Qańtar oqıǵalaryna baılanysty negizsiz qýdalaýǵa ushyrap jatqan azamattardyń quqyǵyn qorǵap, bostandyqqa shyǵarý maqsatynda qurylǵan «Amanat» qoǵamdyq komıssııasy jumysyn bastady, dep habarlaıdy "Adyrna" ulttyq portaly.
Komıssııanyń maqsaty: Qańtar oqıǵasy kezinde bolǵan jaǵdaılarǵa baılanysty búgingi kúni qýdalaýshylyq kórip, tergeýde júrgen azamattar arasynan qylmystyq pıǵyly bolmaǵan nemese osy jaǵdaıǵa kezdeısoq tap bolǵan, tek beıbit sherýge shyqqandardy anyqtap, olardyń jazyqsyz japa shekpeýi úshin meılinshe kómek berip, qylmystyq qýdalaýshylyq qysymnan alyp shyǵý.
Qańtar oqıǵasy kezinde ǵımarattardyń órtengeni, qıratylyp, tonaýǵa ushyraǵany, adam shyǵyny bolǵany buljymas fakt. Osy oraıda qarapaıym halyqty paıdalanyp, aram pıǵyldaryn iske asyrmaq bolǵan qylmystyq top nemese ekstremıster anyqtalyp, tıisti jazasyn alýy kerek dep sanaımyz. Al biz qurǵan komıssııanyń maqsaty osy qandy oqıǵa barysynda beıbit sherýge shyqqan adal nıetti azamattar men aram pıǵyldy qaskóılerdiń ara jigin ajyratý. Jazyqsyz jandardyń japa shekpeýine, qýdalanbaýyna, zańmen qorǵalýyna barynsha kómek kórsetý. Úıinde alańdap kútip otyrǵan bala-shaǵasymen, ata-anasymen, jan-jarymen aman-esen qaýyshýyna járdem berý.
Komıssııa quramynda barlyǵy 8 adam. Onyń tórteýi kásibı advokat, bir QR Parlamenti Májilisiniń depýtaty, bir ulttyq qoǵamdyq keńestiń múshesi, bas prokýratýra men ishki ister mınıstrliginiń bir-bir ókili.
"Komıssııanyń qurylýyna baılanysty quqyq qorǵaýshylardy, qoǵam belsendilerin, BAQ ókilderi men barsha azamattardy osy ıgi is tóńireginde birigýge, mańyzdy jumysqa jumyla atsalysýǵa shaqyramyz!", dedi Abzal Quspan"
Al búgin, ıaǵnı 25 qańtarda Abzal Quspan Facebook jelisindegi paraqshasynda 11 adamdy bosatyp alǵandary týraly jazba jarııalady.
«11 adamdy bosatyp aldyq. Densaýlyq jaǵdaıyna baılanysty. Al 4 adamdy qazir aýrýhanadan shyǵarý kerek.
«Taǵy qansha adam shyǵady?» degen jýrnalıstiń suraǵyna «Onymen aınalysyp jatyrmyz, qarap jatyrmyz» dep jaýap berdi ol.
«Olardyń jatatyn oryndaryna barmaımyz ǵoı. Olardy advokattardyń, tergeýshilerdiń kezdesetin jerine alyp shyǵady. Biz jumysty keshe ǵana bastadyq. Senbi kúni ǵana ruqsat berildi. Bul bastamamyzdy prezıdent ákimshiligi qoldaıtynyn bildirip, prokýratýra organdarymen birge jumys isteýge tapsyrma berdi. Kesheden bastap arnaıy mamandarmen materıaldardy endi-endi qarap bastadyq.
11 adam tek qana qylmystyq is boıynsha bosatyldy. Olar 272 bappen ustalǵan edi.
Mysalyǵa myna baýyrymyzdyń eshqandaı kinási joq, kúzet basqarmasynda qyzmette isteıdi. Olar kerisinshe belsendi bolady», — dedi ol jelide taraǵan vıdeoda.
"Adyrna" ulttyq portaly
