2026 jyl – Qazaqstannyŋ bastamasymen qabyldanyp, Bırıkken Ūlttar Ūiymy deŋgeiınde Halyqaralyq volonterler jyly bolyp jariialanǧan erekşe kezeŋ. Būl – elımızdıŋ jahandyq qauymdastyq aldyndaǧy bedelın arttyryp qana qoimai, qazaqstandyq jastardyŋ jaŋa buynynyŋ belsendılıgın, qaiyrymdylyq pen azamattyq jauapkerşılık mädenietın tanytatyn tarihi mümkındık.
Volonterlık infraqūrylymnyŋ damuy, sifrlyq pasport syndy innovasiialyq jüielerdıŋ engızıluı jäne memlekettıŋ jüielı qoldauy jastar arasynda jaŋa köşbasşylardyŋ qalyptasuyna jol aşty. Qazaqstan studentterınıŋ Aliansy töraǧasy, respublikalyq studenttık ombudsmen Ūlan Amanqazyūly osy üderıstıŋ män-maŋyzyn tüsındırıp, volonterlık qozǧalystyŋ el bolaşaǧyna äserın jan-jaqty taldap berdı.
– Qazaqstannyŋ Halyqaralyq volonterler jylyn jariialau jönındegı bastamasy 2026 jyly naqty qandai nätijeler arqyly körınıs tabuy tiıs?
– Prezidentımız Qasym-Jomart Kemelūly Toqaev BŪŪ-nyŋ 75-sessiiasynda 2026 jyldy Halyqaralyq volonterler jyly dep jariialau jönınde bastama kötergen bolatyn. Būl ūsynys halyqaralyq qauymdastyq tarapynan qoldau tauyp, nätijesınde 2026 jyl bükıl älemde Volonterler jyly retınde atalyp ötetın boldy.
Atalǧan bastamanyŋ elımızden köterılıp, jahandyq deŋgeide qabyldanuy – Qazaqstan üşın tarihi ärı maŋyzdy oqiǧa. Halyqaralyq volonterler jylynyŋ saltanatty aşylu räsımıne Memleket basşysy, Premer-ministrdıŋ orynbasary – Mädeniet jäne aqparat ministrı Aida Ǧalymqyzy, sondai-aq qoǧam qairatkerlerı men elımızdıŋ är öŋırınen volonterlık salada belsendı eŋbek etıp jürgen ūiym ökılderı qatysty.
Volonterlık qyzmet – halyqqa, elge, jerge jäne Otanǧa degen süiıspenşılıktı naqty ıspen körsetuge mümkındık beretın maŋyzdy azamattyq ūstanym. 2026 jylǧy Volonterler jylynyŋ halyqaralyq deŋgeide atap ötıluı Ortalyq Aziiamen ǧana şektelmei, jahandyq arenada täjıribe almasuǧa, bırlesken jobalardy jüzege asyruǧa jäne auqymdy bastamalardy ıske asyruǧa jol aşady dep senemız.
Volonterlık qyzmet bırneşe baǧytty qamtidy. Bügınde olardyŋ ışınde ekologiialyq, medisinalyq jäne äleumettık volonterlık erekşe özektılıkke ie. Aldaǧy uaqytta elımızdegı volonterler qatary odan ärı arta tüsedı dep oilaimyz, sebebı qazırdıŋ özınde Qazaqstan boiynşa 300 myŋnan astam volonter belsendı qyzmet atqaryp jür. Jalpy, volonterlık – halqymyzǧa jat ūǧym emes. Ülkenge qūrmet, kışıge ızet körsetu, bır-bırıne qol ūşyn sozu – halqymyzdyŋ boiyna ejelden sıŋgen asyl qasietter.
– Volonterdıŋ sifrlyq pasporty ne üşın qajet jäne ol senım, aşyqtyq, qauıpsızdık pen kömektıŋ nysanaly türde körsetıluı siiaqty qandai mäselelerdı şeşuge mümkındık beredı?
– Biylǧy jyl Memleket basşysynyŋ Jarlyǧymen sifrlandyru jäne jasandy intellekt jyly bolyp jariialandy. Osyǧan orai ärbır volonterdıŋ sifrlyq pasportyn engızu bız üşın ülken motivasiia ärı maŋyzdy jetıstık bolmaq.
Sifrlyq pasport arqyly volonterdıŋ atqarǧan jūmystary jüielı türde tırkelıp, onyŋ belsendılıgı men ülesı aiqyn körınedı. Būl öz kezegınde jūmysqa ornalasu üderısın jeŋıldetıp, jeke körsetkışterdıŋ joǧary boluyna yqpal etedı.
