8 جاستاعى قىزعا ازعىندىق جاساعان ءجاسوسپىرىم جازاسىز قالماق

1080

شىمكەنتتە اپەللياتسيالىق سوت 8 جاستاعى قىزعا ازعىندىق جاسادى دەگەن 15 جاستاعى ءجاسوسپىرىمنىڭ ءىسى بويىنشا سوت ۇكىمىن وزگەرىسسىز قالدىردى. بۇل ىستە كىنالى تاراپ قانا ەمەس، زارداپ شەككەن تاراپ تا ءجاسوسپىرىمدى بوساتۋدى سۇراعان، - دەپ حابارلايدى “ادىرنا” ۇلتتىق پورتالى "ەۋرازيا ءبىرىنشى ارناسىنا" سىلتەمە جاساپ.

سوت جابىق تارتىپتە ءوتتى. قىزۋ تالقىدان كەيىن سوت زالىنان سوتتالۋشىنىڭ اناسى كوزىن جاسىن توگىپ شىققان. ول بالاسى كىناسىز ەكەنىن ايتىپ، تەرگەۋشىلەردى ايىپتادى.

ء"بارىن دالەلدەدىك، ساراپتاما قورىتىندىسىن كورسەتتىك، قىزعا ەشكىم تيىسپەگەن. بىراق سوت قورىتىندىعا قارامايدى. شىمكەنتىمىزدە ادىلدىك جوق. ءال-فارابي پوليتسيا ءبولىمىنىڭ جەدەل ۋاكىلدەرى ماعان ەسكەرتپەستەن كەلىپ، بالامەن سويلەسكەن. ونى ولار الداپ، ەشتەڭە ەتپەيدى، بوساتادى دەپ، قول قويعىزىپ العان", - دەيدى سوتتالۋشىنىڭ اناسى اينۇر ءادىلوۆا.

وقيعا ءبىر جىل بۇرىن بولعان. قىزدىڭ وتباسى ادىلوۆتەردىڭ ۇيىندە ءبىر بولمەسىن جالداپ تۇرىپ جاتقان. كۇن ىستىقتا ەرەسەكتەر اۋلاداعى تاپشادا ۇيىقتاپ جاتقان. وقۋشى قىز تاڭەرتەڭ ءۇي ەسىنىڭ ۇلى تيىسكەنىن ايتقان. بىردەن پوليتسيا شاقىرتىلىپ، بىراق كەيىن زارداپ شەككەن تاراپ وقيعانىڭ جالعاسى بولعانىن ايتا باستاعان.

"وقيعادان كەيىن 10 كۇن وتكەندە سەگىز جاستاعى قىزىم كورشىنىڭ ۇلى قايدا ەكەنىن سۇراعان. ول ساعان تيىسكەنى ءۇشىن تۇرمەگە قامالدى، ول ساعان ازعىندىق جاسادى عوي دەدىم. سوندا قىزىم ءبارى تۇسىندە كورگەنىن ايتتى. كورگەن ءتۇسىن بەكەر ايتىپ بەرگەنىن جەتكىزدى. وسىدان كەيىن تەرگەۋشىگە بارىپ، ارىزىمدى العىم كەلدى. بىراق ارىزدى السام، ءوزىم تۇرمەگە 10 جىلعا قامالۋىم مۇمكىن ەكەنىن ايتتى", - دەيدى قىزدىڭ اناسى.

ال ادۆوكات تەرگەۋ بارىسىندا جاسوسپىرىمگە قىسىم كورسەتىلگەنىن مالىمدەپ وتىر.

"تەرگەۋ بارىسىندا جاسوسپىرىمگە قىسىم كورسەتىلگەن. زارداپ شەككەن قىزدىڭ اناسى مەنىڭ قورعاۋىمداعى ادامنىڭ قىلمىسى تۋرالى بارلىق دالەلدى جوققا شىعاردى. ءتىپتى ءبىرىنشى سوت وتىرىسىندا ول قىزى پسيحولوگيالىق بۇزىلۋى بار ەكەنىن مالىمدەگەن. قىز ويدان شىعارىپ، وتىرىك ايتقان بولۋى مۇمكىن. دالەل رەتىندە پسيحديسپانسەردەن انىقتاما الدىق. زارداپ شەككەن قىز ەسەپتە بار جانە جاردەماقى الادى", - دەپ مالىمدەدى ادۆوكات جارىلقاپ ومىرزاقوۆ.

اپەللياتسيالىق سوت تىڭداۋىندا ءۇش بىردەي سۋديا بولعان. ولار ۇكىمدى، ياعني بەس جىلعا باس بوستاندىعىنان ايىرۋ جازاسىن وزگەرىسسىز قالدىرۋ تۋرالى شەشىم شىعارعان.

"كامەلەتكە تولماعان جاسوسپىرىمگە قاتىستى "سەكسۋالدىق سيپاتتاعى زورلىق ارەكەتتەر" بابى بويىنشا ۇكىم شىققان. بۇگىن ءبىز وسى ءىستى قاراپ، تاراپتاردىڭ پىكىرىن تىڭدادىق. القا زارداپ شەككەن تاراپتىڭ كۋا ءسوزى وزگەرۋىنە سەنبەستىك ءبىلدىردى. القا مۇندايدى سوتتى الداۋعا ۇمتىلۋ دەگەن قاراستىرادى", - دەدى قالالىق قىلمىستىق ىستەر سوتىنىڭ توراعاسى ەربول جانعازين.

سوت ۇكىمى كۇشىنە ەنگەن سوڭ 15 جاستاعى بالا ۋاقىتشا ۇستاۋ يزولياتورىنان كولونياعا جىبەرىلەدى. ءجاسوسپىرىمنىڭ اتا-اناسى پوليتسەيلەر ءىسىنىڭ زاڭدىلىعىنا قاتىستى ارىز ءتۇسىرىپ، جوعارعى سوتقا جۇگىنۋگە نيەتتى.

پىكىرلەر
ۇقساس جاڭالىقتار