Qazır İranda 132 qazaqstandyq, al İzrailde 219 qazaqstandyq bar. Būl turaly bügın, 16 mausymda Syrtqy ıster ministrlıgınde ötken brifingte resmi ökıl Aibek Smadiiarov aitty, dep habarlaidy «Adyrna» tılşısı.
Ol konsuldyqtar azamattarmen tūraqty bailanysta ekenın jäne qaza bolǧandar men jaralanǧandar arasynda qazaqstandyqtardyŋ joq ekenın mälımdedı.
Aituynşa, ekı el arasyndaǧy qaqtyǧystyŋ uşyǧuyna bailanysty BAÄ-den 300 otandasymyz üiıne qaita almai otyr.
«Qazırgı taŋda keibır äue kompaniialarynyŋ BAÄ-den Qazaqstanǧa reisterı toqtauyna bailanysty Qazaqstan Respublikasynyŋ 300-ge juyq azamatynyŋ elge jetuı boiynşa uaqytşa qiyndyq tuyp otyr. Olardyŋ köpşılıgı —turister. Oqiǧa ornynda diplomattarymyz jūmys ıstep jatyr. Aldaǧy uaqytta äue kompaniialarymen jasalǧan kelısımnıŋ arqasynda azamattardyŋ jartysynan köbı elge oralady dep kütılıp otyr»,— dep tüsındırdı Aibek Smadiiarov.
Resmi ökıl İzrail men İrandaǧy qazaqstandyqtarǧa qauıpsızdık şaralaryn küşeituge keŋes berdı.
«İzrail men İrandaǧy qazaqstandyqtarǧa tūrǧylyqty jerlerın asa qajettılıksız tastamauǧa, qauıpsızdık şaralaryn küşeituge, saqtyq pen qyraǧylyq tanytuǧa, jaŋalyqtardy baqylap otyruǧa jäne jergılıktı bilık organdarynyŋ nūsqaularyn saqtauǧa keŋes beremız. Sonymen qatar Syrtqy ıster ministrlıgımen jäne Qazaqstannyŋ İran men İzraildegı elşılıkterımen bailanysta boludy sūraimyz»,—dedı ol.
