Memleket basshysy Qasym-Jomart Toqaevtyń tóraǵalyǵymen Prezıdent Ákimshiligi, Qaýipsizdik Keńesi, Bas prokýratýra, Ulttyq qaýipsizdik komıteti, Qorǵanys jáne Ishki ister mınıstrlikteri basshylarynyń keńesi ótti. Bul týraly Aqorda jazdy, dep habarlaıdy «Adyrna» tilshisi.
Memleket basshysyna elimizdegi ahýaldy turaqtandyrý úshin berilgen tapsyrmalardyń oryndalý barysy týraly baıandaldy. Ásirese qaýipsizdik pen quqyqtyq tártipti qaıta qalpyna keltirýge, azamattardyń zańdy quqyqtaryn qamtamasyz etýge basa mán berildi.
Baıandamalardy tyńdaǵan Memleket basshysy bolǵan oqıǵanyń barlyq mán-jaıyn anyqtaý jumystaryn jalǵastyrý qajet ekenin aıtty.
Qasym-Jomart Toqaev aqparat salasyndaǵy kúshtik qurylymdar men ókiletti organdar kúsh-jigerlerin úılestirip, jurtshylyq tarapynan túsetin saýaldarǵa jedel jaýap berýge tıis ekenine toqtaldy.
Memleket basshysy turǵyndardyń qazasyna qatysty másele boıynsha Bas prokýratýraǵa jáne Ishki ister mınıstrligine árbir jaǵdaıdy muqııat tergep-tekserý jóninde tapsyrma berdi.
– Jurtshylyqtyń bolǵan oqıǵalar jóninde dolbar men qaýesetke negizdelgen pikir qalyptastyrýyna jol berýge bolmaıdy. Azamattar bıliktiń ashyqtyq pen zańdylyqty qamtamasyz etip otyrǵanyn kórýge tıis, – dedi Memleket basshysy.
Prezıdent Ákimshiliginiń basshylyǵyna atalǵan máseleni baqylaýǵa alý tapsyryldy.
«Adyrna» ulttyq portaly
