كانادادا ءبىر اپتا بويى كۇن قاتتى ىسىپ، سونىڭ سالدارىنان شامامەن 500 ادام كوز جۇمدى دەپ حابارلايدى "ادىرنا" ۇلتتىق پورتالى centralasian.org-كە سىلتەمە جاساپ.
بيلىك شىجىعان كۇننەن زارداپ شەككەندەر بۇدان دا كوپ بولۋى مۇمكىن دەپ وتىر.
ۆانكۋۆەر (بريتان كولۋمبياسى پروۆينتسياسىنداعى ءىرى قالا) قالاسىندا عانا جۇما كۇنى 130 ادام ىستىق ءوتىپ قايتىس بولعان. قازا بولعانداردىڭ دەنى — قارت كىسىلەر، سوزىلمالى اۋرۋى بارلار.
پروۆينتسيادا اۋا تەمپەراتۋراسى ءتورت كۇن بويى كوتەرىلگەن، سەيسەنبى كۇنى ليتتون قالاسىندا 49,5 گرادۋس ىستىق تىركەلگەن.
پروۆينتسياداعى توتەنشە جاعدايعا بايلانىستى كوپتەگەن مەكەمە، سونىڭ ىشىندە مەكتەپتەر مەن بالا باقشالار ۋاقىتشا جابىلدى. جەرگىلىكتى بيلىك ۋاقىتشا بۇرقاقتار ورنالاستىرىپ، كوشەلەرگە سۋ سەپتى. سالقىنداۋعا ارنالعان ورتالىقتار اشىلدى. قالاداعى بۇرقاقتار تاۋلىك بويى جۇمىس ىستەپ تۇر.
اقش-تىڭ سولتۇستىك-باتىس جاعالاۋلارىندا دا كۇن قاتتى ىسىعان. پورتلەند (ورەگون شتاتى) پەن سيەتلدە (ۆاشينگتون شتاتى) اۋا تەمپەراتۋراسى 46 گرادۋستى كورسەتتى.
ىستىقتان قاشقان تۇرعىنداردىڭ كەيبىرى جەر استى گاراجدارىنا ءتۇسىپ، ءتىپتى اۆتوكولىك سالقىنداتقىشىنىڭ كومەگىمەن جان ساقتاۋعا ءماجبۇر. ورەگون شتاتىندا اپتاپ ىستىقتان 60-تان استام ادام قايتىس بولسا، ۆاشينگتوندا وننان استام ادام قايتتى.
"ادىرنا" ۇلتتىق پورتالى.
