«ابىلاي حان» كاسىپقوي سپورت كلۋبىندا 15-16 قازان كۇندەرى قازاقستان رەسپۋبليكاسىنا ەڭبەك سىڭىرگەن جاتتىقتىرۋشىلارىنىڭ قۇرمەتىنە كيكبوكسينگتەن مىقتىلار اراسىنداعى ەسكە الۋ ارنالعان تۋرنير بولىپ ءوتتى.
قازاقستان رەسپۋبليكاسىندا كيكبوكسينگتىڭ دامۋىنا ەرەكشە ۇلەس قوسقان جاتتىقتىرۋشىلار قر سپورت شەبەرى، ەڭبەك سىڭىرگەن جاتتىقتىرۋشى ازات نادىربەكوۆ، بوكستان سسسر سپورت شەبەرى، كيكبوكسينگتان حالىقارالىق دارەجەدەگى سپورت شەبەرى، قر ەڭبەك سىڭىرگەن جاتتىقتىرۋشى اسىلكان باسۋرمانوۆ، قر سپورت شەبەرى، حالىقارالىق دارەجەدەگى قازى، قر ەڭبەك سىڭىرگەن جاتتىقتىرۋشى ەلتاي بالتابەكوۆ، قر سپورت شەبەرى، ەڭبەك سىڭىرگەن جاتتىقتىرۋشى پەتر مۋرزوۆ، قر سپورت شەبەرى، حالىقارالىق دارەجەدەگى قازى ياكوۆ كالينين، الەم چەمپيونى، قر ەڭبەك سىڭىرگەن سپورت شەبەرى، ەڭبەك سىڭىرگەن جاتتىقتىرۋشى اسقار كوحانوۆتاردىڭ رۋحىن ەسكە الىپ، تۋرنيرگە قاتىسۋشى سپورتشىلار مەن كورەرمەندەر، ۇيىمداستىرۋشىلار ءبىر ءسات ۇنسىزدىكپەن قۇرمەت كورسەتىپ، بايراقتى باسەكە باستالىپ كەتتى.
جارىستىڭ اشىلۋ سالتاناتىنا قر كيكبوكسينگ فەدەراتسياسىنىڭ پرەزيدەنتى ەسەنتاەۆ تاستانبەك قۇتجانۇلى، قر كيكبوكسينگ سپورت ءتۇرىنىڭ نەگىزىن سالۋشى داڭقتى سپورتشىلار سابىرجان ماحمەتوۆ، سانسىزباي ىبىراەۆ، سەكەن مۇحامەتجانوۆ، «ابىلاي حان» كاسىپقوي سپورت كلۋبىنىڭ باسشىسى جومارت سادۋاقاسوۆتار قاتىسىپ، سپورتشىلارعا ساتتىلىك تىلەدى.
ەكى كۇنگە سوزىلعان ءدۇبىرلى دودادا كيكبوكسينگتىڭ فۋلل كونتاكت جانە ك-1 تۇرلەرىنەن جەڭىمپازداردى انىقتادى. ەلىمىزدىڭ ءار ايماقتارىنان 80 سپورتشى قاتىسقان جارىس تارتىستى ءوتتى. سپورتشىلاردىڭ شەبەرلىكتەرى سىنعا تۇسكەن ساتتە ەشكىمدە ايانىپ قالمادى.
ەسەنتاەۆ تاستانبەك قۇتجانۇلى، قر كيكبوكسينگ فەدەراتسياسىنىڭ پرەزيدەنتى: - «مىقتىلار اراسىنداعى تۋرنير بيىل ءتورتىنشى جىل وتكىزىلىپ وتىر. بۇل تۋرنيرعا تەك ەلىمىزدىڭ ەڭ تاڭداۋلى سپورتشىلارى قاتىسادى. ەلىمىز كيكبوكسينگ سپورت تۇرىنەن الەمدەگى ماڭدايالدى ەلدەردىڭ قاتارىنا كىرەدى. الاشتىڭ اتىن الەمگە تانىتىپ جۇرگەن كيكبوكسشىلار از ەمەس. ءبىزدىڭ باستى ماقساتىمىز جاستاردى سالاۋاتتى ومىرگە تاربيەلەپ، دەنساۋلىقتارىن عانا شىڭداپ قويماي، رۋحى بيىك، وتانسۇيگىش، ءبىلىمدى، بىلىكتى ازاماتتاردى قالىپتاستىرۋ. وسى جاستار كەلەشەكتە سپورت سالاسىندا عانا ەمەس، باسقا دا سالالاردا قىزمەت جاساپ، ەلىمىزدىڭ وركەندەۋىنە زور ۇلەس قوساتىندىقتارىنا سەنەمىن».
جارىس قر مادەنيەت جانە سپورت مينيسترلىگى، سپورت جانە دەنە شىنىقتىرۋ كوميتەتىنىڭ، الماتى قالاسى تۇرىكسىپ اۋدانى اكىمدىگى، قر كيكبوكسينگ فەدەراتسياسىنىڭ، «ابىلاي حان» كاسىپقوي سپورت كلۋبىنىڭ قولداۋىمەن وتكىزىلىپ وتىر.
جارىس قورتىندىسى بويىنشا فۋلل كونتاكت تۇرىنەن 51 كگ سالماق دارەجەسىندە سالىمگەرەي ج (اتىراۋ), 54 كگ – شاعبان ە (استانا), 57 كگ – قاناپيانوۆ ا (شقو), 60 كگ – ديۋسۋپوۆ ا (اتىراۋ), 67 كگ – ۋسيپ م (تاراز), 71 كگ – باۋىرجانۇلى ب (شقو), 75 كگ – توقتاروۆ م (قوستاناي), 81 كگ – قاناەۆ ع (وقو) 86 كگ – جاقسەنبي ب (الماتى), 91 كگ – جانتۇرسىنوۆ ا (تاراز) جەڭىمباز بولسا، ك-1 تۇرىنەن 54 كگ – يۆانشەنكو م (شقو), 57 كگ – نازاربەكوۆ ج (اتىراۋ), 60 كگ – فازىلحان ب (استانا), 63,5 كگ – ورىنباي ا (تاراز), 67 كگ – نۇرعاليەۆ ق (شقو), 71 كگ – شىنتەمروۆ ب (قاراعاندى), 75 كگ – ءجۇنىسوۆ ا (قىزىلوردا), 86 كگ – يسكاكوۆ ش (اقتاۋ), +91 كگ – بەكەنوۆ ە (استانا) جەڭىمپاز اتاندى.
جەڭىس تۇعىرىنا كوتەرىلگەندەر باعالى سيلىقتارمەن قوسا ىرىمداپ قازاقتىڭ قايىستان ورىلگەن تاسپا قامشىسى مەن تاستاعى ەجەلگى تاڭبالار سۋرەتتەلگەن كادەسيلار تابىستالدى. بۇل سپورتشىلاردىڭ ەلىمىزدىڭ تاريحىن ءبىلىپ، وسى ەلدىڭ ەگەسى مەن شەگەسى بولىڭدار دەگەن تىلەگى. ەلدىڭ قورعانى اپتال ازاماتتاردىڭ جەڭىستى جولى جالعاسا بەرسىن.
ارداق بەركىمباي
