26 tamyz - Qazaq küntızbesınıŋ aişyqty künı

Elımızde 2019 jyldan berı 24-26 tamyz - Tuǧan jer künı atap ötıledı, dep habarlaidy "Adyrna" ūlttyq portaly. Ūlttyq merekege orai älihantanuşy-ǧalym, halyqaralyq jurnalist, filologiia ǧylymdarynyŋ kandidaty, "Alaş" ǧylymi-zertteu institutynyŋ direktory Sūltan Han Aqqūly barşa qazaqstandyqtardy merekemen qūttyqtady. "Sızderdı Ūlt qūndylyqtaryn saqtau men nasihattauǧa baǧyttalǧan Qazaq küntızbesınıŋ aişyqty künı 24-26 tamyz - Tuǧan jer künımen qūttyqtaimyn! 1847 jyly Qazaq handyǧy bırjola ydyrap, tarih sahnasynan tüsuınen tura 70 jyl ötken 1917 jyldyŋ jeltoqsanynda Alaş Respublikasy atauymen tuy qaita köterılgen Qazaq ūlttyq memleketınıŋ territoriiasy 9 oblys, bır güberne, Zakaspii oblysynyŋ Maŋǧyşlaq, Altai öŋırınıŋ Biiskı, Zmeinogor jäne Barnauyl oiazdaryn qamtyp, jalpy aumaǧy 3,45 mln şarşy şaqyrymdy qūrady. Qaita jaŋǧyrǧan ūlttyq memlekettıŋ osy jerın Älihan Bökeihan odan 7 jyl būryn - 1910 jyly Sankt-Peterborda jaryq körgen äigılı «Qazaqtar» atty tarihi ocherkınde aiqyndap qoiǧan bolatyn. 1917 jyldyŋ 12 jeltoqsanynda (qazırgı küntızbe boiynşa 25 jeltoqsan) II Jalpyūlttyq Qazaq-Qyrǧyz qūryltaiy osy oblys-oiazdardy Alaş Respublikasynyŋ zaŋdy jer aumaǧy dep jariialady. Alaş Respublikasyn joiyp, ornyna Qazaq avtonomiialyq keŋestık sosialistık respublikasy bolyp qaita qūrylatyn 1920 jyldyŋ tamyz aiynda «Alaş» arysy Älihan Bökeihan Ahmet Baitūrsynūly men Älımhan Ermekūlyn alǧa salyp, keŋes ökımetınıŋ kösemı V.İ. Leninnıŋ aldynda osy oblys-oiazdar qazaq halqynyŋ ata-babadan qalǧan tarihi menşıktı jerı ekenın däleldep, Täuelsız Qazaqstan Respublikasynyŋ qazırgı jer aumaǧyn – territoriiasyn qorǧap, bekıtıp aldy. Mıne biyl qazırgı memlekettık şekaramyzdyŋ bekıtılgenıne 104 jyl tolyp otyr. Alaş azamattary! Jerımız tügel, aspanymyz aşyq, elımız tynyş bolsyn!" - dedı öz qūttyqtauynda.