالىق اسپاپتاردىڭ سىرلى ءۇنىن ەستىپ، ءسان-سالتاناتى جاراسقان ەڭ وزىق وپەرا تەاترلارىنا ساپار شەگەدى. وپەرا مەن بالەت ونەرىن ءتۇسىنۋدى ۇيرەنەدى.
الايدا ءبىزدى مەملەكەت ەمەس، حالىقارالىق «اگا حان» قورى قارجىلاندىرىپ وتىر. وسى باعدارلاما اۆتورلارىنىڭ ءبىرى» — جىرشى ۇلجان بايبوسىنوۆا امەريكاعا كونتسەرتتىك ساپارمەن بارعان كەزىندە، ۇيىم وكىلدەرىمەن تانىسىپ، جوباعا تارتىپ، سول كىسىلەردىڭ كومەگىنىڭ ارقاسىندا سوڭعى 10-15 جىلدا سەكسەننەن اسا مەكتەپكە دومبىرا جاساتىپ، كىتاپتارىمىزدى تاراتتىق. ەلەكتروندى وقۋلىقتارىمىز، سد ديسكىلەرىمىز جازىلدى. قازىرگى ەسەبىمىز بويىنشا، ەلىمىزدىڭ 80 ءبىلىم وشاعىندا 15 مىڭ بالا «مۇراگەر» باعدارلاماسىمەن وقىتىلىپ ءجۇر.
ءتىپتى وسى «مۇراگەر» باعدارلاماسى نەگىزىندە وسكەمەندەگى ءبىر مەكتەپ ءبىر سىنىپتى الىپ، ەكسپەريمەنت جاساپتى. پسيحولوگ مامانداردىڭ ارنايى زەرتتەۋى مەن ساراپتاماسى ءبىزدىڭ ادىستەمەمەن وقيتىن بالالاردىڭ بۇكىل پاننەن وتىز پايىز جوعارى دەڭگەي كورسەتكەنىنە كوز جەتكىزىپ وتىر. ياعني باسقالارمەن سالىستىرعاندا، بۇل بالالاردىڭ شىعارماشىلىق قابىلەتى جوعارى. مەيلى، ولار ەرتەڭ فيزيك، حيميك، بيولوگ، ماتەماتيك بولسىن، شىعارماشىلىق ىزدەنىسى ءبارىبىر باسقالاردان ءبىر ساتى بيىك بولادى. جاڭالىق اشادى. تۇبىندە جارىپ شىعادى. مۇنىڭ ءبارىن ءبىز وڭايلىقپەن جۇزەگە اسىرىپ وتىرعان جوقپىز. قيىندىعى كوپ.
- باستى قيىندىق نەدە بولىپ تۇر؟
- بىزدەگى ەڭ قيىن پروبلەما — قازىر وسىنى مەملەكەتتىك ستاندارتقا ەنگىزۋ. مەملەكەت بۇل جۇمىستاردى ءوز موينىنا الماسا، ءبىز قاشانعا دەيىن وسىلاي ءار شەتەلدىكتەن اقشا سۇراپ، «قازاقتىڭ قاراكوزدەرىنە دومبىرا جاساپ بەرىڭىزشى، وقۋلىققا كومەكتەسىڭىزشى» دەپ جالىنىپ جۇرەمىز؟! بۇل مەملەكەتتىڭ ءىسى ەمەس پە؟! ۇلتىمىزدىڭ ءىسى ەمەس پە؟! جىلدا مينيستر اۋىسادى. مينيسترلىكتىڭ تابالدىرىعىن توزدىرىپ بولدىق. ءبىرىنە جەتەم دەگەنىڭشە، ەكىنشىسى كەلەدى. وسىنى ءبىر جولعا سالىپ، جوعارى جاقتا پروبلەما قىلىپ كوتەرىپ، دەپۋتاتتىق ساۋال جولداپ، قولدانىسقا ەنگىزۋ كەرەك.
- جالپى ءبىلىم بەرەتىن مەكتەپتىڭ 5-سىنىبىنا ارنالعان مۋزىكا وقۋلىعىن اشىپ قاراساق: - «ەرجۇرەك گاگارين مەن تيتوۆتارداي، تورىندە كوسموستىڭ شارىقتايمىز» دەگەن ولەڭ ءجۇر. ياعني قازىرگى ءبىلىم جۇيەسى بالالارعا توقتار ءاۋباكىروۆ پەن تالعات مۇساباەۆتى ەمەس، ءالى كۇنگە كەڭەستىك باتىرلاردى ۇلگى ەتىپ كەلەدى. بۇعان نە دەيسىز؟
- مەنىڭ شىرىلدايتىنىم وسى عوي. «جاھاندانۋ زامانى» دەپ كورىنگەننىڭ كوشىنە ىلەسىپ كەتە بەرسەك، ءبىر ۇرپاقتان كەيىن ماڭگۇرت ەلگە اينالامىز.
