ءساتسىز ستسەناري: "1 داپتەر قۇنى - 95 مىڭ تەڭگە"

4144
Adyrna.kz Telegram

اقمولا وبلىسىنداعى مەملەكەتتىك ساتىپ الۋلارعا جۇرگىزىلگەن مونيتورينگ ناتيجەسىندە سىبايلاس جەمقورلىققا قارسى كۇرەس ماماندارى 95 مىڭ تەڭگەگە ءبىر داپتەر ساتىپ الماق بولعان ءبىلىم بەرۋ مەكەمەسى تۋرالى فاكتىلەردى انىقتاعان، دەپ حابارلايدى "ادىرنا" ۇلتتىق پورتالى.

اقمولا وبلىسى بويىنشا سىبايلاس جەمقورلىققا قارسى قىزمەت ايماقتا باعانى تومەندەتۋ ارقىلى بەرىلگەن ۇسىنىستاردان كەيىن 1 ميللياردتان استام بيۋدجەتتىك قارجىنى ۇنەمدەۋگە مۇمكىندىك تۋعاندىعىن جەتكىزدى. ماسەلەن، اۋدانداردىڭ بىرىندەگى ءبىلىم بەرۋ مەكەمەسى 14 ملن 250 مىڭ تەڭگەگە قالىڭ داپتەر ساتىپ الۋدى جوسپارلاعان. ياعني، ءبىر داپتەردىڭ قۇنى 95 مىڭ تەڭگە بولىپ وتىر.  ال داپتەردىڭ نارىقتاعى باعاسى 60 تەڭگە.

— دەپارتامەنتتىڭ دەر كەزىندە ارالاسۋىنىڭ ارقاسىندا ساتىپ الۋ جۇزەگە اسپادى جانە بيۋدجەت قاراجاتى ۇنەمدەلدى، – دەدى وڭىرلىك سىبايلاس جەمقورلىققا قارسى قىزمەتى.

ءبىلىم بەرۋ مەكەمەسى بولسا، داپتەر باعاسىنىڭ قىمباتتىعىن مەملەكەتتىك ساتىپ الۋ پورتالىندا اقپاراتتى تولتىرۋ كەزىندە جىبەرىلگەن قاتەمەن بايلانىستىردى.

ەسكە سالا كەتسەك، وسىعان ۇقساس جاعداي قىزىلوردا وبلىسىندا دا بولعان ەدى. جاڭاقورعان كەنتى اكىمىنىڭ اپپاراتى دا باعاسى 1,5 ملن تەڭگە تۇراتىن داپتەر ساتىپ الۋدى جوسپارلاعان ەدى.

"ادىرنا" ۇلتتىق پورتالى

پىكىرلەر