Qazaqstan Respublikasynyŋ ädılet ministrlıgı äleumettık jelılerde taraǧan jalǧan aqparatqa bailanysty resmi mälımdeme jasady.
Ministrlıktıŋ habarlauynşa, soŋǧy uaqytta äleumettık jelılerde Ädılet ministrı Erlan Särsembaev elımızdıŋ soltüstık öŋırlerıne erekşe qūqyqtyq märtebe berudı ūsyndy degen mazmūndaǧy aqparat taralǧan. Alaida vedomstvo būl mälımettıŋ şyndyqqa säikes kelmeitının resmi türde mälımdedı.
«Qazaqstan Respublikasy Ädılet ministrlıgı atalǧan aqparattyŋ jalǧan ekenın habarlaidy», – delıngen resmi habarlamada.
Sonymen qatar ministrlık jalǧan aqparat taratu Qazaqstan Respublikasynyŋ zaŋnamasyna säikes qylmystyq jauapkerşılıkke äkep soǧatynyn eskerttı.
Vedomstvo azamattar men būqaralyq aqparat qūraldaryn tek resmi derekközderge jäne tekserılgen aqparatqa ǧana süienuge şaqyrdy.
