Aqtöbede ekı künnen berı tolassyz jauǧan jaŋbyrdan qala köşelerı suǧa tolyp, tūrǧyndar aialdamada saǧattap avtobus kütuge mäjbür dep habarlaidy "Adyrna" ūlttyq portalynyŋ tılşısı.
Bır aiǧa juyq uaqytqa sozylǧan aptap ystyqtan keiın Aqtöbege 6 şıldede jauyn jaudy. Tūrǧyndar basynda künnıŋ salqyndap, jaŋbyr jauǧanyna quandy. Alaida künı-tünı tolassyz jauǧan jauynnan qala köşelerı suǧa tolyp, jaiau jürgınşılerdı bıraz äbıgerge saldy. Sondai-aq kölık jürgızuşılerı su sorǧylaumen ainalysatyn mekemelerdıŋ jūmysyna köŋılı tolmaityndaryn aityp, narazylyq tanytuda.
Sinoptikterdıŋ mälımetı boiynşa, soŋǧy bır täulıkte jauǧan jaŋbyr mölşerı 54,7 millimetrdı qūraǧan. Al şılde aiyndaǧy boljam boiynşa, jauyn-şaşyn mölşerı 29 millimetr boluy tiıs. Iаǧni, Aqtöbede ekı künde ekı ailyq jauyn-şaşyn mölşerı tüsken.Aqtöbe qalalyq äkımdıgınıŋ mälımetıne süiensek, ekı künde qala aumaǧynda jaŋbyr suyn arnaiy tehnikanyŋ kömegımen jäne nasostar arqyly sorǧylau, suaǧarlar arqyly Sazdyǧa qarai aǧyzu jūmystary jürgızılude. Būl jūmystarǧa 100-den astam tehnika jūmyldyrylǧan. 40-tan astam adam aryqtarǧa sudyŋ baǧytyn būru jūmystarymen ainalysuda. Qazır 5 nasostyq stansiia jūmys ıstep tūr jäne 10 stasionarlyq nasos şūǧyl ıske qosylǧan.
Sondai-aq tünde qala aumaǧynda qatty jel tūryp, sonyŋ saldarynan tūrǧyn üiler men köşelerdegı aǧaştar qūlap, bırqatar kölıkterdı basyp qalǧan. Al bırneşe audanda qatty jeldıŋ kesırınen jaryq öşken. Sondai-aq qala ışındegı qoǧamdyq kölıkterdıŋ qozǧalysy baiaulaǧan.— Jauyn jaumady dep edık. Ekı künde köşeler kölge ainaldy. Jauynnyŋ bolǧany jaqsy, degenmen jaiau jürgınşıler köşe joldaryndaǧy sudan jüre almai jatyrmyz. Qaladaǧy köşelerde suaǧardyŋ bolmauynan jyl saiyn osyndai mäselege tap bolatynymyz ökınıştı. Soŋǧy kezde qala ışındegı avtobustardyŋ jüru jiılıgı de sirep barady. Saǧattap kölık kütuge tura keledı. Keide taŋerteŋ jūmystan da qalyp baramyz. Osy mäselelerdı jauapty tūlǧalar nazarǧa alsa degen bır tılek bar. Küzde de osy mäsele qaitalanady, — deidı Aqtöbe qalasynyŋ tūrǧyny Saǧynyş Sarbaeva. Aita ketu kerek, Aqtöbe qalasy aumaǧynda 8-9 şıldede taǧy da tolassyz jaŋbyr jauady dep kütılude.
"Adyrna" ūlttyq portaly.
Ūqsas jaŋalyqtar
