بەلارۋستىڭ "نافتان" جانە "موزىرسكي" مۇناي وڭدەۋ زاۋىتتارى 1 قاڭتاردان باستاپ رەسەيدەن شيكىزات اكەلۋدى توقتاتقانىن حابارلادى. بۇل اقپاراتتى ازاتتىقتىڭ بەلارۋس قىزمەتى تاراتتى.
ماسكەۋ مەن مينسك ءالى كۇنگە دەيىن تاسىمالداناتىن مۇناي باعاسى، بەلارۋس اۋماعى ارقىلى وتەتىن شيكىزات ءترانزيتىنىڭ ءتاريفى جانە رەسەيدىڭ سالىق جۇيەسىندەگى وزگەرىستەرگە بايلانىستى شىعىنعا باتقان بەلارۋستىڭ مۇناي وڭدەۋ زاۋىتتارىنا وتەماقى تولەۋ ماسەلەسى بويىنشا كەلىسىمگە كەلە الماي وتىر.
مۇناي وڭدەۋ زاۋىتتارى 1 قاڭتاردان باستاپ رەسەي شيكىزاتىن تاسىمالداۋدى تولىق توقتاتقانىن، مۇناي كومپانيالارىمەن جاڭا كەلىسىم بولماعانىن ايتتى. "نافتان" مەن "موزىرسكي" وتكەن جىلدان قالعان ونىمدەرمەن جۇمىس ىستەپ جاتىر.
"بەلنەفتەحيم" وكىلى "ينتەرفاكس" اگەنتتىگىنە تاسىمالداۋدىڭ توقتاعانىن راستاپ، زاۋىتتاردىڭ جۇكتەمەسى ازايعانىن ايتتى. رەسەيلىك وپەراتور "ترانسنەفت" وكىلدەرى قازىرگى كەزدە بەلارۋسكە مۇناي تاسىمالداۋ بويىنشا ءوتىنىش تۇسپەگەنىن جەتكىزدى. بىراق ولاردىڭ ايتۋىنشا، بەلارۋس ارقىلى ترانزيتكە شەكتەۋ جوق.
مينسكىگە مۇناي تاسىمالداۋ بويىنشا كەلىسىم مەرزىمى 1 قاڭتاردا اياقتالعان. الايدا تاراپتار تاسىمالداۋ شارتتارى بويىنشا كەلىسىمگە كەلە الماعان. ساراپشىلاردىڭ ايتۋىنشا، بەلارۋس باعانى ارزانداتۋدى سۇراسا، رەسەي مۇنىمەن كەلىسپەيدى. مينسك شيكىزات تاسىمالداۋدىڭ بالاما جولدارىن ىزدەيتىنىن مالىمدەگەن.
كرەملدىڭ ءباسپاسوز حاتشىسى دميتري پەسكوۆ ازىرگە مينسكىمەن كەلىسىم جاسالعان جوق، بىراق ديالوگ ءارى قاراي دا جالعاسا بەرەدى دەدى.
"ازاتتىق" راديوسى
فوتو اۆتورى لاسلو بالوگ (رەيتەر)
