الماتى وبلىسىندا كولىك جۇرگىزۋ كۋالىگى جوق اۋىل تۇرعىنى ماس كۇيدە بۇقا تاسىعان، - دەپ حابارلايدى "ادىرنا" ۇلتتىق پورتالى Polisia.kz-كە سىلتەمە جاساپ.
20 جەلتوقسانداعى ساعات 08.30-دا الماتى-وسكەمەن تاسجولىنىڭ 230-شاقىرىمىندا كوكسۋ اۋدانىنداعى بالپىق بي اۋىلىندا پوليتسەيلەر Volkswagen Golf كولىگىن توقتاتقان. 31 جاستاعى تۇرعىن ماس ەكەنى انىقتالعان.
ءتارتىپ ساقشىلارى كولىكتىڭ ارتقى جاعىندا جولاۋشى ورنىندا ءتورت ايلىق بۇقا بولعانىن كورگەن.
"جۇرگىزۋشى 2019 جىلى ءۇش جىلعا كولىك جۇرگىزۋ قۇقىعىنان ايىرىلعانى انىقتالدى. بۇل دەرەك سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. ماس جۇرگىزۋشى كورشى اۋىلدا تۇراتىن اعاسىنا بۇقانى اپارىپ بەرمەك بولعان، الايدا ونى پوليتسەيلەر ۇستاپ العان", - دەيدى كوكسۋ اۋداندىق پوليتسيا ءبولىمىنىڭ باسشىسى راميل گيماديەۆ.
اۆتوكولىك ايىپ تۇراعىنا قويىلدى. كۇدىكتىگە كەلۋ تۋرالى مىندەتتەمە تۇرىندە پروتسەستىك ماجبۇرلەۋ شاراسى تاعايىندالدى.
