قاراعاندىدا “20 جىل قۇلدىقتا بولدىم” دەگەن رەسەي ازاماتى ءوز سوزىنەن اينىپ قالدى

2336
Adyrna.kz Telegram

قاراعاندى وبلىسىندا 20 جىل قۇلدىقتا بولدىم دەگەن رەسەي ازاماتى سوڭىندا سوزىنەن تايقىپ شىقتى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ. 

كەزىندە پريوزەرسك قالاسىنداعى رەسەي اسكەري بولىمىندە بورىشىن وتەگەن ول ۇيىنە قايتپاي، وسى وڭىردە ءوزى قالىپ قويعانى بەلگىلى بولدى.

“پوليتسيا قىزمەتكەرلەرىمەن بىردەن قر رەسەي ەلشىلىگىنە حابارلاما بەرىلدى. سولاردىڭ قاتىسۋىمەن قازىر تەرگەۋ ارەكەتتەرى جۇرگىزىلۋدە. الايدا جابىرلەنۋشى ازامات ءوزىنىڭ الدىندا جاريالاعان حابارلاماسىنان قازىر باس تارتىپ وتىر. "مەنى ەشكىم ۇستاعان جوق، مەن قازاقستاندا ءوز ەركىممەن بولدىم" دەگەن مالىمدەمە جاسادى. ونىڭ قولىندا اسكەري بيلەتى جانە باسقا قۇجاتتارى بار”، – دەپ مالىمدەدى قاراعاندى وبلىسى پوليتسيا دەپارتامەنتىنىڭ ءباسپاسوز حاتشىسى باقىتجان قۇدياروۆ.

بەينەجازبادا 44 جاستاعى الەكسەي كوتوۆ قاراعاندى وبلىسى شەت اۋدانىنداعى قىستاقتاردىڭ بىرىندە 20 جىل قۇلدىقتا جۇرگەنىن ايتقان. كوپ ۇزاماي پوليتسەيلەر اتالعان قىستاقتى تاۋىپ، الەكسەي كوتوۆتى قاراعاندىعا جەتكىزىپتى. ول ارىزدانعان قوجالىق يەسىن دە ۇستاپ، قىلمىستىق ءىس قوزعاعان. الايدا ايتقان سوزىنەن ەلشىلىك وكىلدەرىنىڭ كوزىنشە باس تارتىپتى.

ايتۋىنشا، اركەري قىزمەتىنەن كەيىن قاراعاندى وبلىسىندا قالىپ، قاڭعىباس كۇيگە ءتۇسىپتى. الايدا اعىنان جارىلعان الەكسەيدى ديپلوماتتار الدى-ارتىنا قاراتپاي جەتەكتەپ الا جونەلدى. جالپاق جۇرتقا قۇلدىقتا جۇرگەنىن جار سالعانان كەيىن سوزىنەن اينۋىنىڭ سەبەبىن تىلشىلەر دە بىلمەك بولعان. بىراق ەلشىلىك وكىلدەرى بەلگىسىز سەبەپتەرمەن ونى سويلەتپەي، ءتىپتى ەرسى قىلىق تا تانىتتى.

بۇعان دەيىن پوليتسيا ەر ادامنىڭ ءوزىن ياروسلاۆل وبلىسى گاۆريلوۆ-يامسك اۋدانى گورە-گرياز اۋىلىنىڭ تۋماسى الەكسەي الەكساندروۆيچ كوتوۆپىن دەپ تانىستىرىپ، تۇتقىندا ەكەنىن ايتقان بەينەجازبانى ۇسىنعان بولاتىن. ەر ادام اتا-اناسىنان كومەك قولىن سوزۋدى سۇراعان ەدى.

“ادىرنا” ۇلتتىق پورتالى

پىكىرلەر