«مۋزىكا ءتىلى — ورتاق» دەيتىندەر بار. مەنىڭ ويىمشا، بۇل ءپىكىر دۇرىس ەمەس. ارينە، تىڭدايسىڭ، قىزىعاسىڭ، بىراق نەگە ءبىز قىتايدىڭ، جاپونداردىڭ تۋىندىلارىن ۇيدە راحاتتانىپ جاتىپ، تىڭداي المايمىز؟ سەبەبى قانىمىزدا جوق. ءبىز ۇلتتىق مۇرامىزبەن عانا راحاتتانا الامىز.
ءتول مۋزىكامىزدى بالالارىمىز 12 جاسقا دەيىن بويىنا ءسىڭىرمەسە، ءارى قاراي زورلاساڭ دا قابىلداي المايدى. وسىنى بىلەتىن جاپوندار 12 جاسقا دەيىن ۇل-قىزدارىنا تەك ءوز مۋزىكاسىن تىڭداتىپ، ءوز تىلىندە وقىتادى ەكەن. ءبىزدىڭ دە بالامىز ءوز مادەنيەتىن، ءوز تاريحىن وقىسىن. ءتىلدىڭ پروبلەماسىنان ءداستۇر مەن مۋزىكانى ءبولەك الىپ قاراۋعا بولمايدى.
ەلباسى وسكەمەنگە جۇمىس ساپارىمەن بارعان ۋاقىتتا «مۇراگەر» باعدارلاماسى بويىنشا وقيتىن 1000 بالا پرەزيدەنتتىڭ الدىندا «سارىارقا» كۇيىن ورىنداپتى. وسىنداي دەڭگەيگە جەتكەن بالادان ەرتەڭ جاماندىق شىعا ما؟! اقتامبەردى، بۇحار، بازار، نۇرتۋعان، اقتان جىراۋدى جاتتاپ وسكەن ۇرپاق ۇرلىق جاساپ، بىرەۋدىڭ الا ءجىبىن اتتاي ما؟! قىرعىزدار، ءتاجىكتەر، وزبەكتەر ءبىز جاساعان ءادىستەمەلەرىن كەلىپ الىپ، ەستەرى شىعىپ جاتىر. بىزدىكىلەر بولسا، ءۇن-ءتۇنسىز. 20 جىلدان بەرى سىناقتان دا، ءتاجىريبەدەن دە ءوتىپ، ساقاداي-ساي دايىن تۇر. تەك نۇسقاۋ بولسا، بولعانى. ازىرگە جابۋلى قازاننىڭ قاقپاعىن ەشكىم اشقىسى كەلمەيدى. جوعارى جاقتان ەشكىم وسىعان بەل شەشىپ، كىرىسكىسى جوق. احمەت بايتۇرسىنوۆ، تۇرار رىسقۇلوۆ سياقتى الاش ارىستارى ءوز ورتامىزدان تابىلماي ما، سوندا؟ قايدا بارىپ ايتساق تا جاڭعىرىق شىقپايدى. باياعى جارتاس، سول جارتاس.
- قازىرگى مينيسترگە بۇل جايتتى جەتكىزۋگە تاعى ءبىر ۇمتىلىس جاساپ كورمەدىڭىز بە؟
- ءبىزدى ءمينيستردىڭ قابىلداۋىنا كىرگىزبەيدى عوي. جازعان حاتىڭ جەتپەي، جارتى جولدان قايتادى. ونداعى ماماندار «نەگە بەتحوۆەن، شوستاكوۆيچ جوق؟» دەپ شىعادى. ميى قالىپتاسپاعان بالاعا شوستاكوۆيچتى قالاي وقىتاسىڭ؟ سوندىقتان ەندىگى ءۇمىت — باق وكىلدەرىندە. ارىپتەستەرىڭىز وسى ماسەلەنى دۇركىن-دۇركىن جازىپ، ءدۇمپۋ جاساسا، سوندا سەڭ قوزعالىپ قالار…
- كەشىرىڭىز، مەن ءبىر نارسەنى ءتۇسىنبەي وتىرمىن. ەگەر مينيسترلىكتىڭ رۇقساتى جوق بولسا، 80 مەكتەپتەگى 15 مىڭ بالانى سىزدەر قالاي وسى باعدارلامامەن وقىتىپ جاتىرسىزدار؟
- مينيسترلىكتىڭ رۇقساتى بار. بىراق وسى وقۋلىقتى ستاندارتقا ەنگىزىپ، قارجىلاندىرماي وتىر. ءبىز قاشانعى شەتەلدەن دەمەۋشى ءىزدەۋىمىز كەرەك؟! مۇنى اينالىپ كەلگەندە، مەملەكەت قولعا الۋى كەرەك. جىلدا جۇزدەي مۇعالىمدەردى ءوزىمىز جيناپ، سەمينارلار وتكىزەمىز. باعدارلامانىڭ بارىسىن تالقىلايمىز. ۇستازداردىڭ بىلىكتىلىگىن كوتەرەمىز. وقۋلىق كەرەگىنە وقۋلىقپەن، دومبىرا كەرەگىنە دومبىرامەن قامتاماسىز ەتەمىز.
