«Alumni NIS» qaǧidattaryna ainalǧan OTANYŃDY SUI, ÄLEMDI ÖZGERT, ADAL BOL sözderı Nazarbaev Ziiatkerlık mektepterı tülekterınıŋ Frankfurt qalasyndaǧy Qazaqstan Respublikasynyŋ Bas konsuldyǧynda ötken kezdesuınde aityldy.
– NIS-tıŋ men üşın naǧyz äleumettık liftke ainalyp, ülken mümkındıkter bergen meken ekenın maqtanyşpen aitu üşın osyndai tamaşa sättı küttım, – dep moiyndady Hochschule Rhein-Waal studentı Amina Baqtiiarova: Men Öskemen qalasyndaǧy Ziiatkerlık mektepke Şyǧys Qazaqstan oblysyndaǧy Qasym Qaisenov atyndaǧy qarapaiym auyldyq mektepten tüstım, aǧylşyn tılı men himiia pänınen qiyndyqtar bırden paida boldy. Bır şet tılın meŋgerudıŋ azdyq etetının tüsınıp, nemıs tılıne qyzyǧa bastadym, 12-synypta IELTS emtihanynan 8.0 ball alyp, qatarynan bırneşe universitetke, sonyŋ ışınde Ekonomika joǧary mektebıne grantqa şaqyrtu aldym. Men Germaniiadaǧy Rein-Vaal qoldanbaly ǧylymdar universitetın taŋdadym, Soltüstık Rein-Vestfaliiadaǧy Kleve qalasynda ornalasqan. Qazırgı uaqytta bioinjeneriia salasynda oqimyn, qazaqstandyq ǧylymda, sonyŋ ışınde farmasevtikada özımnıŋ qoltaŋbamdy qaldyrudy armandaimyn. Bos uaqytymda şyǧarmaşylyqpen ainalysyp, aǧylşyn tılınde öleŋder jazamyn, ekı kıtap şyǧaryp ta ülgerdım. Auylymdaǧy mektepte oqyp jürgen kezde şetelde bılım alyp, bırneşe tıldı jetık meŋgeremın degen oi mülde bolmaǧan. NIS maǧan ülken mümkındıkter syilady, Ziiatkerlık mektepke tüskennen keiın özıme degen senımım artyp, bızdıŋ basty qaǧidattarymyzǧa ainalǧan «otan aldyndaǧy jauapkerşılık», «akademiialyq adaldyq», «qoǧamǧa qyzmet etu» ūǧymdaryn boiyma sıŋırdım.
Aminanyŋ jetıstıgı – jarqyn, ilanymdy, este qalarlyq jäne ... barlyq NIS tülekterıne tän. Nazarbaev Ziiatkerlık mektepterı öz oquşylaryna bıregei ümıt pen mümkındık berdı. Kezdesu qatysuşylary Germaniiadaǧy biohimiia, sifrlyq tehnologiia, maşina jasau, injeneriia, logistika jäne ekologiia salalarynda mamandandyrylǧan üzdık universitetterde bılım aluda.
