بەكبولات قارجان: وزگەردى الەم، قازاعىم وزگەرمەدى...

3481
Adyrna.kz Telegram
پلانەتانىڭ وركەنيەتتى كوشى سوڭعى كەزدە مۇلدەم جاڭارعان مودەلگە ءوتىپ جاتىر. وركەنيەتتى عىلىم مەن تەحنولوگيانىڭ قوجايىندارى ادامزات بالاسىنىڭ يگىلىگى ءۇشىن قاي جەرگە بولسا دا بارىپ كەلۋدى جەڭىلدەتەتىن تاماشا تەحنولوگيالاردى ومىرگە الىپ كەلۋدە. وسىنداي عىلىم مەن تەحنولوگيانىڭ سالتانات قۇرعان داۋىرىندە قازاق بالاسى ءوزىنىڭ مۇنايى مەن بايلىعىنىڭ راحاتىن كورمەي كەتتى. مۇناي ءداۋىرى كوپ ۇزاماي قۇلايدى.
ايگىلى يلون ماسك مۇناي ءداۋىرىن كوپ ۇزاماي قۇتاتادى. يلون ماسك ەكولوگيالىق تازا ەلەكتروموبيلدەردىڭ كاردينالدى ەراسىنىڭ ەسىگىن اشتى. جاھاننىڭ كەلبەتى كۇن ساناپ ەمەس، ساعات ساناپ وزگەرىپ جاتىر. وزگەرمەي جاتقان تەك قانا رەسەيدىڭ تەگەۋرىنىندەگى ديكتاتورلار باسقارعان مەشەۋ ەلدەر عانا. ونىڭ ىشىندە ءبىز دە بارمىز. قازىر الەمنىڭ كوش باستاعان جاپونيا، وڭتۇستىك كورەيا، اقش، گەرمانيا سياقتى ەلدەرىندە مەرسەدەس، تويوتا، حونداي، شەۆرولەت، ەڭ ۇزدىك مودەلدەگى كولىكتەر ءوز حالىقتارىنا ماقتانىش ەمەس. ولار ءۇشىن ءجاي زات.
جانىڭدى وتتاي كۇيدىرىپ، ءىشىڭدى ۋداي اشىتاتىنى - اتالعان ەلدەر وسىنشالىقتى دەڭگەيگە جەتىپ وتىرعاندا، قازاق بالاسى جەمقور لوببيستتەردىڭ قۇرىپ تاستاعان ۋتيلسبوردىڭ قاقپانى نە ەكەنىن ءالى بىلمەي، وركەنيەتتى ەلدەر ماقتانىش رەتىندە كورمەيتىن كولىكتەرگە قولى جەتە الماي، ورىستىڭ قوقىستارىن ەلىنە تاسىپ ءجۇر. ونىڭ ۇستىنە ەكولوگيالىق تازا كولىكتەر سانالاتىن ەلەكتروموبيلدەرگە دە بىزدە ۋتيليزاتسيالىق الىم ەنگىزگەن.
زامان قايدا، وركەنيەت قايدا بارادى؟ قازاقتىڭ بالاسى قايدا بارادى؟
ءبىزدىڭ حالىق جاڭاشىلدىقتان ۇنەمى ارتتا جۇرەتىن حالىق. ەلەڭ ەتىپ ىزدەنبەيدى. عاسىرلار بودانىنان ساناسى مەن رۋحىنا وتە اۋىر سوققىلار قابىلداعاندىقتان، وسى ۋاقىتقا دەيىن ەسىمىزدى جيناي الماي كەلەمىز. قازىرگى زاماننىڭ اعىمى، تالابى، قوياتىن شارتى - تەك قانا ادامي كاپيتالدى جەتىلدىرۋ ەكەنىن ءبارى بىلەدى. بىراق ول بىزدە ىسكە اسپايدى. ايتىلادى. بىزدە ايتىلمايتىن نارسە جوق، ءبارى ايتىلادى. ءبىز ەندى اتالعان ءىرى دەرجاۆالاردىڭ كوشىنە ىلەسە المايمىز. بىراق، بىراق ءبىز ادام رەتىندە، تۇرمىسقا قاجەتتى دۇنيەلەرمەن قولجەتىمدى دەڭگەيدە ءومىر سۇرە الساق، سونىڭ ءوزى ءبىز ءۇشىن جەتىستىك بولعانى تۇر. بۇل رەاليزم.
قازاقتا تەحنوكراتتار كوپ. باعاسى جوق. قولداۋى جوق. ەل مەنىكى دەگەن ىشكى قۇلشىنىس تا جوق. 30 جىل الدىن ۇلتتىق يدەولوگيامىزدى، ءتىلىمىزدى تۇزەپ العانىمىزدا، ءدال قازىر وسىنداي رۋحاني جۇتاڭدىققا تاپ بولماس ەدىك.
قازاقتى باسقارۋدىڭ تەتىكتەرى زاماناۋي وركەنيەتتى جولمەن ءوزىنىڭ مەنتاليتەتىنە، دىلىنە، قۇندىلىقتارىنا ساي ءجۇرۋى كەرەك. بىزگە قازاقتى تىعىرىقتان الىپ شىعىپ، كۇرەڭ بەلدەردەن جەتەكتەپ وتەتىن ازاماتتاردى باسشىلىققا الىپ كەلۋ كەرەك. ول ازاماتتار ءبىزدىڭ ارامىزدا ءجۇر. ايتپەسە، قالعانىمىز قالعان، قاقساعانىمىز سول قاقساعان بولىپ قالا بەرەدى. ءبىز بۇل ونبەس تىرلىكتەن شارشادىق. قازاقتى انانىڭ ادال ءسۇتىن ەمگەن تەكتى ازاماتتار عانا باسقارسا ەل بولادى. سوڭعى مەجە - جەمقور ارامتاماقتاردان بيلىكتى الىپ، سول تەكتىلەردىڭ قولىنا تاپسىرۋ عانا قالدى.
بەكبولات قارجان،
"ادىرنا" ۇلتتىق پورتالى 
پىكىرلەر