1 مامىر – بىرلىك كۇنى بالقاش اۋدانى بىرلىك اۋىلىنداعى 10 وتباسى باسپانالى بولدى. «قايىرىمدى ىستەر مارافونى» جالپىۇلتتىق اكتسياسى اياسىندا، بالقاشتىق جاندوس ءابدىجاپپاروۆ 50 ادامعا ءۇيدىڭ كىلتىن تابىستاپ، كوپكە قۋانىش سىيلادى. قايىرىمدىلىق جاساۋدى اسىل قاسيەت دەپ بىلەتىن ازامات اۋىلىنداعى وسى اگروفيرمادا 20 جىلدان استام ەڭبەك ەتىپ كەلە جاتقان اۋىل ازاماتتارىنا تۇرعىن ءۇي سىيلاپ، زور العىس پەن قۇرمەتكە بولەندى. اتاپ ايتساق، 2 كوپبالالى وتباسىنا، 1 ءۇشىنشى توپ مۇگەدەكتىگى بار وتباسىنا، بارلىعى 10 وتباسىنا ءوز دەمەۋشىلىگىمەن تۇرعىن ءۇي كىلتىن تابىستاپ، قۋانىش سىيلادى.
- «وسى شارۋاشىلىقتا جۇمىس ىستەگەنىمىزگە 16 جىل بولدى. سول ۋاقىتتان وسى ۇيدە تۇرىپ كەلە جاتقانبىز. بۇرىن سوۆحوزدىڭ ءۇيى بولعان. ەندى، جەكەمەنشىككە بەرىپ قۋانتىپ جاتىر. جاندوس ءابدىجاپپارۇلىنا راقمەت. وسى ۇيدەن ءوسىپ، ونەيىك»،- دەدى اۋىل تۇرعىنى مۇحتار دۇمشەباەۆ.
جالپى ىنتىماعى مەن بىرلىگى جاراسقان اۋىلدىڭ جاس كاسىپكەر بالاسى جاسىنان ءتورت تۇلىك تۇرىنە ەتەنە جاقىن بولىپ وسكەن. 2015 جىلى «بىرلىك اجا» جشس قۇرىپ، بۇگىن شارۋاشىلىقتىڭ تاسىن ورگە سۇيرەپ كەلەدى. سەرىكتەستىك مال تۇقىمىن كوبەيتۋ مەن اسىلداندىرۋعا كوپ كوڭىل بولەدى. «وتىزدا وردا بۇزباساڭ، قىرىقتا قامال المايسىڭ» دەمەكشى، بالا جاسىنان ەڭبەكتىڭ قارا قازانىندا قايناپ ۇلگەرگەن جاندوس تاۋەلسىزدىكپەن تۇيدەي قۇرداس. قايىرىمدىلىق جاساۋدى جانى سۇيەتىن ازامات 2020 جىلى «اسىل جۇرەك» نوميناتسياسىنىڭ يەگەرى اتانعان.
- «وسىدان 3 جىل بۇرىن 7 باسپانانىڭ كىلتىن اۋىل تۇرعىندارىنا تابىستاعان بولاتىنبىز. مىنە بۇگىن مەرەكە كۇنى تاعى قۋانىشتى جاعداي بوپ جاتىر. مەن تاۋەلسىزدىك قۇرداسى ءارى، ەلىمنىڭ پاتريوتى رەتىندە اۋىلىمنىڭ كوركەيۋىنە تيتتەي دە بولسا ۇلەسىمدى قوسقىم كەلەدى. جاقسىلىق جاساۋ جانىما قۋانىش سىيلايدى»،- دەپ اتاپ ءوتتى «بىرلىك اجا» جشس ديرەكتورى جاندوس ءابدىجاپپارۇلى.
ايتا كەتۋ كەرەك، الماتى وبلىسىندا «قايىرىمدى ىستەر مارافونى» جالپىۇلتتىق اكتسياسى شەڭبەرىندە 600 استام ءىس-شارا ۇيىمداستىرىلعان.
- «الماتى وبلىسىندا 80 ملن. تەڭگەگە 8 مىڭنان استام وتباسىعا ازىق-تۇلىك پاكەتتەرىمەن قولداۋلار كورسەتىلدى. ارى قاراي دا بۇل شارا جالعاساتىن بولادى. قازىر الماتى وبلىسى كولەمىندە 4 مىڭنان استام ۆولونتەر بار. ولاردىڭ بارلىعى دا جىل سوڭىنا دەيىن وسى مارافونعا جۇمىلدىرىلاتىن بولادى»، - دەيدى وبلىستىق جاستار ساياساتى ماسەلەلەرى جونىندەگى باسقارما باسشىسى ەلدار ساپاروۆ.
تاۋەلسىزدىكتىڭ 30 جىلدىعىنا ورايلاستىرىلىپ باستاۋ العان «قايىرىمدى ىستەر مارافونى» ءالى دە جالعاسىن تاپپاق. ايتا كەتەيىك، مارافوننىڭ جالپى ۇلتتىق ماڭىزىن ارتتىرۋعا جاندوس ءابدىجاپپاروۆ سەكىلدى جومارت ازاماتتار اكتسياعا ۇلەس قوسۋ ءۇشىن نيەت بىلدىرۋدە. بۇل ءوز كەزەگىندە شارانىڭ ومىرشەڭ بولۋىنا ىقپال ەتەدى.