Qazaqstan studentterı Aliansynyŋ töraǧasy ärı respublikalyq studenttık ombudsmen retınde aita ketsem, Bılım jäne joǧary bılım ministrlıgımen bırlesıp, joǧary oqu oryndarynda studentterdıŋ qoǧamdyq qyzmetı men jeke jetıstıkterın baǧalau täjıribesı kezeŋ-kezeŋımen jüzege asyrylyp keledı. Studenttıŋ volonterlık qyzmetke, qoǧamdyq jūmystarǧa belsendı qatysuy onyŋ akademiialyq körsetkışterıne oŋ äser etıp, GPA deŋgeiın arttyruǧa mümkındık beredı.
Sonymen qatar sifrlyq platforma arqyly studenttıŋ qandai bastamalarǧa qatysqany, qandai jobalarda belsendı bolǧany tolyq körınıs tabady. Būl volonterdıŋ jeke nätijelerın ädıl baǧalauǧa, al bolaşaqta sifrlyq pasport negızınde jūmysqa ornalasu mümkındıgın keŋeituge jäne memlekettık marapattarǧa ümıtker bolu deŋgeiın arttyruǧa jol aşady dep senemın.
– Qazaqstanda volonterler qozǧalysynyŋ qarqyndy damuyna basty serpın bergen faktor qandai: memlekettık qoldau, infraqūrylymnyŋ qalyptasuy älde qatysudyŋ jaŋa formattary ma?
– Elımızde volonterlık qozǧalystyŋ qarqyndy damuyna barlyq qajettı alǧyşarttar qalyptasqan. Būl baǧytta infraqūrylymnyŋ jüielı türde damuy, volonterlık habtardyŋ aşyluy jäne üilestıru tetıkterınıŋ jolǧa qoiyluy maŋyzdy röl atqaryp otyr.
Qazırgı taŋda volonterlıktıŋ 8 negızgı baǧyty bar, olardyŋ qatarynda ekologiialyq volonterlık erekşe oryn alady. Mäselen, plastik bötelkelerdı sūryptau jäne qaita öŋdeuge üles qosu – eko-volonterlıktıŋ naqty körınısı.
Sonymen qatar volonterlıktı damytuǧa ärtürlı qoǧamdyq jäne respublikalyq jastar ūiymdary belsendı atsalysuda. Olardyŋ qatarynda Qazaqstan studentterınıŋ Aliansy, Qazaqstan jastar kongresı, «Jastar ruhy», «Respublika jastary», «Auyl jastary» syndy ūiymdardy atauǧa bolady. Būdan bölek, öŋırlerde jūmys ısteitın front-keŋseler men elımızde ötetın ırı ıs-şaralar men forumdardy ūiymdastyruda üilestıruşı röl atqaratyn Ūlttyq volonterlık jelı de būl salanyŋ damuyna eleulı üles qosyp keledı.
– Memleket basşysy atap ötken qūndylyqtardyŋ (adam, bılım, innovasiia, ūlttyq bolmys, ekologiia) qaisysy qoǧamdy köbırek bırıktıredı jäne onyŋ sebebı nede?
– Häkım Abaidyŋ «tolyq adam» tūjyrymdamasynda aitylǧan ystyq qairat, nūrly aqyl, jyly jürek qaǧidalary bügıngı qoǧam üşın de özektılıgın joǧaltqan joq. Jyly jürek – qaiyrymdylyq jasau, özgege qol ūşyn beru, qoǧamǧa paida keltıru ūǧymymen astasady.
Qazırgı kezeŋ – jasandy intellekt pen bılımnıŋ qarqyndy damyǧan däuırı. Bız – bılımge senetın jäne ony qoǧam igılıgıne baǧyttauǧa ūmtylatyn jas ūrpaqpyz. Memleket basşysy da bılımdı özgelermen bölısu, jaŋa innovasiialyq täsılder arqyly volonterlıktı damytu ideiasyn alǧa tartyp otyr.
Osy baǧytta ekologiialyq volonterlıkke erekşe köŋıl bölınıp, «Taza Qazaqstan» jobasy jüzege asyryluda. Atalǧan bastama aiasynda bız de bırqatar ırı ekologiialyq ıs-şaralar ūiymdastyrdyq, sonyŋ ışınde «Tazalyq jarysy» atty keŋ auqymdy ekoaksiia ötkızıldı.
Eger jyly jürektı volonterlıkpen, nūrly aqyldy bılım men ǧylymǧa negızdelgen damu üderısımen bailanystyrar bolsaq, būl baǧyttarda elımızdıŋ jastary aitarlyqtai jetıstıkterge jetıp keledı. Qazaqstandyq jastar bılım men ǧylym salasynda türlı respublikalyq jäne halyqaralyq baiqaularda joǧary nätijeler körsetude. Al ystyq qairat – sporttaǧy tabystar men mümkındıgı şekteulı jandardyŋ tabandylyǧy arqyly körınıs tabuda. Osylaişa, Abaidyŋ «tolyq adam» tūjyrymdamasy bügıngı qoǧamda, äsırese jastar arasynda, naqty ıster men nätijeler arqyly jüzege asyp keledı.
