الماتىداعى اتىس كەزىندە قازا تاپقان پوليتسەيلەردىڭ وتباسىنا پاتەر بەرىلدى

4293
Adyrna.kz Telegram

الماتى اكىمى باقىتجان ساعىنتاەۆ اقبۇلاق ىقشام اۋدانىنداعى اتىس كەزىندە قازا تاپقان پوليتسەيلەردىڭ وتباسىلارىمەن كەزدەسىپ، پاتەر كىلتىن تابىستادى، دەپ حابارلايدى "ادىرنا" ۇلتتىق پورتالى.

- كەزدەسۋ بارىسىندا قالا اكىمى  قازا تاپقان پوليتسەيلەردىڭ وتباسىنا تاعى دا كوڭىل ايتىپ، وتباسىلارىنا پاتەر كىلتىن تابىستادى. الماتى اكىمدىگى قىزمەتتىك مىندەتتەرىن ورىنداۋ كەزىندە قازا تاپقان پوليتسيا قىزمەتكەرلەرىنىڭ وتباسىنا قولداۋ كورسەتۋدەن ايانبايدى", - دەپ حابارلادى اكىمدىكتىڭ ءباسپاسوز قىزمەتى.
الاتاۋ اۋداندىق پب جپقب ۋچاسكەلىك ينسپەكتورى، پوليتسيا كاپيتانى بايعازيەۆ نۇربول نازاربايۇلى، 1988 جىلى تۋعان، ىشكى ىستەر ورگاندارىندا 2014 جىلدان بەرى قىزمەت ەتكەن. 2021 جىلدىڭ 28 شىلدەسىنەن باستاپ الاتاۋ اۋداندىق پب جانىنداعى پوليتسيا ءبولىمىنىڭ ۋچاسكەلىك پوليتسيا ينسپەكتورى قىزمەتىن اتقاردى. ونىڭ ارتىندا 5 جانە 7 جاستاعى ەكى بالاسى قالدى.
الاتاۋ اۋداندىق پب جپقب ۋچاسكەلىك ينسپەكتورى، پوليتسيا مايورى سۇلەەۆ دارحان داۋىلبايۇلى، 1982 جىلى تۋعان، قر ءىىم الماتى اكادەمياسىنىڭ ماگيستراتۋراسىن بىتىرگەننەن كەيىن 2003 جىلدان باستاپ ىشكى ىستەر ورگاندارىندا قىزمەت ەتتى. 2021 جىلدىڭ تامىزىندا ۋچاسكەلىك ينسپەكتور لاۋازىمىنا تاعايىندالعان ەدى. ونىڭ ارتىندا كامەلەتكە تولماعان بەس بالاسى قالدى، ولاردىڭ ەڭ كىشىسى – 4, ۇلكەنى – 16 جاستا. بايعازيەۆتىڭ وتباسى سياقتى ونىڭ دا جەكە تۇرعىن ءۇيى بولعان جوق.

ەستەرىڭىزگە سالا كەتەيىك، 20 قىركۇيەكتە مەگاپوليستەگى شاعىن اۋداندارىنىڭ بىرىندە ءۇي يەسى يگور دۋجنوۆ اڭشىلىق مىلتىقتان ۇيدەن شىعارۋ تۋرالى سوت شەشىمىن ورىنداۋعا كەلگەن ادامدارعا وق جاۋدىردى. الماتىلىق مەرگەن بەس ادامدى ءولتىردى. قازا بولعانداردىڭ اراسىندا ەكى پوليتسيا قىزمەتكەرى مەن سوت ورىنداۋشىسى، سونداي-اق ءۇيدىڭ جاڭا يەسى جانە كۋاگەر بار. 

"ادىرنا" ۇلتتىق پورتالى

پىكىرلەر