قر قورعانىس مينيسترلىگى قازاقستانعا رەسەيلىك قارۋ-جاراق پەن اسكەري تەحنيكانى جەتكىزۋ تۋرالى اقپاراتقا بايلانىستى تۇسىنىكتەمە بەردى دەپ حابارلايدى "ادىرنا" ۇلتتىق پورتالى "Zakon.kz-كە" سىلتەمە جاساپ.
"2021 جىلى رەسەي تاراپى قازاقستان قارۋلى كۇشتەرىنىڭ مۇددەسى ءۇشىن "ورلان-10ە" ۇۇا بار كوپفۋنكتسيونالدى كەشەندى عانا جەتكىزەدى", - دەپ ناقتىلادى ۆەدومستۆودان.
سونىمەن قاتار، "سۋ-30سم" ۇشاقتارى، "مي-35م" تىكۇشاقتارى، "بۋك-م2ە" زەنيتتىك زىمىران كەشەنى، "بتر-80" جانە "بتر-82ا" برونەترانسپورتەرلەرى، سونداي-اق اتىس قارۋىن قازاقستان وتكەن جىلدارى ساتىپ العان."قازاقستان ارمياسىنىڭ قارۋ-جاراعىندا "تايفۋن-ك" جەڭىل بروندالعان اۆتوموبيلدەرى جوق ەكەنىن قوسىمشا حابارلايمىز", — دەپ تولىقتىردى ءباسپاسوز قىزمەتى. بۇعان دەيىن رەسەيلىك جاڭالىقتار سايتتارىنىڭ بىرىندە رەسەي اۋعانستانداعى قاقتىعىس كەزىندە قازاقستان مەن وزبەكستانعا اسكەري جەتكىزىلىمدەردى جەدەلدەتكەنى ايتىلعان بولاتىن.
"ادىرنا" ۇلتتىق پورتالى.