الداعى 7-8-9 قاراشادا №172 مەكتەپتە «مۇراگەر» باعدارلاماسى بويىنشا كەزەكتى سەمينار ۇيىمداستىرماقشىمىز. سول جەرگە ەگەر باق وكىلدەرى كەلىپ، ناسيحاتتاسا، قوعامعا وي سالسا، بيلىكتى وياتسا، مىقتى بولار ەدى.
- ال مۋزىكا ءپانىنىڭ مۇعالىمدەرىن دايارلايتىن جوعارى وقۋ ورىندارىندا، ارنايى مۋزىكالىق مەكتەپتەردە قاي اسپاپتا ويناسا دا نەگە فورتەپيانو مەن حور مىندەتتى تۇردە قاتار جۇرەدى؟ ولاردىڭ ورنىنا دومبىرانى مىندەتتەۋگە نە كەدەرگى؟
- مەن وسى ماسەلەنى ايتىپ كەلە جاتقالى قاي زامان؟! سوڭعى كەزدە تۇسىنگەنىم، جوعارىدا ايتىپ كەتكەنىمدەي، مۇنى تەك قانا باق ارقىلى كوتەرۋ قاجەت. قازىر كوتەرمەسەك، ەرتەڭ كەش بولادى. ءبىز دايىنداعان مۋزىكا وقۋلىعىن اشىپ، قاراپ كورىڭىزدەرشى، ىشىندە بىرەۋىمىزدىڭ ءانىمىز نەمەسە كۇيىمىز بار ما؟ ءوز شىعارمالارىمىزدى تىقپالاپ جاتقان جوقپىز. عاسىرلار بويى كەلە جاتقان تۋىندىلار. اۋىز ادەبيەتى مەن حالىق ءانىمەن، كۇيىمەن تاربيەلەنگەن ۇلتپىز، سونىمەن وستىك. كەشەگى ارىستار، قازىرگى ەلباسىنىڭ ءوزى ۇلتتىق قاينارىمىزدان سۋسىنداپ، قانىپ ىشكەن. كەڭەس كەزىندەگى كىتاپتان، كەڭەستىك وقىتۋ جۇيەسىنەن ارىلىپ، ءوز مۇرامىزدى، ءوز كىتابىمىزدى وقىتۋعا نەگە قۇلىقسىزبىز، وسىنى ۇعا المايمىن. كىمنەن، نەدەن قورقامىز؟ نەگە ستاندارت بويىنشا فورتەپيانو مەن حوردى الدىڭعى ورىنعا شىعارامىز؟ نەگە ستاندارت بويىنشا دومبىرانى ۇيرەنۋگە بولمايدى؟ وسى سۇراققا مەنىڭ دە جاۋاپ العىم كەلەدى.
- دومبىراشى، قازاق ءداستۇرلى مۋزىكاسىن زەرتتەۋشى جانە جيناقتاۋشى رەتىندە تاعى قانداي جۇمىستار اتقارىپ ءجۇرسىز؟
- كونسەرۆاتوريا بىتىرگەننەن كەيىن، ءبىراز ۋاقىت زەرتتەۋشىلىكپەن اينالىستىم. قازانعاپتىڭ «اقجەلەڭ» اتتى كۇيلەرىنىڭ جيناعىن شىعاردىم. ۇلتتىق ءان-كۇيلەر اينالاسىندا فرانتسۋز تىلىندە ءبىر كىتاپ باسىلدى. فرانتسيادا اۆتورلىق ديسكىم جارىق كوردى. «امەريكادا، يسپانيادا، يتاليادا كونتسەرت بەردىم» دەپ، وسىنداي تولىپ جاتقان جەتىستىكتەرىمدى تىزبەلەپ ايتا بەرسەم بولادى. بىراق ونىڭ بارلىعى مەنىڭ قاراقان باسىمنىڭ شارۋاسى، جەكە شىعارماشىلىعىم. ال مەنىڭ بار ارمانىم — ءداستۇرلى ونەر ارقىلى ۇلتجاندى ۇرپاق ءتاربيەلەۋ. بۇكىل قازاق مەكتەبىن ءوز وقۋلىعىمەن جۇمىس ىستەتۋ.
اڭگىمەلەسكەن قانشايىم بايداۋلەت، «ايقىن».