قۇرمەتتى شىمكەنت قالاسىنىڭ تۇرعىندارى!
بارشاڭىزعا بەلگىلى، اعىمداعى جىلدىڭ 16 ناۋرىز كۇنى قر پرەزيدەنتى قاسىم-جومارت توقاەۆ ەل اۋماعىندا توتەنشە جاعداي جاريالادى.
سول ۋاقىتتان باستاپ قر دەنساۋلىق ساقتاۋ مينيسترلىگى كورونوۆيرۋستىڭ تارالۋىن الدىن الۋ بويىنشا بەكىتىلگەن الگوريتمگە سايكەس جۇمىستار اتقارىلىپ جاتىر.
وكىنىشكە وراي، قالامىزدا كورونوۆيرۋس ىندەتىن جۇقتىرعان 2 ازامات تىركەلدى.
قازىرگى ۋاقىتتا ولار شىمكەنت قالاسىنىڭ جۇقپالى اۋرۋلار اۋرۋحاناسىندا وقشاۋلانىپ، ەم قابىلداۋدا. جاعدايلارى تۇراقتى.
ءبىرىنشى ناۋقاس 18 ناۋرىز كۇنى ساعات 17.30-دا نۇر-سۇلتان قالاسىنان «نۇر-سۇلتان-جەتىساي» باعىتىمەن جۇرەتىن 51 ادام مىنگەن اۆتوبۋسپەن كەلگەن.
20 ناۋرىز ساعات 23:30-دا 4 ازامات شىمكەنت قالاسى بەكجان اۆتوۆوكزالىنان ءتۇسىپ، ۇشەۋى تۇركىستان قالاسى باعىتىنا جولعا شىققان. ال، بىرەۋىن اكەسى ءوز كولىگىمەن ۇيىنە جەتكىزگەن. قالعان 47 ازامات جەتىساي باعىتىنا سول اۆتوبۋسپەن ساپارىن جالعاستىرعان.
ال، جامان ىندەتتى جۇقتىرعان ازامات 23 ناۋرىزعا دەيىن ۇيىندە ءوز بەتىنشە ەم قابىلداعان. اۋرۋى اسقىنعاننان كەيىن جەرگىلىكتى امبۋلاتورياعا جوعارى دەنە قىزۋىمەن، باس اۋرۋىمەن، جوتەلمەن شاعىمدانعان.
ناتيجەسەندە وسى ازامات وتباسىمەن ستاتسيونارلىق باقىلاۋعا الىندى. بۇگىن اتالعان ازاماتتىڭ اناسىنان تەست ءاناليزى الىنىپ، وڭ ناتيجە كورسەتىلدى.
شۇعىل تۇردە، ناۋقاستارمەن قارىم-قاتىناستا بولعان 2 — مەديتسينا قىزمەتكەرى وتباسىلارىمەن جانە 5 پوتەنتسيالدى قاتىناستاعى ازاماتتار وقشاۋلانىپ، جۇقپالى اۋرۋلار اۋرۋحاناسىنا جاتقىزىلدى.
بۇگىنگى تاڭدا، نۇر-سۇلتان-شىمكەنت قالالارى مەن تۇركىستان وبلىسىنداعى اتالعان ازاماتپەن بايلانىستا بولعان بارلىق ازاماتتار وقشاۋلاندىرىلىپ، بىرلەسكەن شارالار ۇيىمداستىرىلۋدا.
قازىرگى تاڭدا ىندەتتىڭ الدىن الۋ ماقساتىندا شىمكەنت قالاسىندا ۇزدىكسىز جۇمىستار جۇرگىزىلىپ كەلەدى.
قاۋىپسىزدىك شارالاردىڭ نەگىزگى باعىتتارىنا توقتالىپ وتسەم:
بىرىنشىدەن،
قالاعا كىرەتىن ازاماتتاردىڭ دەنساۋلىعىن تەكسەرۋدەن وتكىزىپ، قاۋىپسىزدىكتى قامتاماسىز ەتۋ ماقساتىندا كىرەبەرىس جول قاقپالارعا 12 سانيتارلىق بەكەتتەر قويىلدى.
بۇعان دەيىن، تەمىرجول ۆوكزالى مەن اۋەجاي دا سانيتارلىق باقىلاۋعا الىنعان.
ەكىنشىدەن،
قالاداعى بازارلاردا، ساۋدا ورتالىقتارىندا، اۆتوبۋستاردا، قوعامدىق ورىنداردا جانە باسقا دا ادامدار كوپ شوعىرلاناتىن جەرلەردە دەزينفەكتسيالىق جۇمىستار كۇنىنە 2 رەت جۇرگىزىلۋدە.
ۇشىنشىدەن،
بارلىق قوعامدىق ورىندارعا بەتپەردەمەن كىرۋ مىندەتتەلدى.
بەتپەردەمەن قامتاماسىز ەتۋ ءۇشىن جەرگىلىكتى كاسىپكەرلەرمەن بىرگە كۇنىنە 100 مىڭنان استام مەديتسينالىق بەتپەردەلەر تىگىلىپ، قالا اۋماعىنداعى ءدارىحانالار مەن بازارلارعا جەتكىزىلۋدە.
سونىمەن قاتار، انتيسەپتيك ونىمدەرىن شىعاراتىن «ورداباسى» يندۋستريالدى ايماعىنداعى كاسىپورىن كۇنىنە 4 توننا زالالسىزداندىرۋ ونىمدەرىن شىعارۋدا.