Beibarys Esengeldin ekı jyl būryn Şymkenttegı fizika-matematika baǧytyndaǧy NIS-tı tämamdady, mektep prezidentı boldy, Frankfurtqa Vengriianyŋ Dor şaharynan keldı, Szent Istvan University-de oqidy. Joǧary oqu ornynda Beibarystyŋ jaratylystanu-matematikalyq baǧyttaǧy akademiialyq daiyndyǧy ǧana emes, NIS-tıŋ jan-jaqty bılımı men maŋyzdy adami qabıletterge baulityny taŋ qaldyrdy. Al Taldyqorǧandaǧy Ziiatkerlık mektep tülegı, bügınde Technische Hochschule Würzburg-Schweinfurt studentı Nazira Ömırbekovaǧa ata-anasy osy kezdesuge baruǧa keŋes bergen. Almatydaǧy fizika-matematika baǧytyndaǧy NIS tülekterı Elikai Atabaeva Miunhen tehnikalyq universitetınde, Ädiia Bekdäuletova Şvainfurt qoldanbaly ǧylymdar universitetınde, Madina Qaraqūlova Miunhendegı Liudvig jäne Maksimilian universitetınde oqidy. Kristina Muliar Pavlodardaǧy NIS tülekterınıŋ alǧaşqy legın tanystyrdy, bügınde Gamburgte jūmys ısteidı, mekteptegı akademiialyq daiyndyǧynyŋ arqasynda universitettegı zamandastarynan erekşelengenın moiyndady. Petropavldaǧy NIS-ten Angelina Bender Technische Universität Munchen-de sifrlyq tehnologiialar salasyn meŋgergen, bügınde ol Germaniiadaǧy eŋ ırı saqtandyru kompaniialarynyŋ bırınde jūmys ısteidı jäne süiıktı mektebınen mümkındıkter men ülken qoldau alǧanyn jasyrmaidy. Oraldaǧy NIS tülegı Danel Begaliev Brandenburg qalasynan keldı, ol Kotbus-Zenftenberg tehnikalyq universitetınde qorşaǧan ortany basqaru mamandyǧy boiynşa oqidy. Älihan Nūrdäulet elordadaǧy fizika-matematika ziiatkerlık mektebın bıtırgen, Karlsruher Institut fur Technologie-de maşina jasau mamandyǧynda bılım aluda.
Abdullakim Zamirbek uulu kezdesudıŋ kütpegen ärı erekşe qonaǧyna ainaldy. Ol – bolaşaq data-analitik, The University of Messina-da bılım aluda. Bışkek halyqaralyq mektebınıŋ tülegı Abdullakim Nazarbaev Ziiatkerlık mektepterınıŋ tülekterıne tän qasietterdıŋ arqasynda tabysqa jetudıŋ jolyn tüsınu üşın İtaliiadan Frankfurtqa arnaiy keldı. Europanyŋ ozyq universitetterınıŋ üzdık studentterı Ziiatkerlık mekteptı tämamdady, olar NIS bauyrlastyǧyn maqtan tūtady, qiyn uaqytta bır-bırıne qoldau körsetıp, jeke oqiǧalarymen şabyttandyruǧa ärqaşan daiyn.
– Ziiatkerlık mektepter tülekterınıŋ basty artyqşylyǧy – akademiialyq jetıstıkter emes, adami qasietter, – dep moiyndady Abdullakim.
Germaniianyŋ är jerınde tūryp, bılım alyp jatqan kezdesu qatysuşylary alǧaş ret Frankfurttegı Qazaqstan Respublikasynyŋ Bas konsuldyǧynda jinaldy. Diplomattar tarapynan jasalǧan jaily ärı otbasylyq atmosfera, şynaiy dialog pen dämdı dastarhan üilerınen jyraqta jürgen balalardyŋ köŋılınen şyqty.
– Bügınde Germaniiada bılım alyp jatqan ärbır qazaqstandyq student – öz elınıŋ ökılettı ökılı, olar Abai, Ahmet Baitūrsynov, Älihan Bökeihanov, Mırjaqyp Dulatov jäne qazaqtyŋ basqa da bırtuar perzentterınıŋ ruhani mūrasyn älemge tanytuda, – dep atap öttı Frankfurt qalasyndaǧy Bas konsul Tauboldy Ümbetbaev.
– Germaniiadaǧy kezdesu jeltoqsan-qaŋtar ailarynda NIS tülekterınıŋ tuǧan jerınde basyn qosqan bırınşı «SAMGAU» forumynyŋ zaŋdy jalǧasy, – dedı «Nazarbaev Ziiatkerlık mektepterı» derbes bılım beru ūiymynyŋ basqarma töraiymy Küläş Şämşidinova: Ziiatkerlık mekteptıŋ ärbır oquşysy, mūǧalımı, ata-anasy bızdıŋ tülekterımızdıŋ Qazaqstandy älemge laiyqty tanytyp, «Alumni NIS» qaǧidalaryna ainalǧan «otandy süiu», «älemdı özgertu», «naǧyz tūlǧa» boludy nasihattaitynyn maqtan tūtady.