تورتىنشىدەن،
قاۋىپسىزدىك ماقساتىندا قالا اۋماعىنداعى وقۋ ورىندارىنىڭ بارلىعى دەمالىسقا شىعىپ، قاشىقتان وقىتۋ جۇيەسىمەن جۇمىس جاساۋدا. ال، 26 ناۋرىزدان باستاپ بالاباقشالاردىڭ بارلىعى جۇمىسىن توقتاتاتىن بولادى.
سونىمەن قاتار، قالاداعى تويحانالار، ويىن-ساۋىق ورىندارى تولىعىمەن توقتاتىلىپ، ساۋدا ورتالىقتارى مەن مەيرامحانالاردىڭ جۇمىس ۋاقىتتارى شەكتەلدى.
بەسىنشىدەن،
شىمكەنت قالاسى اكىمدىگى تاراپىنان الەۋمەتتىك ماڭىزى بار تاۋارلاردىڭ باعاسىن تۇراقتى ۇستاپ تۇرۋ بويىنشا ارنايى شتاب قۇرىلىپ، ازىق-تۇلىكتىڭ باعالارىنا كۇندەلىكتى مونيتورينگ جۇرگىزىلۋدە.
بۇگىنگى تاڭدا اسا قاجەتتى 19 ازىق-تۇلىك ءتۇرىنىڭ باعاسىن تۇراقتى ۇستاپ تۇرۋ ءۇشىن 3 ملرد تەڭگەگە جۋىق قارجى قارالدى.
شىمكەنتتە ازىق-تۇلىك قورى جەتكىلىكتى. باعا باقىلاۋدا. سوندىقتان، الاڭداۋعا، ەش نەگىز جوق.
التىنشىدان،
15 ناۋرىزدان باستاپ شىمكەنت قالا ارالىق اۆتوبۋستار ۆوكزالىلىنان جۇرەتىن حالىقارالىق جانە 22 ناۋرىزدان نۇر-سۇلتان مەن الماتى باعىتتارى شەكتەلدى.
بۇگىننەن باستاپ اۆتوبەكەتتەردىڭ جۇمىسى تولىعىمەن توقتاتىلدى.
توتەنشە جاعداي جاريالانۋىنا بايلانىستى بۇگىنگى كۇندە قوعامدىق كولىكتەر باعىتىنىڭ 25 پايىزى ۋاقىتشا قىسقارتىلدى.
جەتىنشىدەن،
قالا اۋماعىندا كوروناۆيرۋس ينفەكتسياسىنىڭ جاپپاي تارالۋ قاۋپى انىقتالعان جاعدايدا ارەكەت ەتۋدىڭ الگوريتمى جاسالىنىپ، اۋرۋلاردى جاتقىزاتىن 170 ورىندىق ينفەكتسيالىق ستاتسيونار قۇرىلدى.
بۇدان باسقا، 680 ورىندىق پروۆيزورلى جانە 1500-گە جۋىق كارانتيندىك ستاتسيونار دايىندالدى.
بۇگىنگى تاڭدا، مەديتسينا قىزمەتكەرلەرى جۇمىسىنا قاجەتتى قۇرال-جابدىقتار مەن دارىلەر تولىعىمەن جەتكىلىكتى.
قاجەتتىلىك بولعان جاعدايدا بۇدان باسقا دا بەكىتىلگەن الگوريتم بويىنشا جۇمىستار جۇرگىزىلەتىن بولادى. بۇگىنگى تاڭدا قالانى تولىق كارانتينگە جابۋعا نەگىز جوق. ماسەلە مەنىڭ جەكە باقىلاۋىمدا.
قالا تۇرعىندارىن اقپاراتپەن قامتاماسىز ەتۋ ماقساتىندا بايلانىس ورتالىعى قۇرىلدى.
قازىرگى تاڭدا، قالا تۇرعىندارى دەنساۋلىق ساقتاۋ مينيسترلىگى ۇسىنعان پروفيلاكتيكالىق شارالاردى قاتاڭ قولدانۋىمىز قاجەت.
توتەنشە جاعدايدا ءاربىر تۇرعىننىڭ قاۋىپسىزدىگى ماڭىزدى. سوندىقتان ءبارىمىز ارنايى تالاپتاردى ساقتاۋعا مىندەتتىمىز.
قۇرمەتتى جەرلەستەر!
توتەنشە جاعداي كەزەڭىندە بارلىق ساقتىق شارالارىن قولدانىپ، وزدەرىڭىزدىڭ جانە جاقىندارىڭىزدىڭ قاۋىپسىزدىگى ءۇشىن ۇيلەرىڭىزدە بولۋدى سۇرايمىن. بارلىق جاعدايلارعا تۇسىنىستىكپەن قاراۋلارىڭىزدى وتىنەمىن.
ءبىز بىرگەمىز! ءسىزدىڭ قاۋىپسىزدىگىڭىز، ەلدىڭ قاۋىپسىزدىگى! وسىنى ەستەن شىعارماۋىمىز كەرەك. ءبىز كوروناۆيرۋستىڭ بەلەڭ الۋىنا جول بەرمەۋ ماقساتىندا بارلىق كۇش-جىگەرىمىزدى سالىپ جۇمىس جاسايمىز.
ەل امان، جۇرت تىنىش بولسىن! بۇل قيىندىقتاردى جەڭەتىنىمىزگە سەنەمىن.
نازارلارىڭىزعا راقمەت!
